އަމިއްލަ ނަފްސަށް އަޅާލާނީ ކިހިނެއް؟
8 ޖެނުއަރީ 2022 | ހޮނިހިރު 11:46އުފާވެރި ހަޔާތަކަށް އަދި ދުޅަހެޔޮ ސިއްހަތެއްގައި ތިމާ ހުރުމަށް އަމިއްލަ ނަފްސަށް އަޅާލުމަކީ ވަރަށް މުހިންމު ކަމެއް
ސެލްފް ކެއަރ
މީހަކު ކަމަކާ ދެރަވެ ހިތާމަކުރާނަމަ ނުވަތަ ކަމަކުން އަރައިގަތުމަށްޓަކައި މަސައްކަތް ކުރާއިރު ވަރަށް ގިނައިން މީހުން ބުނެ އުޅޭ އެއް ވާހަކަ އޮވެއެވެ. އަމިއްލައަށް ނަފްސަށް އަޅާލުމަށެވެ. އަމިއްލަށް ނަފްސަށްޓަކައި ކަންތައްތަކެއް ކުރަންޖެހޭނެ ވާހަކައެވެ. އެހެންނަަމަވެސް ގިނަ ފަހަރަށް އެކަންތައްތައް އެގޮތަށް ކުރާނީ ކިހިނެއް ކަމެއް މީހުންނަކަށް ނޭނގެއެވެ.
އަމިއްލަ ނަފްސަށް އަޅާލުމަކީ ތިމާގެ ނަފްސާނީ އަދި ޖިސްމާނީ ދުޅަހެޔޮކަން ކުރިއަރުވައި ދެމެހެއްޓުމަށްޓަކައި ތިމާ އަމިއްލައަށް ކުރާ ކަންކަމެވެ. އުފާވެރި ހަޔާތަކަށް އަދި ދުޅަހެޔޮ ސިއްހަތެއްގައި ތިމާ ހުރުމަށް އަމިއްލަ ނަފްސަށް އަޅާލުމަކީ ވަރަށް މުހިންމު ކަމެކެވެ. އަމިއްލަ ނަފްސަށް އަޅާލުމުގެ ސަބަބުން ޖިސްމާނީ އަދި ނަފްސާނީ ބަލިތަކުންނާއި ދިރިއުޅުމުގައި ދިމާވާ އެކިއެކި ކަންކަމުން ކުރިމަތި ކުރުވާ ނުތަނަވަސްކަމާއި ހާސްކަމުން ތިމާ ދުރުކޮށްދިނުމަށް އެހީތެރިވެދެއެވެ. އެގޮތުން ކަންކަމާ ކުރިމަތިލުމުގެ ހިތްވަރު ލިބި، ތިމާ އަމިއްލަ ނަފްސަށް ކުރާ އިތުބާރު ބޮޑުވެގެންދެއެވެ. އަދި މިކަމުގެ ސަބަބުން ގާތްތިމާގެ މީހުންނާއި ރައްޓެހިންނާމެދު އޮންނަ ގުޅުމަށްވެސް މަގުފަހި ވެގެންދެއެވެ. އެހެންކަމުން ކޮންމެ ދުވަހަކުވެސް ކޮންމެވެސް ވަގުތުކޮޅެއް އަމިއްލަ ނަފްސަށްޓަކައި ހުސްކޮށް، ތިމާ ގަޔާވާ ފަދަ ކޮންމެވެސް ކަމެއް ކުރުމަކީ މުހިންމު ކަމެކެވެ.
އަމިއްލަ ނަފްސަށްޓަކައި ކުރެވިދާނެ ބައެއް ކަންތައްތަަކުގެ ތެރޭގައި; ގަވާއިދުން ކަސްރަތުކުރުމާއި, ކުރާހިތްވާ މަސައްކަތެއް ނުވަތަ ހުނަރެއް ދަސްކުރުމާއި، މަޖަލާއެކު އުފެއްދުންތެރި ކަންކަން ކުރުމުގައި ވަގުތު ހޭދަކުރުމާއި، އެހެން މީހުންނަށް އަޅާލުމާއި، އަރާމުކުރުމާއި، އަދި އެކަށީގެންވާ ވަރަށް ނިދުން ހިމެނެއެވެ. މީގެއިތުރުން ދުޅަހެޔޮ ކާނާ ބޭނުންކުރުމާއި، މުޖުތަމައުގައި ތިމާގެ ބައިވެރިވުން އިތުރުކުރުމާއި، ރަލާއި މަސްތުވާތަކެއްޗާ ދުރުހެލިވުމާއި، ދިރިއުޅުމުގެ ކަންކަމުގައި ދުރުވިސްނުން ގެންގުޅުމުގެ އިތުރުން، ކަމެއް ދިމާވެއްޖެނަމަ އެ ކަމެއް ބަލައިގަނެ ކުރިއަށް ދިޔުން ވެސް ހިމެނެއެވެ.
