ބީއެމްއެލްގެ މުސާރަތަކުގެ ތަފްސީލު ދޭން އެންގި އެންގުމަށް ހައިކޯޓުން ތާއީދުކޮށްފި

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ބޭންކް އޮފް މޯލްޑިވްސް (ބީއެމްއެލް) ގެ މުސާރަތަކުގެ ތަފްސީލު ދޭން އިންފޮމޭޝަން ކޮމިޝަނަރުގެ އޮފީހުން އެންގި އެންގުމަށް ހައިކޯޓުން ތާއީދުކޮށްފިއެވެ.

ހައިކޯޓުން މިގޮތަށް ނިންމާފައިވަނީ ބީއެމްއެލްގެ މުވައްޒަފުންނަށް ދޭ މުސާރައިގެ ތަފްސީލްތައް ހޯދުމަށް އިންފޮމޭޝަން ކޮމިޝަނަރުގެ އޮފީހުން ބީއެމްއެލްއަށް އެންގުމުން، އެ އެންގުން ބީއެމްއެލްއިން ހައިކޯޓުގައި އިސްތިއުނާފްކުރުމާ ގުޅިގެންނެވެ. ބީއެމްއެލްގެ ބޯޑު މެންބަރުންނާއި ސީނިއާ މުވައްޒަފުންގެ މަގާމާއި މުސާރައިގެ ތަފްސީލުތައް ހޯދަން އަހުމަދު އައިމަން ނަމަކަށް ކިޔާ މީހަކު ބީއެމްއެލްގައި އެދުނީ 2020 ވަނަ އަހަރުއެެވެ. ނަމަވެސް ބީއެމްއެލްއިން ވަނީ އެ މައުލޫމާތުތައް ހާމަކުރަން ދެކޮޅު ހަދާފައެވެ.

ބީއެމްއެލްއިން މައުލޫމާތު ހާމަނުކުރުމުން އައިމަންގެ ފަރާތުން އިންފޮމޭޝަން ކޮމިޝަނަރުގެ އޮފީހަށް އެ މައްސަލަ ހުށަހެޅުމުން، އެ އޮފީހުން ނިންމީ އެ މައުލޫމާތު ބީއެމްއެލްއިން ހާމަކުރަންޖެހޭނެކަމަށެވެ. ނަމަވެސް ބީއެމްއެލްއިން ވަނީ އެ މައުލޫމާތު ހާމަނުކޮށް، އިންފޮމޭޝަން ކޮމިޝަނަރުގެ އޮފީހުގެ ނިންމުން ހައިކޯޓުގައި އިސްތިއުނާފްކޮށްފައެވެ.

ހައިކޯޓުގައި މިމައްސަލަ އިސްތިއުނާފްކުރުމުން ކޯޓުން ހޯމަ ދުވަހު ކުރި ހުކުމުގައި ބުނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ދައުލަތުގެ މަސްއޫލިއްޔަތެއް އަދާކުރާ ތަންތަނަކީ ދައުލަތުގެ އިދާރާއެއްކަމަށް ބެލެވޭނެކަމަށެވެ. އަދި ބީއެމްއެލްއަކީ ބޭންކިން ހިދުމަތް ދިނުމަށްޓަކައި ދައުލަތުން އުފައްދާފައިވާ އަދި ދައުލަތުގެ އަޣުލަބިއްޔަތު ހިއްސާ އޮތް ކުންފުންޏަކަށްވާއިރު އެ ބޭންކުގެ މައްޗަށް ވެސް އެ ގާނޫނު ހިންގޭނެ ކަމަށް ހުކުމުގައި ވަނީ ބުނެފައެވެ.

މީގެ އިތުރުން ބީއެމްއެލްގެ މުސާރަ ހާމަކުރަން އިންފޮމޭޝަން ކޮމިޝަނަރުގެ އޮފީހުގެ ނިންމުން ބާތިލްކުރަންޖެހޭ ގާނޫނީ އަދި ޝަރުއީ އެއްވެސް ސަބަބެއް ނެތްކަމަށާއި މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން އައިމަން ހޯދަން އެދުނު މައުލޫމާތުތަކަކީ ދޫނުކުރެވޭނެ މައުލޫމާތުތަކެއް ނޫންކަމަށް ވެސް އެ ހުކުމްގައިވަަނީ ބުނެފައެވެ.

ދައުލަތުން އުފައްދާފައިވާ ކުންފުނިތަކަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނު ހިނގާނެ ކަމަށް އިންފޮމޭޝަން ކޮމިޝަނަރުގެ އޮފީހުން ހެދި ގަވާއިދުގައި ލިޔެފައި އޮތުމަކީ ވެސް ގާނޫނާ ޚިލާފް ކަމެއް ނޫންކަމަށް ވެސް ހައިކޯޓުގެ ހުކުމުގައި ވަނީ ބުނެފައެވެ.

ހައިކޯޓުގައި މި މައްސަލަ ބެއްލެވި 3 ފަނޑިޔާރުންގެ ބެންޗުގައި ހިމެނިވަޑައިގެންނަވަނީ ފަނޑިޔާރު ހުސައިން މަޒީދާއި ފަނޑިޔާރު މުހައްމަދު ނިޔާޒް އަދި ފަނޑިޔާރު ހަސަން ޝަފީއުއެވެ. ފަނޑިޔާރުންގެ ބެންޗުގެ ރިޔާސަތުގައި އިންނެވީ ފަނޑިޔާރު ހުސައިން މަޒީދެވެ.