މައުލޫމާތު ފޯރުކޮށް ނުދިން، ދައުލަތުގެ 19 މުއައްސަސާއެއްގެ މައްސަލަ އިންފޮމޭޝަން ކޮމިޝަނަރުގެ އޮފީހަށް!
އިންފޮމޭޝަން ކޮމިޝަނަރުގެ އޮފީހަށް މައްސަލަ ހުށަހެޅިފަހުން މައުލޫމާތު ފޯރުކޮށްދިން 12 ފަރާތެއް ހިމެނޭ
ސަރުކާރުގެ އެންމެ ގިނަ އޮފީސްތައް ހިންގަމުންދާ ވެލާނާގެ
މައުލޫމާތު ފޯރުކޮށްނުދިން ދައުލަތުގެ 19 މުއައްސަސާއެއްގެ މައްސަލަ އިންފޮމޭޝަން ކޮމިޝަނަރުގެ އޮފީހަށް ހުށަހަޅާފައިވާ ކަމަށް, އެސޯސިއޭޝަން ފޮރ ޑިމޮކްރެސީއިން ދަ މޯލްޑިވްސްއިން ބުނެފިއެވެ.
އެސޯސިއޭޝަން ފޮރ ޑިމޮކްރެސީން ބުނީ, ޑިމޮކްރެޓިކް ގައުމެއްގައި މައުލޫމާތު ހޯދައި ލިބިގަތުމަކީ ރައްޔިތުންގެ ހައްގެއް ކަމަށާއި، ރާއްޖޭގެ ގާނޫނު އަސާސީގެ 29 ވަނަ މާއްދާގައި އެ ހައްގުވަނީ ރައްޔިތުންނަށް ކަށަވަރުކޮށްދީފައި ކަމަށެވެ. މައުލޫމާތު ހޯދައި ލިބިގަތުމަށް 12 ޖެނުއަރީ 2014ގައި ރާއްޖޭގައި ގާނޫނެއްވެސް ވުޖޫދުކުރެވިފައި އެބައޮތް ކަމަށާއި، އެ ގާނޫނުގެ 37 ވަނަ މާއްދާގައި "އަމިއްލަ އިސްނެގުމުގައި އާންމު ކުރުމުގެ ޒިންމާ"ގެ ދަށުން ބައެއް ކަހަލަ މައުލޫމާތަކީ ދައުލަތުގެ މުއައްސަސާތަކުން އަމިއްލަ އިސްނެގުމަށް ހާމަކުރަންޖެހޭނެ މައުލޫމާތުތަކެއް ކަމަށް ބަޔާންކޮށްފައިވާ ކަމަށެވެ. ނަމަވެސް ދައުލަތުގެ މުއައްސަސާތަކުން އެ މާއްދާ ތަންފީޒު ނުކުރާ ކަމަށް އެސޯސިއޭޝަން ބުނެއެވެ.
އެސޯސިއޭޝަން ފޮރ ޑިމޮކްރެސީއިން ހިންގާ ޕްރޮޖެކްޓް ''RTI37''ގެ ދަށުން 12 ޑިސެމްބަރ 2021ގެ ނިޔަލަށް ދައުލަތުގެ 73 މުއައްސަސާއެއްގައި ބައެއް މައުލޫމާތުތައް ފޯރުކޮށްދިނުމަށް 21 ނޮވެމްބަރ 2021ގައި ލިޔުމުން އެދިފައިވާ ކަމަށެވެ. އެއީ ދައުލަތުގެ އިދާރާގެ ދައުރާއި، މަސްއޫލިއްޔަތުތަކާއި، އޮނިގަނޑާއި، ވާޖިބުތަކުގެ ތަފުސީލުތަކާއި، ދައުލަތުގެ އިދާރާގެ މަސްއޫލިއްޔަތުތައް އަދާކުރުމުގައި އަމަލުކުރާ ގާނޫނުތަކާއި ގަވާއިދުތަކާއި، ސިޔާސަތުތަކާއި، އުސޫލުތަކާއި، ހަމަތައް ކަމަށެވެ. އަދި ދައުލަތުގެ އިދާރާއިން ގެންގުޅޭ ނުވަތަ ބަލަހައްޓާ މައުލޫމާތާއި، އާންމުކޮށް ޝާއިއުކުރާ މައުލޫމާތުގެ ބާވަތް، އަދި މައުލޫމާތަށް އެދުމުގައި އަމަލުކުރަންވީ އުސޫލާއި، ދައުލަތުގެ އިދާރާގެ އެންމެހާ މުވައްޒަފުންނަށް ވަކިވަކިން ދެވޭ އުޖޫރައާއި އިނާޔަތްތައް ކަމަށް އެ އެސޯޝިއޭޝަނުން ބުނެއެވެ.
އެ އެސޯޝިއޭޝަނުން ބުނީ، މައުލޫމާތު ހޯދައި ލިބިގަތުމުގެ ގާނޫނުގެ ދަށުން، މައުލޫމާތު ހޯދުމަށް ހުށަހަޅަންޖެހޭ ފޯމު ހުށަހެޅުމުން ގާނޫނުގެ 6 ވަނަ މާއްދާގެ (ޅ)ގައި ވާފަދައިން މައުލޫމާތަށް އެދި ހުށަހެޅުމުން ލިބުނުކަމުގެ ރަސީދު ފޮނުވާފައިވަނީ 30 މުއައްސަސާއަކުން ކަމަށާއި، މުއްދަތު ހަމަވުމުގެ ކުރިން އެދިފައިވާ މައުލޫމާތު 35 މުއައްސަސާއަކުން ފޮނުވި ނަމަވެސް އޭގެ ތެރެއިން 5 ފަރާތަކުން ފޮނުވި މައުލޫމާތު ފުރިހަމަނުވާ ކަމަށެވެ.
އެހެންކަމުން އެ 5 ފަރާތާއި، މުއްދަތު ހަމަވިފަހުން މައުލޫމާތު ފުރިހަމަނުކޮށް ޖަވާބު ފޮނުވި ފަރާތަކާއެކު ޖުމުލަ 6 ފަރާތެއްގެ މައްސަލަ މިހާރު ވާނީ ގާނޫނުގައިވާ ގޮތުގެ މަތިން މުރާޖާކުރުމަށް އެދިފައެވެ. މައުލޫމާތު ފޯރުކޮށް ނުދިން ޖުމުލަ 31 ފަރާތެއްގެ މައްސަލަ މިހާރު ވާނީ އިންފޮމޭޝަން ކޮމިޝަނަރުގެ އޮފީހަށް ހުށަހަޅާފައިވާ ކަމަށާއި، އޭގެ ތެރޭގައި އިންފޮމޭޝަން ކޮމިޝަނަރުގެ އޮފީހަށް މައްސަލަ ހުށަހެޅިފަހުން މައުލޫމާތު ފޯރުކޮށްދިން 12 ފަރާތެއް ހިމެނޭ ކަމަށް އެސޯޝިއޭޝަނުން ބުނެއެވެ.
