ހުސްވެފައިވާ އިންފޮރމޭޝަން ކޮމިޝަނަރުގެ މަގާމަށް އަލްއުސްތާޛު އަޙުމަދު އާހިދު ރަޝީދު އައްޔަނުކުރުމަށް ރައްޔިތުންގެ މަޖިލީހުން ރުހުން ދީފިއެވެ.

ހޯމަ ދުވަހުގެ ޖަލްސާގައި މަޖިލީހުން އާހިދަށް ރުހުން ދިނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިގެންނެވި 49 މެމްބަރުންގެ އިއްތިފާގުންނެވެ.

އިންފޮރމޭޝަން ކޮމިޝަނަރުގެ މަގާމަށް އައްޔަނުކުރުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ރައްޔިތުންގެ މަޖިލީހަށް 4 ނަމެއް ފޮނުއްވާފައެވެ. އެނަންތައް ދިރާސާކުރުމުގެ މަސައްކަތް މިނިވަން މުއައްސަސާތަކުގެ ކޮމިޓީން ވަނީ ކުރިޔަށް ގެންގޮސްފައެވެ. އެގޮތުން 4 ބޭފުޅުންނާ އިންޓަރވިއު ކުރުމަށްފަހު ނަންތައް ފާސްކުރުމަށް ކޮންމެ ނަމަކަށް ވަކިވަކިން ވަނީ ކޮމިޓީ ބައްދަލުވުމުގައި ވޯޓަށް އަހާފައެވެ. ކޮންމެ ބޭފުޅަކާ އިންޓަރވިއު ކުރުމަށްފަހު ވޯޓަށް އަހާފައިވާއިރު އާހިދުގެ ނަން ތަޅުމަށް ފޮނުވުމަށް ފާސްވެފައިވަނީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި 10 މެމްބަރުންގެ އިއްތިފާޤުންނެވެ.

ދެން މި މަގާމަށް ކުރިމަތިލައްވާފައިވާ އަލްއުސްތާޛު ޝިހާމް މުޙައްމަދު ވަޙީދަށް ވޯޓު ދެއްވީ 6 މެމްބަރުންނެވެ. އަދި ޢަޒްލީމާ އަޙްމަދަށް 7 މެމްބަރުން ވޯޓު ދެއްވިއިރު މަރިޔަމް ޢަލީމަށް ވޯޓު ދެއްވީ 5 މެމްބަރުންނެވެ. އެހެންކަމުން އިންފޮރމޭޝަން ކޮމިޝަނަރުގެ މަގާމަށް އައްޔަނުކުރުމަށް ތަޅުމަށް ފޮނުވާފައިވަނީ އަލްއުސްތާޛު އަޙުމަދު އާހިދުގެ ނަމެވެ.

އިންފޮމޭޝަން ކޮމިޝަނަރުގެ މަގާމު ހުސްވީ ކުރިން އެ މަގާމުގައި ހުންނެވި ތ. ވިލުފުށި، އަތަމާގެ، ޙުސައިން ފިޔާޒް މޫސާ, މާޗު މަހުގެ 21 ވަނަ ދުވަހު އިސްތިއުފާދެއްވުމުންނެވެ. ރައީސުލްޖުމްހޫރިއްޔާ އެމަގާމަށް ފިޔާޒް އައްޔަނުކުރައްވާފައިވަނީ 31 އޮކްޓޫބަރު 2019ގައެވެ.

އިންފޮމޭޝަން ކޮމިޝަނަރަކީ މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުން މަތިކޮށްފައިވާ ޒިންމާތަކާއި، ކަމާ ބެހޭ އެހެނިހެން ޤާނޫނުތަކާއި ގަވާއިދުތަކުގެ ދަށުން އުފުލަން ޖެހޭ ޒިންމާތަކުގެ ބޭނުމަށް ސީދާ ރައްޔިތުންގެ މަޖިލީހަށް ޖަވާބުދާރީ ވާންޖެހޭ މިނިވަން މީހެކެވެ.

އިންފޮމޭޝަން ކޮމިޝަނަރުގެ އޮފީހަކީ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 29 ވަނަ މާއްދާ އާއި މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު ގެ 43 ވަނަ މާއްދާގެ (ށ)ގައި ވާގޮތުގެ މަތިން، ރައްޔިތުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ޢައްޔަނުކުރައްވާފައިވާ އިންފޮމޭޝަން ކޮމިޝަނަރުގެ މަސްއޫލިއްޔަތު އަދާކުރުމަށްޓަކައި 13 ޖުލައި 2014ގައި ރައީސުލްޖުމްހޫރިއްޔާ އުފައްދަވާފައިވާ އޮފީހެކެވެ.