އެޗްޕީއޭގެ އެންގުމާއެކު ނައިޓް މާކެޓް ބޭއްވުން ވަގުތީ ގޮތުން ހުއްޓުވައިފި
6 ޖެނުއަރީ 2022 | ބުރާސްފަތި 07:04މިފަދަ ހަރަކާތްތައް ކުރިއަށް ގެންދިއުމަށް ހުއްދަ ދިނުންވެސް ވަނީ މަޑުޖައްސާލާފައި
ނައިޓް މާކެޓް، ގިނަ ބަޔަކު އެތަނަށް ވިޔަފާރި ކުރުމަށް ދޭ،
މާލެ ސިޓީގައި ކުރިއަށް ގެންދާ ނައިޓް މާކެޓް ބޭއްވުން ހުއްޓާލުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން މާލެ ސިޓީ ކައުންސިލަށް އަންގައިފިއެވެ.
ސިޓީ ކައުންސިލުން ބުނީ މާލެ ސިޓީގައި ކުރިއަށް ގެންދާ ނައިޓް މާކެޓް ބޭއްވުން ހުއްޓާލުމަށް ޖެނުއަރީ 5 ވީ ބުދަ ދުވަހު އެޗްޕީއޭއިން އިން އެންގުމާއި ގުޅިގެން މާލެ ސިޓީގައި ކުރިއަށްދާ ނައިޓް މާކެޓާއި އަދި މިފަދަ އިވެންޓްތައް ބޭއްވުން ވަގުތީގޮތުން ހުއްޓާލާފައިވާ ކަމަށެވެ.
ސިޓީ ކައުންސިލްގެ 04 ވަނަ ދައުރުގެ 22 ވަނަ ރަސްމީ އާންމު ޖަލްސާއިން ވަނީ މާލެ ސިޓީގައި ނައިޓް މާރކެޓް ބޭއްވުމަށް އެދި ހުށަހަޅާ ފަރާތްތަކަށް މާލެ އަދި ހުޅުމާލޭގެ އެކަމަށް ކަނޑައެޅިފައިވާ ސަރަހައްދުތަކުގައި ބޭއްވުމަށް ހުއްދަ ދިނުމަށް ނިންމާފައެވެ. މި ހުއްދައިގެ ދަށުން ގިނަ ބަޔަކު މިކަމަށް އެދި، ހުއްދަ ހޯދައި ބޮޑެތި ހޭދަތަކެއް ކޮށްގެން ނައިޓް މާކެޓް ބާއްވަމުން އަންނަ ކަމަށް ބުނެފައިވެއެވެ.
ނަމަވެސް އެޗްޕީއޭއިން ނައިޓް މާކެޓް ބޭއްވުން ހުއްޓާލުމަށް އަންގާފައިވާތީ މާލެ ސިޓީގައި ނައިޓް މާރކެޓް ފަދަ އިވެންޓްތައް ބޭއްވުން ވަގުތީގޮތުން ހުއްޓާލުމަށް މިހާރު ވަނީ ނިންމާފައެވެ. އަދި މިވަގުތަށް މިފަދަ ހަރަކާތްތައް ކުރިއަށް ގެންދިއުމަށް ހުއްދަ ދިނުން ވެސް މަޑު ޖައްސާލާފައިވާ ކަމަށް ކައުންސިލުން ބުނެއެވެ.
ނައިޓް މާކެޓް ފަދަ އިވެންޓްތައް ބޭއްވުން ވަގުތީގޮތުން ހުއްޓާލާފައިވާއިރު، މި ހަރަކާތް ކުރިއަށް ގެންދިއުމަށް ހުއްދަ ދިނުމާއި ގުޅިގެން ވެސް ސިއްހީ މާހިރުން ކަންބޮޑުވުންފާޅު ކޮށްފައިވެއެވެ.
ކޮވިޑް-19ގެ ނުރައްކާތެރި ހާލަތަށް މުޅި ގައުމު ތައްޔާރުވަމުންދާ ދަނޑިވަޅެއްގައި ނައިޓް މާކެޓް ބޭއްވުމަކީ ގަބޫލުކުރެވޭނެ ކަމެއް ނޫން ކަމަށް އައިޖީއެމްއެޗްގެ ސީއީއޯ އިބްރާހިމް ސަލީމް ވެސް ވިދާޅުވެފައިވެއެވެ. މާކެޓްތަކަށް ގިނަ ބަޔަކު އެއްވާ ކަމަށާއި، އެއްވެސް ވަރަކަށް ގައިދުރު ކަމެއް ނެތް ކަމަށް އޭނާ ވިދާޅުވިއެވެ. އަދި ވިދާޅުވީ އެސަރަހައްދު މޮނިޓަރ ނުކުރާ ކަމަށާއި، އުސޫލާއި ގައިޑްލައިންއަށް އަމަލުނުކުރާ ކަމަށެވެ. ސިއްހީ މާހިރުންނާއި ހަވާލާ ދެއްވާ ރައީސް އިބްރާހިމް މުހައްމަދު ސޯލިހު ވެސް ވިދާޅުވީ ކުރިއަށް މިއޮތް ތިން ހަފްތާއަކީ، އަނެއްކާވެސް ރާއްޖޭގައި ވަރަށް ބޮޑަށް ކޮވިޑް ފެތުރިގެންދިޔުމުގެ ފުރުސަތު އޮތް ތިން ހަފްތާ ކަމަށެވެ.
ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން 28 ޑިސެންބަރު 2021ން ފެށިގެން ކޭސްތައް ރިޕޯޓު ކުރެވޭ މިންވަރު ދަނީ އިތުރުވަމުންނެވެ. އަދި ދުވަސްތަކެއް ފަހުން 5 ޖެނުއަރީ 2022 ގައި މާލެ ސަރަހައްދުން 100ށް ވުރެ ގިނަ ކޭސްތައް ރިޕޯޓު ކުރެވުނެވެ.
