ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިނާ އެއްގޮތަށް ނައިޓް މާކެޓް ކުރިއަށްގެންދިއުމުގެ ހުއްދަ ދޭން ނިންމި ނަމަވެސް ޗްޕީއޭގެ ގައިޑްލައިނާ އެއްގޮތަށް ނައިޓް މާކެޓް ކުރިއަށް ނުދާތީ ބަންދުކުރުމަށް އަންގައިފިއެވެ.

އެޗްޕީއޭއިން ބުނީ ކޮވިޑްގެ ހާލަތު މާލެ ސަރަހައްދުގައި ގޯސްވަމުންދާތީ މަގުމަތީ ބާޒާރުތަކާއި، ގިނަ މީހުން އެއްވާ އިވެންޓްތަކާއި ހަފްލާތައް ނުބޭއްވުމަށް، 5 ޖެނުއަރީ 2022 ގައި މާލެ ސިޓީ ކައުންސިލަށް އެ އޭޖެންސީން އެންގި ކަމަށެވެ. އެހެންނަމަވެސް 6 ޖެނުއަރީން ފެށިގެން ނައިޓް މާރކެޓް ހިންގުމަށް ހަވާލުކޮށްފައިވާ ފަރާތުން އެކަމަށް ތައްޔާރުވުމަށް ވަރަށް ގިނަ ޚަރަދުތަކެއް ކޮށްފައިވާތީ، ފިހާރަތައް ހިންގަން އެ އޭޖެންސީން ކަނޑައަޅާފައިވާ އުސޫލާ އެއްގޮތަށް، ވިޔަފާރި ކުރުމަށް ކަނޑައަޅާ ތަންތަން ދުރު ދުރުގައި ހުންނަގޮތަށް އަދި މީހުން ތޮއްނުޖެހޭނެހެން ކުރިއަށް ގެންދިއުމަށް 6 ޖެނުއަރީ 2022 ގައި ހުއްދަ ދިން ކަމަށެވެ.

އެހެންނަމަވެސް 7 ޖެނުއަރީ ދުވަހު އެޗްޕީއޭއިން ކުރި އިންސްޕެކްޝަންގައި ރަސްފަންނުގައި އެކަން ކުރިއަށްދަނީ މަގުމަތީ ބާޒާރެއްގޮތަށް، މީހުން ތޮއްޖެހިގެން ގައިދުރުކުރުމާއި މާސްކް އެޅުމަށް ސަމާލުކަންނުދީ ކަމަށް ފާހަގަވެފައިވާތީ، އެ ބާޒާރު ކުރިއަށް ނުގެންދިއުމަށް ސިޓީ ކައުންސިލަށް އަންގާފައިވާ ކަމަށް އެ އެޖެންސީން ބުންޏެވެ.