ދެން ސާމްޕަލް ނަގާނީ ސޯޝަލް ސެންޓަރުގެ ބަދަލުގައި ތާޖުއްދީނުން

މާލެ ސަރަހައްދުހައި ޕީސީއާރު ޓެސްޓް ހެދުމަށް ބޭނުންވާ ސާމްޕަލް ނަގާ ސެންޓަރުތަކަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބަދަލު ގެނެސްފިއެވެ.

އެޗްޕީއޭއިން ބުނީ ސޯޝަލް ސެންޓަރުގެ ބަދަލުގައި ދެން ސާމްޕަލް ނަގާނީ ތާޖުއްދީން ސްކޫލުންކަމަށެވެ. އެގޮތުން ތާޖުއްދީން ސްކޫލުން ހޮނިހިރު ދުވަހުން ފެށިގެން ބުދަ ދުވަހުގެ 9ން 12އަށެވެ. އަދި ހަވީރު 3ން އިރުއޮއްސި 6 އަށެވެ. މީގެއިތުރުން ބުރާސްފަތި ދުވަހުގެ 9ން މެންދުރު 12 އަށް އަދި ހުކުރު ދުވަހުގެ ހަވީރު 3ން އިރުއޮއްސި 6އަށެވެ.

މީގެއިތުރުން އެފްއޭއެމް ބިލްޑިންގ އިން ކޮންމެ ދުވަހަކު މެންދުރު 2ން ފެށިގެން އިރުއޮއްސި 6އާ ހަމައަށް ސާމްޕަލް ނަގައިދެމުން ގެންދާނެކަމަށް އެޗްޕީއޭއިން ބުނެއެވެ. އަދި ވިލިމާލެއިންވެސް ކޮންމެ ދުވަހަކު ހަވީރު 4ން ފެށިގެން އިރުއޮއްސި 6:30 ވަންދެން ސާމްޕަލް ނަގައިދެމުން ގެންދާނެއެވެ.

އެޗްޕީއޭއިން އިތުރު ސެންޓަރަކުން ސާމްޕަލް ނަގާގޮތަށް ބަދަލު ގެނެސްފައިމިވަނީ 10 ޖަނަވަރީން ފެށިގެން މާލެ ސަރަހައްދުން ދަތުރުކުރުމުގައި ޕީސީއާރް ޓެސްޓް ހަދަންޖެހޭ ކަމަށް އެޗްޕީއޭއިން ނިންމި ނިންމުމާއެކު ސާމްޕަލް ނަގާ ތަންތަނުގައި ކިޔުތައް ދިގުވެފައިވަނިކޮށެވެ. ބައެއް މީހުން ކިޔުގައި މަޑުކޮށްގެން ތިން ގަޑިއިރުވެސް ހޭދަކުރަންޖެހިފައިވެއެވެ. މިދުވަސްވަރަކީ ޗުއްޓީ ދުވަސްވަރަށްވާތީ ގިނަ އަދަދެއްގެ ބަޔަކު ވަނީ މާލެއަށް އައިސްފައެވެ.

ހެލްތު މިނިސްޓްރީން ބުނީ ސާމްޕަލް ނެގުމުގައި ކިޓް ލިބުމުގެ އެއްވެސް ދަތިކަމެއް ކުރިމަތިވެފައި ނުވާ ކަމަށެވެ. ނަމަވެސް ސާމްޕަލް ނެގުމަށްޓަކައި ހަރަކާތްތެރިވާ މީހުންގެ އަދަދު މަދުވުމުގެ ސަބަބުން އެމަސައްކަތުގައި ލަސްތަކެއް ހުރިކަމަށެވެ.