ކަސްރަތު ކުރުމަކީ ސިއްހަތު ރަނގަޅު ފުރިހަމަ ހަށިގަނޑެއް ލިބުމުގެ އިތުރުން މީހާގެ ހާސްވުންތަކާއި އުނދަގޫތަކުން ވިސްނުން ދުރުކޮށްދީ، ނަފްސާނީ ގޮތުން ދުޅަހެޔޮކޮށް ހުރުމަށް ވެސް އެހީތެރިވެދޭނެކަމެކެވެ. އެހެންކަމުން ވަގުތު ހުސްކޮށް، ފެހިކަން ގަދަ މާހައުލެއްގައި ނުވަތަ މޫދާއި ކައިރި ސަރަހައްދަކަށް ގޮސް ކުރާ ހިތްވާ ކަސްރަތެއް ކުރުމުން މީހާގެ ދުވަސް އުޖާލާވެ ހިތްފަސޭހަކަން ލިބިގެންދެއެވެ. ކުރާ ހިތްވާ މަސައްކަތެއް ނުވަތަ ހުނަރެއް ދަސްކުރުމަށްޓަކައި އެ ހުނަރެއް ހޯދަައި، އެ ފަންނުގެ މީހުންނާއި ބައްދަލުވެ އެކުވެރިކަން ބަދަހި ކުރެވިދާނެއެވެ. މަޖަލާއެކު އުފެއްދުންތެރި ކަންކަން ކުރުމުގައި ވަގުތު ހޭދަކުރުމަށްޓަކައި ކުރާ ކަންތައްތަކުން ތިމާގެ ކެރުންތެރިކަން އިތުރުކޮށްދީ އަމިއްލަ ނަފްސާ މެދު ރަނގަޅަށް ވިސްނުމަށް ބާރު ލިބި ހިތްވަރު ލިބިގެންދާނެއެވެ.
މީގެއިތުރުން ހިލޭ އެހީދޭ ޖަމިއްޔާއަކަށް ނުވަތަ އެހެންވެސް ގޮތަކުން މުޖުތަމައަށް ފައިދާވާނެ ކަންކަމުގައި މަސައްކަތްކުރާ މީހުންނާއެކު އެފަދަ މަސައްކަތުގައި ބައިވެރިވެ، އެހީއަށް ބޭނުންވެފައިވާ މީހުންނަށް އެހީވެދިނުމަކީ ވެސް ތިމާގެ ނަފްސަށް ހަމަޖެހުން ލިބޭނެ ކަމެކެވެ. އަމިއްލަށް ނަފްސަށް އެކަށީގެންވާ ވަގުތުދީ ހިތްހަމަޖެހޭ މާހައުލެއްގައި ހަމަޖެހިލައިގެން އަރާމު ކުރުމަށް ވެސް އާދަކުރަންވާނެއެވެ. ރެއާއި ދުވާލު މަދުވެގެން 8 ގަޑިއިރު ނިދަންވާނެއެވެ. އަދި އާދަވެގެން އެއް ވަގުތެއްގައި ނިދާފައި އެއްވަގުތެއްގައި ހޭލުން ވެސް މުހިންމެވެ. ގަޑިން ގަޑިއަށް ރަނގަޅަށް ކާން އާދަކުރަންވާނެއެވެ. ޚާއްސަކޮށް ކޮންމެ ދުވަހަކުވެސް ހެނދުނުގެ ނާސްތާ ރަނގަޅަށް ނެގުމާއި ކޮންމެ އިރަކު ހަށިގަނޑަށް ފައިދާ ހުރި ކާނާގެ ބާވަތްތައް ބޭނުންކޮށް، ގިނައިން ފެން ބޯންވާނެއެވެ.
މުޖުތަމައުގައި އުޅޭ އެކި މީހުންނާ ގުޅުން ބަދަހިކޮށް، ރަހުމަތްތެރިންނާއި އާއިލާ މީހުންނަށް ގުޅައި ހާލު ބަަލައި ރަނގަޅު ގުޅުމެއް ދެމެހެއްޓުމަށް މަސައްކަތް ކުރަންވާނެއެވެ. ރަލާއި މަސްތުވާތަކެއްޗާއި ދުރުހެލިވެ، އެކި މީހުންގެ ވިސްނުމާއި ދެކޭ ގޮތް ތަފާތުވާނެކަން ދެނެހުރެ، އެހެން މީހަކު ދެކެފާނެ ގޮތަކަށް ނުވިސްނައި، ތިމާ ހާސިލު ކުރަން ބޭނުންވާ ކަންކަމަށް ވާސިލު ވުމަށް ވެސް މަސައްކަތް ކުރަންވާނެއެވެ. ދެރަވާ ނުވަތަ ހިތްހަމަނުޖެހޭ ކަމެއް ދިމާވިޔަސް އެކަމެއް ބަދަލުކޮށް އެއީ ނުވާ ކަމަކަށް ހެދުމަށް މަސައްކަތް ކުރުމުގެ ބަދަލުގައި ހިތްވަރާއެކު އެކަމަކާއި ކުރިމަތިލާންވާނެއެވެ.
މިއީ އަމިއްލަ ނަފްސަށް އަޅާލުމަށްޓަކައި ތިމާއަށް ކުރެވިދާނެ ބައެއް ކަންތައްތަކެވެ. އެގޮތުން ކަމެއް ނުކުރެވޭނެ ނުވަތަ ނުވާނެ ކަމަށް ވިސްނުމަށްވުރެން ތިމާއަށް ކުރެވެން އޮތީ ކޮންކަންތައްތަކެއްތޯ ބަލައި އެ ކަންތައްތައް ކުރާނީ ކިހިނެއްތޯ އޮޅުންފިލުވައި އެކަންތައްތައް ކުރުމަށް އިސްކަންދޭށެވެ. މިއީ ތިމާގެ ނަފްސަށްޓަކައި ކުރަން ކޮންމެހެން މުހިންމު ކަންތައްތަކެވެ.
ނޯޓް: މި ލިޔުމަކީ "ނަފްސާނީ ހޭހަން" ފޮތުން ނަގާފައި ލިޔުމެކެވެ.
