ނަފްސާނީ ދުޅަހެޔޮކަމަށް އިސްކަންދީގެން އެ ހިދުމަތް ފުޅާކުރަން ފެށީ މި ސަރުކާރުން - މެންބަރު ޣަފޫރު

ނަފްސާނީ ދުޅަހެޔޮކަމަށް އިސްކަންދީގެން އެ ހިދުމަތް ފުޅާކުރަން ފެށީ މި ސަރުކާރުން ކަމަށް ހަނިމާދޫ ދާއިރާގެ މެންބަރު ޢަބްދުލް ޣަފޫރު ވިދާޅުވެއްޖެއެވެ.

ނަފްސާނީ ސިއްހަތުގެ ހިދުމަތް ލިބެން ނެތުމުން މި މައްސަލައަށް ހައްލެއް ހޯދައިދިނުމުގެ ގޮތުން ނަފްސާނީ ސިއްހަތުގެ ހިދުމަތްތައް އެކަށޭނަ ގޮތެއްގައި ލިބޭނެ ނިޒާމެއް ރާއްޖޭގައި ގާއިމްކުރުމަށް ސަރުކާރަށް ގޮވާލާ މަޖިލީހަށް ހުށަހަޅާފައިވާ ގަރާރަށް ބަހުސްކުރައްވަމުން މެންބަރު ޣަފޫރު ވިދާޅުވީ ރައީސް އިބްރާހިމް މުހައްމަދު ޞާލިހުގެ ސަރުކާރު ވެރިކަމަށް އައި އިރުގައި އެހެން ސަރުކާރަކުން ނަފްސާނީ ސިއްހަތަށް މާބޮޑު އަޅާލުމެއް ދީފައި ނުވާ ކަމަށެވެ.

އެހެންނަމަވެސް ހުޅުމަލޭ ހޮސްޕިޓަލާއި އައިޖީއެމްއެޗްގައި މިކަމަށް ޔުނިޓްތައް ގާއިމްކުރެވިގެން ފަރުވާއަށް އިސްކަމެއްދެއްވައިގެން މަސައްކަތް ކުރަމުން ގެންދަވާ ކަމަށެވެ. މެންބަރު ޣަފޫރު ވިދާޅުވީ މިއަހަރުގެ ބަޖެޓުގައި ވެސް ރާއްޖޭގެ 5 ސަރަހައްދެއްގައި ފަރުވާ ދިނުމަށްޓަކައި ގާއިމްކުރަންޖެހޭ ސެންޓަރުތައް ގާއިމްކުރުމަށް ފައިސާ ހަމަޖައްސާފައިވާ ކަމަށެވެ.

ޣަފޫރު ވިދާޅުވީ ނަފްސާނީ ބަލިމަޑުކަމަކީ ކަމެއްގެ ގޮތުގައި ދެކިގެން އެ މަސައްކަތް ފަށާފައިވަނީ މި ސަރުކާރުން ކަމަށެވެ. އެ މަސައްކަތަށް ކުރަންޖެހޭ ހޭދަ ކެނޑިނޭޅި ސަރުކާރުން ކުރަމުން އަންނަ ކަމަށް މެންބަރު ޣަފޫރު ވިދާޅުވިއެވެ.

އަދި ކޮވިޑްގެ ހާލަތުން އަރައިގަނެ މަސައްކަތް ފެށުނުތާ އަހަރު ދުވަސް ނުވާ ކަމަށާއި، ކުރިއަށް އޮތްތަނުގައި ނަފްސާނީ ބަލިތަކާ ބެހޭގޮތުން ގާއިމްކުރަން ޖެހޭ މަރުކަޒުތައް ގާއިމްކުރެވި، އެކަމާއި ބެހޭ ތަޖްރިބާ ހުރި މީހުން ހޯދާ ފަރުވާ އިތުރުކުރެވިގެންދާނެ ކަމަށް ވެސް ވިދާޅުވި އެވެ.

މެންބަރު ޣަފޫރު ވިދާޅުވީ ނަފްސާނި ބަލީގެ މައްސަލައިގެ ގަރާރު ހުށަހެޅުއްވި ޕާޓީއަކީ މަޖިލީހުގެ މިދިޔަ 4 އަހަރު ދުވަހު އޮތް ޕާޓީއެއް ކަމަށެވެ. ނަމަވެސް އެއިން ބޭފުޅަކަށް މިއިންކަމެއް އެދުވަހު ހިތަށް ނާރާ އިންތިހާބެއް ބޯމަތިވެފައި އޮއްވާ މިފަދަ މައްސަލައެއް ހިތަން އެރުން އެއީ ރައްޔިތުން ފުންކޮށް ވިސްނަންޖެހޭނެ ކަމެއް ކަމަށެވެ.