ކުރިއަށް އޮތް ދެ ދުވަހު ރަށްރަށަށް ދަތުރުކުރާ މީހުންނަށް އެޗްޕީއޭއިން ލުއި ގޮތްތަކެއް ހަމަޖައްސައިދީފިއެވެ.

މާލެ ސަރަހައްދުގައި ކޮވިޑް ކޭސްތައް އިތުރުވަމުން އަންނާތީ ދަތުރުފަތުރު ކުރުމުގައި އެޅި ހަރުކަށި ފިޔަވަޅުތަކާއެކު ގިނަަ ބަޔަކު އައީ ނުރުހުން ފާޅު ކުރަމުންނެއެވެ. އެއާއެކު އާދީއްތަ ދުވަހުގެ ރޭ އެޗްޕީއޭއިން ބުނީ، ކުރިއަށް އޮތް ދެ ދުވަހު ރަށްރަށަށް ދަތުރުކުރާ މީހުންނަށް މާލެއިން ސާމްޕަލް ނެގުމަށްފަހު ދަތުރުކޮށް ނަތީޖާ ލިބެންދެން ގޭގައި ކަރަންޓީންގައި ހުންނަން ގޮތަށް ރަށަށް ދެވޭނެ ކަމަށެވެ. އޭގެ އިތުރުން ރަށުން ސާމްޕަލް ނަގައި ޓެސްޓުކުރުމަށްފަހު، ޓެސްޓުގެ ނަތީޖާ ލިބެންދެން ކަރަންޓީނުގައި ހުންނަ ގޮތަށްވެސް ރަށަށް ދެވޭނެ ކަމަށެވެ.

އެޗްޕީއޭއިން ބުނެފައިވަނީ މާލެ ސަރަހައްދުގައި ބަލި ފެތުރުން އިތުރުވެފައިވާތީ ބަލި ފެތުރުން ކޮންޓްރޯލު ކުރުމުގެ ފިޔަވަޅެއްގެ ގޮތުން މާލެ ސަރަހައްދުން އެހެން ތަނަކަށް ދަތުރުކުރާނަމަ ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ ދަތުރުކުރުމުގެ 72 ގަޑިއިރު ނުވާ ޕީ.ސީ.އާރ ނެގެޓިވް ނަތީޖާ އޮންނަންވާނެ ކަމަށެވެ. އަދި ވެކްސިންގެ ޑޯޒްތައް ފުރިހަމަނުވާ ފަރާތެއްނަމަ، 14 ދުވަހުގެ ކަރަންޓީނު ފުރިހަމަ ކުރުމާއި، ކަރަންޓީނުން ދޫކުރެވޭނީ 14 ދުވަހުގެ ކަރަންޓީނު ފުރިހަމަ ކުރުމަށްފަހު ޕީ.ސީ.އާރ ޓެސްޓް ހަދައި ނަތީޖާ ނެގެޓިވް ވުމުން ކަމަށެވެ.

މީގެތެރޭގައި މިފަދަ މީހުންނާއެކުގައި ދަތުރު ކުރަންޖެހޭ ވެކްސިން ނުޖެހޭ އުމުރުގެ ކުޑަކުދިން ނުހިމެނޭނެ ކަމަށްވެސް އެޗްޕީއޭއިން ބުންޏެވެ.

 އެޗްޕީއޭއިން ބުނީ މާލެ، ހުޅުމާލެ އަދި ވިލިމާލެއިން ޓެސްޓުކުރާ ސާމްޕަލްގެ ތެރެއިން ޕޮޒިޓިވްވާ ނިސްބަތް މިވަގުތު ހުރީ %5 އިން މަތީގައެވެ. މިކަމާއި ގުޅިގެން ބަލި ކޮންޓްރޯލް ކުރުމަށް 10 ޖެނުއަރީން ފެށިގެން އިތުރު ފިޔަވަޅުތައް އެޅުމަށް ވަނީ ނިންމާފައެވެ.

ދަތުރުފަތުރު ކުރުމުގައި އެޅި ފިޔަވަޅުތަކާއެކު، ސާމްޕަލް ނެގުމަށް ސޯޝަލް ސެންޓަރު ކައިރި އަދި ސެނަހިޔާ ކައިރީގައިވެސް ދިގު ކިޔޫތަކެއް ދަމާލިއެވެ. އަދިޕީސީއާރް ހެދުމަށް ކްލިނިކްތައްވެސް ފުރާލިއެވެ.