އެމެރިކާއިން ކެނެޑާއަށް ދަތުރު ނުކުުރުމަށް އިލްތިމާސްކޮށްފި

ކޮވިޑްގެ ހާލަތު ގޯސްވެ އެމެރިކާގެ ރައްޔިތުން ކެނެޑާއަށް ދަތުރުނުކުރުމަށް އިލްތިމާސްކޮށްފިއެވެ.

އެމެރިކާގެ ސެންޓަރ ފޮރ ޑިޒީސް ކޮންޓްރޯލުން މިގޮތަށް އިލްތިމާސްކޮށްފައިވަނީ އާދީއްތަ ދުވަހުއެވެ. ސީޑީސީން ވަނީ ކެނެޑާއަށް ދަތުރުކުރުން ލެވެލް 4ށް އުފުލާފައެވެ. މިހާތަނަށް ދުނިޔޭގެ 80 ތަނަކަށް ދަތުރު ނުކުރުމަށް އިލްތިމާސްކޮށް އެ ސަރަހައްދުތަކުގެ ލެވެލް 4ށް ވަނީ މަތިކޮށްފައެވެ.

އެމެރިކާއިން ނޮވެމްބަރު މަހު ކެނެޑާ އަދި މެކްސިކޯއަށް ވެކްސިން ފުރިހަމަ ކޮށްފައި ތިބި މީހުންނަށް ދަތުރުކުރެވޭ ގޮތަށް ނިންމައި ފިޔަވަޅުތައް ލުއިކުރިއެވެ. މިއީ މި ދެގައުމަށް ދަތުރުކުރުމަށް 2020 ވަނަ އަހަރު އެޅި ފިޔަވަޅުތަކަށް ލުއިދިން ފުރަތަމަ ފަހަރެވެ. ކެނެޑާއަކީ އެމެރިކާ މީހުން ދަތުރުކުރާ މަންޒިލްތަކުގެ ތެރެއިން އެންމެ ގިނަ މީހުން ދަތުރުކުރާ އެއް މަންޒިލެވެ.

އެމެރިކާގެ ސީޑީސީގެ ނިންމުމާއި ގުޅިގެން ކެނެޑާއިން އަދި ވަކިއެއްޗެއް ބުނެފައިނުވެއެވެ. ނަމަވެސް ކޮންމެހެން ކުރަން ޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް އެގައުމުން ވަނީ އިލްތިމާސްކޮށްފައެވެ. މީގެ ތެރޭގައި ފަތުރުވެރިންގެ ގޮތުގައި ވެސް ދަތުރު ނުކުރުމަށް އިލްތިމާސްކުރިއެވެ. ނަމަވެސް 2020 ވަނަ އަހަރުގެ އޮކްޓޫބަރު މަހުން އެ ނިންމުން އަނބުރާ ނެގިއެވެ.

އެމެރިކާއިން ވަނީ 4 ގައުމަކަށް ނެރެފައިވާ އެލަރޓް ލެވެލް 4ން 3ށް ދަށްކޮށްފައެވެ. ހޯމަ ދުވަހު ލުއިދިން ގައުމުތަކުގެ ތެރޭގައި އާމީނިއާ، ބެލަރޫސް، ލެސޯތޯ އަދި ޒިމްބާބްވޭގެ އިތުރުން ސިންގަޕޫރު ވެސް ހިމެނެއެވެ. އެމެރިކާގެ ސީޑީސީން ބުނެފައިވަނީ ލެވެލް 3 ގެ ގައުމުތަކަށް ދަތުރުކުރުމުގެ ކުރިން ވެކްސިން ފުރިހަމަކުރަން ޖެހޭނެ ކަމަށެވެ.