ބެޑްޝީޓަކަށް ލައިގެން ކެނެބިސް އެތެރެކުރި ބަންގްލަދޭޝް ރައްޔިތެއްކަމަށްވާ އާރިފްގެ މައްޗަށް އެ މައްސަލައިގައި އުފުލާފައިވާ ދައުވާ ސާބިތުނުވާކަމަށް ކްރިމިނަލް ކޯޓުން ހުކުމް ކޮށްފިއެވެ.
މި މައްސަލައަކީ 29 ޖޫން 2018 ގައި އާރިފް ސްރީލަންކަން އެއާލައިންސްގެ ފްލައިޓަކުން ރާއްޖެ އައިސް، ވީއައިއޭގެ ޓާރމިނަލްގައި ހުއްޓައި ކަސްޓަމްސްގެ އާންމު އުސޫލުގެ ދަށުން އޭނާގެ ދަބަސް ބަލައި ފާސްކުރިއިރު މަސްތުވާތަކެތި ފެނުނު މައްސަލައެކެވެ. އެގޮތުން އޭނާ ގެނައި ދަބަހެއްގައި އޮތް 2 ބެޑްޝީޓެއްގެ ތެރެއިން 1761 ގްރާމް ކެނެބިސް ވަނީ ފެނިފައެވެ.
މި މައްސަލައިގައި ދައުލަތުން އޭނާއާ ދެކޮޅަށް ގިނަ ހެކިތަކެއް ހުށައަޅާފައިވެއެވެ. ނަމަވެސް އާރިފް އެއްވެސް ދިފާއީ ހެއްކެއް ހުށައަޅާފައެއް ނުވެއެވެ. ކަސްޓަމްސްގެ އޮފިސަރުން ސުވާލު ކުރުމުން އޭނާ ވަނީ އެ ދަބަހަކީ އޭނާގެ އެއްޗެއް ނޫން ކަމަށާއި، އެއީ އޭނާގެ ތިމާގެ މީހަކު ރާއްޖެއަށް ގެންދަން ހަވާލުކުރި ދަބަހެއްކަމަށް ބުނެފައެވެ. އޭނާ ގެނައި ދަބަހަކުން އެތަކެތި ފެނުނުކަން ޝަރީއަތަށްވެސް ސާބިތުވެއެވެ.
ދައުލަތުން ވަނީ މި މައްސަލަ ޝައްކެއް ނެތް މިންވަރަށް ސާބިތުވާކަމަށް ކަނޑައަޅައިދެއްވުމަށް އެދިފައެވެ. އެގޮތުން އެއީ އެހެން މީހަކު ހަވާލުކުރި ތަކެތިކަމަށް އާރިފް ބުނި ނަމަވެސް، އޭނާއަށް އެކަމާ ގުޅޭ އެއްވެސް ހެއްކެއް ދެއްކިފައިނުވާކަމަށް ދައުލަތުން ފާހަގަ ކުރެއެވެ.
ދިފާއުން ވަނީ މައްސަލައިގައި ހައްުޔަރުކޮށް ގާނޫނީ އިންޒާރު ދިންއިރު ހަދާފައިވާ ގޯސްތަކެއްގެ ވާހަކަ ފާހަގަ ކޮށްފައެވެ. އެއްކަމެއްގެ ގޮތުން ދައުވާލިބޭ މީހާއަކީ ދިވެހި ބަހާއި އިނގިރޭސި ބަސްވެސް ނޭނގޭ ބަންގްލަދޭޝް ރައްޔިތަކަށްވާއިރު، އޭނާއަށް ގާނޫނީ އިންޒާރު ދީފައިވަނީ ދިވެހިބަހުންކަން ފާހަގަ ކޮށްފައިވެއެވެ. އަދި އިޝާރާތުން ގާނޫނީ އިންޒާރު ދިނުމަށް މަސައްކަތް ކުރި ކަމަށް ފުލުހުންގެ ފަރާތުން އެކަމުގައި އުޅުނު އޮފިސަރު ބުނެފައިވާއިރު، "ކޮންމެވެސް ގޮތަކުން އިޝާރާތުން ގާނޫނީ އިންޒާރު ދިނުމުން" އެ ފުދުނީތޯ ޝަރީއަތުން ވަނީ ސުވާލު އުފައްދާފައެވެ. އަދި ފުލުހުން ގާނޫނީ އިންޒާރު ދީފައިވަނީ ސައްހަ އިޖުރާއަތަކަށް ކަމަށް ނުބެލެވޭކަމަށް ހުކުމުގައި ފާހަގަކޮށްފައިވެއެވެ.
