ޕީސީއާރު ޓެސްޓު ހެދުމަށް 3 ގަޑިއިރު ގަދަ އަވީގައި
މާލެ ސަރަހައްދުން ދަތުރުކުރުމުގައި ޕީސީއާރް ޓެސްޓް ހަދަންޖެހޭ ކަމަށް އެޗްޕީއޭން އެންގީ ކޮވިޑް ކޭސްތައް ގިނަވާތީ
ޕީސީއަރު ޓެސްޓު ހެދުމަށް ސޯޝަލް ސެންޓަރު ކައިރީގައި ހަދާފައިވާ ކިއު
މާލެއިން އަތޮޅުތެރޭ ރަށްތަކަށް ދަތުރުކުރާއިރު ޕީސީއާރު ޓެސްޓު ހަދަންޖެހޭކަމަށް ހެލްތު ޕްރޮޓްކްޝަން އެޖެންސީ (އެޗްޕީއޭ)ން އެންގުމާއެކު ޓެސްޓު ހަދަންދާ މީހުން ގިނަވެ ކިއުތައް ދިގުވެއްޖެއެވެ.
ސޯޝަލް ސެންޓަރުގައި ހުންނަ ޕީސީއާރު ޓެސްޓުހަދާ ސެންޓަރަށް ހޯމަ ދުވަހުގެ މެންދުރު ގަޑީގައި ޕީސީއާރު ޓެސްޓު ހަދަން ދިޔަ މީހުންގެ ކިއު ވަނީ ހިރިޔާ ސްކޫލާ ހަމައަށް ދިގުވެފައެވެ. ގިނަ އަދަދެއްގެ މީހުން މި ސަރަހައްދުގައި ޓެސްޓު ކުރުމަށް ގޮސްތިބިއިރު، އެމީހުން ފާހަގަކުރި ގޮތުގައި ޓެސްޓު ހަދަން ގޮސްތިބީ ސްކޫލުގެ ކިޔެވުން ފެށުމުގެ ކުރިން އެނބުރި ރަށަށް ދިއުމަށެވެ. މި މީހުންނާއެކު ގިނަ އަދަދެއްގެ ކުޑަ ކުދިންވެސް ތިއްބެވެ.
ކިއުގައި ތިބި މީހުން ރާއްޖެއެމްވީއަށް މައުލޫމާތު ދިންގޮތުގައި އެމީހުން ތިން ގަޑިއިރަށްވުރެ ގިނައިރު ކިއުގައި މަޑުކުރަން ޖެހުނެވެ. މީގެ ތެރެއިން ބައެއް މީހުންނަކީ މާލެ އަތޮޅުގެ އެކި ރަށްރަށުގައި ތިބެފައި މާލެ އައިސް، އަމިއްލަ ރަށަށް ދިއުމަށްޓަކައި ޕީސީއާރު ޓެސްޓު ހަދަން ގޮސްތިބި މީހުންނެވެ.
ގިނަ އަދަދެއްގެ މީހުން ޕީސީއާރު ޓެސްޓު ހެދުމަށް ކިއުގައި ޖެހެމުންދާއިރު އެމީހުން ތިބެން ޖެހެނީ ގަދަ އަވީގައެވެ. އަދި ސާމްޕަލް ނެގުމުގައި ލަސްވާތީ އެތައް ގަޑިއިރެއް މަޑުކުރަން ޖެހެއެވެ. ހެލްތު މިނިސްޓްރީން ބުނީ ސާމްޕަލް ނެގުމުގައި ކިޓް ލިބުމުގެ އެއްވެސް ދަތިކަމެއް ކުރިމަތިވެފައި ނުވާ ކަމަށެވެ. ނަމަވެސް ސާމްޕަލް ނެގުމަށްޓަކައި ހަރަކާތްތެރިވާ މީހުންގެ އަދަދު މަދުވުމުގެ ސަބަބުން އެމަސައްކަތުގައި ލަސްތަކެއް ހުރިކަމަށެވެ.
10 ޖަނަވަރީ 2022ން ފެށިގެން މާލެ ސަރަހައްދުން ދަތުރުކުރުމުގައި ޕީސީއާރް ޓެސްޓް ހަދަންޖެހޭ ކަމަށް އެޗްޕީއޭން އެންގީ އާދީއްތަ ދުވަހުއެވެ. އެޗްޕީއޭން މިގޮތަށް ނިންމީ މާލެ ސަރަހައްދުގައި ކޮވިޑް-19ގެ ކޭސް އިތުރުވެ އަދި މާލެ ސަރަހައްދު (މާލެ، ހުޅުމާލެ، ވިލިމާލެ)ގައި ހަފްތާއަކު ޓެސްޓުކުރެވޭ ސާމްޕަލްގެ ނިސްބަތުން ޕޮޒިޓިވިޓީ 5 އިންސައްތަ އަށްވުރެ މަތިވުމާ ގުޅިގެންނެވެ.
