ނަފްސާނީ ދުޅަހެޔޮކަމާމެދު މުޖުތަމައާއި ސަރުކާރުން ދެކޭ ގޮތްވެސް ބަދަލުކުރެވިއްޖެ ކަމަށް، ރައީސުމްޖުމްހޫރިއްޔާ އިބްރާހީމް މުހައްމަދު ސާލިހުގެ އަނބިކަނބަލުން ފަޒްނާ އަހުމަދު ވިދާޅުވެއްޖެއެވެ.
އެކަމަނާ އެ ފަދައިން ވިދާޅުވީ ދުނިޔޭގެ ނަފްސާނީ ދުޅަހެޔޮކަމުގެ ދުވަހާ ގުޅުވައިގެން ވިލާކޮލެޖުން އިސްނަގައިގެން ކުރިއަށްގެންދާ "ސައިކޮލޮޖީ ސިމްޕޯޒިޔަމް އެންޑް އެގްޒިބިޝަން"ގެ ދެވަނަ އެގްޒިބިޝަން ފައްޓަވައިދެއްވައި ވާހަކަފުޅުދައްކަވަމުންނެވެ. އެކަމަނާ ވިދާޅުވީ، ނަފްސާނީ ފަރުވާގެ ޚިދުމަތަކީ ލާމަރުކަޒުކޮށް، އަތްފޯރާ އަގުގައި، ފުރިހަމައަށް ދެވޭ ޚިދުމަތަކަށް ވާންޖެހޭކަމަށެވެ. އޭރުން ދުޅަހެޔޮ އުފެއްދުންތެރި މުޖުތަމައެއް ބިނާކުރެވޭނެ ކަމަށް އެކަމަނާ ވިދާޅުވިއެވެ. މުޖުތަމައުގެ އެއްވެސް ފަރުދެއް ބާކީނުކޮށް، ހެލްތު ކެއަރ ނިޒާމުގެތެރެއިން މިޚިދުމަތް މިހާރަށްވުރެ ފުޅާކޮށް ލިބެން ޖެހޭކަމަށް އެކަމަނާ ވިދާޅުވިއެވެ.
ފަޒްނާ ވިދާޅުވީ ޖިސްމާނީ ދުޅަހެޔޮކަމާ އެއްގޮތަށް ނަފްސާނީ ދުޅަހެޔޮކަމަކީވެސް މުހިންމު ކަމެއް ކަމަށް މިއަދު މުޖުތަމައުން ގަބޫލުކުރާ ކަމަށެވެ. އަދި އިންސާނާ ދިރިހުރުމުގައި އޭނާގެ ނަފްސާނީ ހާލަތަކީ މުހިންމު ދައުރެއް އަދާކުރާ ކަމެއް ކަަމަށް އެކަމަނާ ވަނީ ވިދާޅުވެފައެވެ. އެކަމަނާ އިތުރަށް ވިދާޅުވީ، ނަފްސާނީ ދުޅަހެޔޮކަމުގެ ހަގީގަތް އެއީ އިންސާނީ ތަޖުރިބާއެއް ކަމަށެވެ. އަދި އެއީ ޖަޒުބާތުތަކާއި އުއްމީދުތަކާ ގުޅި ލާމެހިފައިވާ ކަމެއްކަމަށް ވިދާޅުވިއެވެ. ހަމައެހެންމެ ނަފްސާނީ ދުޅަހެޔޮކަމަކީ ފަރުދުންނާއި އާއިލާއާއި މުޖުތަމައުގެ ދުޅަހެޔޮކަމަށް އެހީވާ ބާރުކަން އެކަމަނާ ވަނީ ފާހަގަކުރައްވާފައެވެ.
ކޮންމެ އަހަރެއްގެ އޮކްޓޫބަރު މަހެއްގެ 10 ވަނަ ދުވަސް ފާހަގަކުރަނީ ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ ގޮތުގައެވެ. މި އަހަރު މި ދުވަސް ފާހަގަ ކުރަމުން ދަނީ "މެންޓަލް ހެލްތު އިޒް އަ ޔުނިވަރސަލް ހިއުމަން ރައިޓް" މި ޝިއާރުގެ ދަށުންނެވެ.
