ހޮކޭ ފުޓްބޯޅަ ކުޅުން ހުއްޓާލައިފި

ރާއްޖޭގައި އުފެދުނު އެންމެ މޮޅު ޑިފެންޑަރުންގެ ތެރޭގައި ހިމެނޭ މުޙައްމަދު ރަޝީދު (ހޮކޭ) ފުޓުބޯޅަ ކުޅުން ހުއްޓައިލައިފިއެވެ.

އުމުރުން 36 އަހަރުގެ ހޮކޭ ފުޓުބޯޅަ ކުޅުން ހުއްޓާލިކަން ހޯމަ ދުވަހުގެރޭ އޭނާގެ ރަސްމީ ފޭސްބުކް ޕޭޖުގައި ވަނީ ހާމަކޮށްފައެވެ. ރާއްޖޭގެ އެންމެ މަތީ ފަންތީގައި 10 އަހަރަށްވުރެ ގިނަ އަހަރު ހޮކޭ ކުޅެފައިވެއެވެ.

ރ. އަލިފުއްޓައް އުފަން ހޮކޭ ކުޅުން ހުއްޓާލިކަން އިއުލާންކޮށް އޭނާގެ ފޭސްބުކް ޕޭޖުގައި ބުނީ މި ނިންމުން ނިންމީ ވަރަށް ވިސްނުމަށްފަހުގައި ކަމަށެވެ. އަދި ފުޓުބޯޅަ ކެރިޔަރުގައި ގައުމު ތަމްސީލުކުރަން ފުރުސަތު ލިބުން އެއީ ބޮޑު އުފަލެއް ކަމަށާއި، ކެރިޔަރުގައި މިހާ ހިސާބަށް އައުމަށް އެހީތެރިވެދިން އެންމެހާ ފަރާތްތަކަށް ޝުކުރުއަދާކުރާ ކަމަށެވެ.

2011 ވަނަ އަހަރު ވިކްޓްރީ ސްޕޯޓްސް ކްލަބުން ވިދާލި ހޮކޭ ވަނީ ކުރު މުއްދަތެއްގެ ތެރޭގައި ގައުމީ ޓީމުން ޖާގަ ހޯދާފައެވެ. ވިކްޓްރީއަށްފަހު ހޮކޭ ދެން ފެނިގެންދިޔައީ ކްލަބް ވެލެންސިއާއިންނެވެ. 2013 ވަނަ އަހަރު ވެލެންސިއާއަށް ބަދަލުވުމަށްފަހު ހަމަ އެ އަހަރު ހޮކޭ ވަނީ މާޒިޔާ ސްޕޯޓްސް އެންޑް ރެކްރިއޭޝަނަށްވެސް ބަދަލުވެފައެވެ. އަދި 2014 ވަނަ އަހަރުން ފެށިގެން 2018 ވަނަ އަހަރުގެ ސީޒަނުގެ ނިޔަލަށް ހޮކޭ ކުޅެފައިވަނީ ނިއުރޭޑިއަންޓް ސްޕޯޓްސް ކްލަބަށެވެ. ނިއުގެ ބޭންޑް އަޅައިގެން ގިނަ މެޗުތަކެއް ކުޅުނު ހޮކޭ ވަނީ ނިއު އާއިއެކު ރާއްޖޭގެ ފުޓުބޯޅައިގެ ހުރިހާ މުބާރާތެއް ކާމިޔާބުކޮށްފައެވެ.

ނިއު ދޫކޮށް 2019 ވަނަ އަހަރު ދަ ގްރާންޑޭއަށް ހޮކޭ ކުޅުނުއިރު އެ ޓީމުގެ ކެޕްޓަން ބޭންޑް އަޅައިގެން ވެސް ކުޅުނީ ހޮކޭއެވެ. އެއަށްފަހު މިދިޔަ ސީޒަނުގައި ހޮކޭ ފެނިގެން ގޮސްފައިވަނީ ސުޕަ ޔުނައިޓެޑް ސްޕޯޓްސް (ސަސް) އިންނެވެ. މި ސީޒަނުގައިވެސް ސަސް އާއިއެކު ޕްރެޒިޑެންޓްސް ކަޕުގައި އީގަލްސްއާ ދެކޮޅަށް ކުޅުނު މެޗުގައި ހޮކޭ ފެނިގެންދިޔައެވެ. އެކަމަކު މެޗު ނިމެން ކައިރިވެފައިވަނިކޮށް އަނިޔާވެ ހޮކޭ ވަނީ އެމެޖެންސީގައި ހޮސްޕިޓަލަށް ގެންގޮސްފައެވެ.

ގައުމީ ފުޓުބޯޅަ ޓީމަށް 30 އަށްވުރެ ގިނަ މެޗު ކުޅެދިން ހޮކޭ ވަނީ ގައުމީ ޓީމަށް އެއް ލަނޑު ކާމިޔާބު ކޮށްދީފައެވެ. އެއީ 2012 ވަނަ އަހަރުގެ އޭއެފްސީ ޗެލެންޖު ކަޕުގައި ނޭޕާލާ ދެކޮޅަށް ކުޅުނު މެޗުގައި އޭނާ ކާމިޔާބުކުރި ލަނޑެވެ.