މައުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ ދަށުން އިންފޮމޭޝަން ކޮމިޝަނަރު ހުށަހެޅުއްވި މައްސަލައިގައި ޖިނާއީ ޢަމަލެއް ހިމެނޭތޯ ބަލަން ތަޙްޤީޤުކޮށްދެއްވުން އެދި ޕްރޮސެކިއުޓަރ ޖެނެރަލް އޮފީހުން އެ މައްސަލަ ފުލުސް އޮފީހަށް ފޮނުވައިފިއެވެ.

ޤާނޫނު ނަންބަރު 2014/1 (މަޢުލޫމާތޫ ހޯދައި ލިބިގަތުމުގެ ޙައްޤުގެ ޤާނޫނު) ގެ 65 ވަނަ މާއްދާ (ނިންމުންތަކަށް ތަބާވުން) ގައި އޮތީ، އިންފޮމޭޝަން ކޮމިޝަނަރުގެ ނިންމުމަކާމެދު އިސްތިއުނާފު ނުކޮށް، އަދި އެ ނިންމުމަށް ޢަމަލުވެސް ނުކޮށް ވަނިކޮށް، 45 ދުވަސް ފާއިތުވެއްޖެނަމަ، އެ ފަރާތަކާމެދު، ޤާނޫނީ ގޮތުން ކޮށްފައިވާ އަމުރަށް ނުކިޔަމަންތެރިވުމުން ޢަމަލުކުރާ އުޞޫލުން ޢަމަލުކޮށްދިނުމަށްޓަކައި ޝަރުޢީ ކޯޓަށް ފޮނުވުމަށްއެދި، ޕްރޮސެކިއުޓަރ ޖެނެރަލްގެ އޮފީހަށް، އިންފޮމޭޝަން ކޮމިޝަނަރަށް ހުށަހެޅިދާނެ ކަމަށެވެ.

އެހެންކަމުން މައުލޫމާތު ހާމަ ކުރުމަށް އަންގައި އިންފޮމޭޝަން ކޮމިޝަނަރުގެ އޮފީހުން ނިންމެވި ނިންމެވުން އިސްތިއުނާފު ނުކޮށް، އަދި އެ ނިންމެވުމަށް ޢަމަލުވެސް ނުކޮށް 45 ދުވަސް ފާއިތުވެފައިވާތީ، މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުގެ 65 ވަނަ މާއްދާގައި ބަޔާންކުރާގޮތުގެ މަތިން އައިކޮމްއިން ވަނީ މައްސަލައިގެ ލިޔުންތަކާއެކު ޕީޖީ އޮފީހަށް ފޮނުވާފައެވެ.

ޕީޖީ އޮފީހުން ބުނީ، ޤާނޫނު ނަންބަރު 2016/12 (ޖިނާއީ އިޖުރާއަތުގެ ޤާނޫނު) ގެ 5 ވަނަ މާއްދާ (ޖިނާއީ ކުށް ތަޙްޤީޤުކުރުން) ގެ (ހ) ގައި އޮންނަނީ، ދައުލަތުން ކުރާ ކޮންމެ ޖިނާއީ ދަޢުވާއެއްގައި އެކުލެވިގެންވާ ކުށުގެ މައްސަލަ، އެކަށީގެންވާ މިންވަރަކަށް ތަޙްޤީޤުކުރެވިފައި އޮންނަންވާނެކަމަށެވެ. މިމާއްދާގައި، ތަޙްޤީޤުކުރުމަކީ، ޖިނާއީ އިޖުރާއަތުގެ ޤާނޫނުގައި ބުނާ ގޮތަށް، ކުށުގެ ތުހުމަތުކުރެވޭ މީހާއަށް، ޤާނޫނީ ގޮތުން ލިބިދޭ ޙައްޤުތައް ލިބިދީގެން ހިންގާ ތަޙްޤީޤެކެވެ. އެ ތަޙްޤީޤު ހިންގުމުގެ ބާރު، ޤާނޫނީ ގޮތުން ލިބިދެނީ ދިވެހި ފުލުހުންގެ ޚިދުމަތަށެވެ. 

އެހެންކަމުން އިންފޮމޭޝަން ކޮމިޝަނަރު ހުށަހެޅުއްވި މައްސަލައިގައި ޖިނާއީ ކުށުގެ ޢަމަލެއް ހިމެނޭތޯ ނުވަތަ ނޫންތޯ ބައްލަވައި، ޤާނޫނުގައިވާ ގޮތުގެ މަތިން ތަޙްޤީޤު ކުރައްވައި، ތަޙްޤީޤުގެ ހޯދުންތަކާއެކު އެ އޮފީހަށް ފޮނުއްވައި ދެއްވުން އެދި، އަންގާރަ ދުވަހު ޕީޖީ އޮފީހުން ވަނީ ދިވެހި ފުލުހުންގެ ޚިދުމަތުގައި ދަންނަވާފައެވެ.

އަދި މިއީ، މަޢުލޫމާތު ހޯދައި ލިބިގަތުމުގެ ޤާނޫނުން އިންފޮމޭޝަން ކޮމިޝަނަރަށް ލިބިވަޑައިގަންނަވާ ބާރެއްގެ ބޭނުން ކުރައްވައިގެން ފޮނުއްވާފައިވާ މައްސަލައަކަށްވާތީ، ޢާންމު މައްސަލަތަކާ ޚިލާފަށް، މިމައްސަލަ ކުރިއަށްދާ ގޮތް ބަލަމުން ދިއުމަކީ އެ އޮފީހުން ކުރަންޖެހޭނެ ކަމެއްކަމަށް ފެންނާތީ، މި ތަޙްޤީޤު ހިނގާގޮތް ޕީޖީ އޮފީހުން ގާތުން ބަލަމުންދާނެކަމަށް ބުނެފައިވެއެވެ.

ޕީޖީ އޮފީހުން ބުނީ، މިމައްސަލައިގައި ދައުވާކުރުމާމެދު ގޮތެއް ނިންމާނީ ތަޙްޤީޤުގެ ހޯދުންތަކަށް ބަލައި، އެކަމުގައި ޢަމަލުކުރަންޖެހޭ ޤާނޫނީ އިޖުރާއަތުތަކުގެ ތެރެއިންނެވެ.