ޕޮޒިޓިވްވާ ރޭޓް މަތިވުމާއި ގުޅިގެން، މާލެ ސަރަހައްދުން ދަތުރުކުރުމަށް ޕީސީއާރް ޓެސްޓު ހެދުމަށް އަންގައިފި
ވެކްސިންގެ ޑޯޒްތައް ފުރިހަމަނުވާނަމަ 14 ދުވަހު ކަރަންޓީންވާން ޖެހޭ
މާލޭގެ ބާޒާރުމަތި
މާލެ ސަރަހައްދުން ދަތުރުކުރުމުގައި ޕީސީއާރް ޓެސްޓް ހަދަން ޖެހޭ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ މާލެ ސަރަހައްދުގައި ކޮވިޑް-19ގެ ކޭސް އިތުރުވެ އަދި މާލެ ސަރަހައްދު (މާލެ، ހުޅުމާލެ، ވިލިމާލެ)ގައި ހަފްތާއަކު ޓެސްޓުކުރެވޭ ސާމްޕަލްގެ ނިސްބަތުން ޕޮޒިޓިވިޓީ 5 އިންސައްތަ އަށްވުރެ މަތިވެފައިވާތީ، 10 ޖަނަވަރީ 2022އިން ފެށިގެން މާލެ ސަރަހައްދުން ދަތުރުކުރުމުގައި ޕީސީއާރް ޓެސްޓް ހަދަންޖެހޭ ކަމަށެވެ.
އެޗްޕީއޭއިން ބުނީ މާލެއިން ދަތުރުކުރެވޭނީ ވެކްސިންގެ ޑޯޒްތައް ފުރިހަމަވެ 14 ދުވަސް ހަމަވެފައިވާ ފަރާތެއް ނަމަ 72 ގަޑިއިރު ނުވާ ޕީސީއާރް ނެގެޓިވް ނަތީޖާއާއެކު ކަމަށެވެ. މީގެ އިތުރުން ވެސް ބައެއް ފިޔަވަޅުތައް އެޅުމަށް އެޗްޕީއޭއިން ވަނީ ނިންމާފައެވެ. އެގޮތުން ވެކްސިންގެ ޑޯޒްތައް ފުރިހަމަނުވާ ފަރާތެއްނަމަ، 14 ދުވަހުގެ ފުރަބަންދު ކަރަންޓީނު ފުރިހަމަކުރަން ޖެހެއެވެ. އަދި ކަރަންޓީނުން ދޫކުރެވޭނީ 14 ދުވަހުގެ ކަރަންޓީނު ފުރިހަމަކުރުމަށްފަހު ޕީސީއާރް ޓެސްޓް ހަދައި ނަތީޖާ ނެގެޓިވް ވުމުން ކަމަށް އެޗްޕީއޭއިން ބުނެއެވެ. މީގެތެރޭގައި މިފަދަ މީހުންނާއެކުގައި ދަތުރުކުރަންޖެހޭ، ވެކްސިން ނުޖެހޭ އުމުރުގެ ކުޑަކުދިން ނުހިމެނޭނެއެވެ.
އެޗްޕީއޭއިން ބުނީ މާލެ ސަރަހައްދުން ރާއްޖޭގެ އެހެން ރަށްރަށަށް ދަތުރުކުރާ ފަރާތްތަކުން ކޮވިޑްސޭފް ޕޯޓަލްއިން ނެގެޓިވް ނަތީޖާ ދައްކަން ޖެހޭ ކަމަށެވެ. އަދި ކަރަންޓީނުވުމަށް ދަތުރުކުރާ މީހުން ހާލުބެލުން ޕޯޓަލްއިން ހުއްދަ ހޯދަން ޖެހޭ ކަމަށެވެ.
ކޮވިޑް-19ގެ ހާލަތު ގޯސްވަމުންދާތީ ރައްކާތެރިކަމުގެ އިތުރު ފިޔަވަޅުތައް އެޗްޕީއޭއިން ދަނީ އަޅަމުންނެވެ. އަދި ބަލި ކޮންޓްރޯލް ކުރުމުގައި އާއްމު ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށާއި، ގަވާއިދާ އުސޫލު ތަންފީޒު ނުކުރާނަމަ، ކޭސްތައް މަދު ނުކުރެވޭނެ ކަމަށް އެޗްޕީއޭއިން ބުނެއެވެ.