އެގޮތަށް ކޮންމެވެސް ބަހަކުން، ކޮންމެވެސް ގޮތަކަށް ގާނޫނީ އިންޒާރު ދެވުމުން ފުދޭނަމަ، ހައްޔަރު ކުރެވޭ މީހާއަށް އެ ގާނޫނީ އިންޒާރުގައި ވާ އެއްޗެއް ކޮންމެހެން އެނގުން އަދި ފަހުމުވުން މުހިއްމެއް ނުވާނެ، ޝަރީއަތަށް ގަބޫލު ކުރެވޭ ގޮތުގައި ގާނޫނީ އިންޒާރު ދިންކަމަށްވާނީ ހައްޔަރު ކުރެވޭ މީހާއަށް ދޭހަވާފަދަ ބަހަކުން ގާނޫނީ އިންޒާރުގައި ހިމެނޭ ހއްގުތަކާއި ފުރުސަތުތައް ހައްޔަރު ކުރެވޭ ފަރާތަށް އެނގޭ ގޮތަށް ގާނޫނީ އިންޒާރު ދިނުމުން،ކްރިމިނަލް ކޯޓުގެ ހުކުމް
މި މައްސަލައިގައި ފެނިފައިވާ މަސްތުވާތަކެތީގެ އަސްލު ވެރިފަރާތް ހޯދުމަށް ފުލުހުން މަސައްކަތް ކޮށްފައިނުވާކަމަށްވެސް ދިފާއުން ފާހަގަ ކުރެއެވެ. އެގޮތުން މަސްތުވާތަކެއްޗާބެހޭ ގާނޫނުގައި ބަޔާންކުރަފަދަ "ކޮންޓްރޯލް ޑެލިވަރީ އޮޮޕަރޭޝަނެއް" މި މައްސަލައިގައި ހިންގުމަކީ އެންމެ ރަނގަޅު ގޮތްކަމަށް ޝަރީއަތަށްވެސް ގަބޫލު ކުރެވުނު ނަމަވެސް، އެއީ މައްސަލަތަކުގައި ފުލުހުންނަށް ލިބިގެންވާ އިޚުތިޔާރެއްކަން ޝަރީއަތުންވެސް ފާހަގަ ކުރެއެވެ. އަދި އެ އިޚުތިޔާރު ބޭނުން ނުކުރުމަށް ނިންމި ނިންމުމުގައި ނުނިޔަތެއް އޮތްކަމަށް ފާހަގަނުވާކަަމަށް ހުކުމުގައި ވަނީ ބުނެފައެވެ.
އޭގެ އިތުރުން، މައްސަލައިގައި ސީން އޮފް ކްރައިމް ރިޕޯޓެއް ތައްޔާރު ކޮށްފައި ނެތުމާއި، ބިދޭސީއަކު ހައްޔަރު ކުރުމަށް ތަރުޖަމާނަކާ ނުލައި ދިއުމަކީވެސް މި މައްސަލައިގެ ތަހުގީގު ފުރިހަމަ ނޫންކަމަށް ބުނެ ދިފާއުން ހުށައަޅާފައިވާ ނުކުތާތަކެވެ.
މި މައްސަލައިގައި ދެފަރާތުން ފާހަގަކުރި ނުކުތާތަކާއި، މައްސަލައިގައި ކަން ހިނގާފައިވާ ގޮތަށް ބަލާއިރު، މިއީ ޝައްކެއް ނެތް މިންވަރަށް ޝަރީއަތަށް ސާބިތުނުވާ މައްސަލައެއްކަމަށް ބުދަ ދުވަހު ކްރިމިނަލް ކޯޓުން ކުރި ހުކުމުގައި ބުނެފައިވެއެވެ.
ކްރިމިނަލް ކޯޓުގައި މި މައްސަލައިގެ ނިޔާ ކަނޑައެޅުއްވީ ގާޒީ އާދަމް މުހައްމަދެވެ.
