މިކަމަށް އިސްނަގައި ސަރުކާރުން ގިނަ މަސައްކަތްތަކެއް ކޮށްފައިވޭ
ބާރަށު ދާއިރާގެ މެންބަރު އަހުމަދު އަބްދުﷲ
ނަފްސާނި ސިއްހަތުގެ ހިދުމަތް ތައާރަފްކުރެވި ހިދުމަތް ދެމުންދާކަމުގެ ހެއްކަކީ އެކަމަށް ބޭނުންވާ މީހުންގެ ކިއު ބޮޑުތަނުން މަދުވެގެން ދިއުންކަމަށް ބާރަށު ދާއިރާގެ މެންބަރު އަހުމަދު އަބްދުﷲ ވިދާޅުވެއްޖެއެވެ.
ނަފްސާނީ ސިއްހަތުގެ ހިދުމަތް ލިބެން ނެތުމުން މި މައްސަލައަށް ހައްލެއް ހޯދައިދިނުމުގެ ގޮތުން ނަފްސާނީ ސިއްހަތުގެ ހިދުމަތްތައް އެކަށޭނެ ގޮތެއްގައި ލިބޭނެ ނިޒާމެއް ރާއްޖޭގައި ގާއިމްކުރުމަށް ސަރުކާރަށް ގޮވާލާ މަޖިލީހަށް ހުށަހަޅާފައިވާ ގަރާރަށް ބަހުސްކުރައްވަމުން މެންބަރު އަހުމަދު އަބްދުﷲ ވިދާޅުވީ ސިއްހީ ނިޒާމަށް ގެންނަމުންދާ ހެޔޮ ބަދަލުތަކުގެ ތެރޭގައި، ނަފްސާނި ސިްހަތާއި ބެހޭ ހިދުމަތްތައް ތައާރަފްކުރެވި އެ ހިދުމަތްތައް ރާއްޖޭގެ ރައްޔިތުންނަށް ދިނުމަށްޓަކައި ގިނަ ގުނަ މަސައްކަތްތަކެއް ކުރަމުންދާކަމަށެވެ.
އޭގެ ހެއްކެއްގެ ގޮތުގައި މީގެ ކުރިން މިފަދަ ހިދުމަތްތަކަށް އެދި އެޕޮއިންޓްމަންޓް ހަދާފައި ކިއުގައި ތިބި މީހުންގެ އަދަދު ބޮޑުތަނުން މަދުކުރެވި، އަދި ފަރުވާ ބޭނުންވާ ފަރާތްތަކަށް އެކަން ފޯރުކޮށްދިނުމަށްޓަކައި ގިނަ މަސައްކަތްތަކެއް ކުރެވެމުން ދިއުން ކަމަށް މެންބަރު ވިދާޅުވިއެވެ.
މެންބަރު ވިދާޅުވީ ކަންކަން ރަނގަޅުކުރުމަށް އެދޭ އެދުމުގެ ތެރެއިން، މިފަދަ ހުރިހާ ކަމަކީ ވެސް އެއްދުވަހުން އަނެއް ދުވަހަށް ރަނގަޅުކޮށް އަދި އެ ހިދުމަތްތަކުގެ ފެންވަރު ރަނގަޅުކޮށް ރައްޔިތުންނަށް އެ ހިދުމަތްތައް އަވަހަށް ލިބޭނެގޮތް ހެދުމަކީ މުހިންމު ކަމެއް ކަމަށެވެ.
މެންބަރު ވިދާޅުވީ ގަރާރުގައި ވިދާޅުވެފައިވާ ފަދައިން، އެ މަސައްކަތް ކުރެވެމުންދާ ކަމަށާއި، އަދި އެކަން އިތުރަށް ފުރިހަމަކުރުމަށްޓަކައި ބޭނުންވާ ވަސީލަތްތަކާއި އަދި އެކިއެކި ކަންކަން ގާއިމްކުރުމުގެ މަސައްކަތް ކުރެވެމުންދާ ކަމަށެވެ. މެންބަރު ވިދާޅުވީ މި ހިދުމަތް އިތުރަށް ފުޅާކޮށް ދެވެން ޖެހޭ ކަމަށާއި ތަރައްގީ ވެސް ކުރެވެން ޖެހޭ ކަމަށެވެ.
