އެޗްޕީއޭގެ ގައިޑްލައިނާ އެއްގޮތަށް ނައިޓް މާކެޓް ބޭއްވުމުގެ ހުއްދަ ދޭން ނިންމައިފި
7 ޖެނުއަރީ 2022 | ހުކުރު 03:46ނައިޓް މާކެޓް ކުރިއަށްގެންދިއުން އެޗްޕީއޭއިން ވަނީ ހުއްޓުވާފައި
ރަސްފަންނު ސަރަހައްދުގައި ބޭއްވި ނައިޓް މާކެޓެއްގެ ތެރެއިން
އެޗްޕީއޭގެ ގައިޑްލައިންއާ އެއްގޮތަށް ނައިޓް މާކެޓް ކުރިއަށްގެންދިއުމުގެ ހުއްދަ ދޭން ނިންމައިފިއެވެ.
މާލެ ސަރަހައްދުގެ ކޮވިޑް ކޭސްތައް އިތުރުވާން ފެށުމާއެކު މިދިޔަ ޑިސެމްބަރު މަހުގެ 26 ވަނަ ދުވަހުން ފެށިގެން މާލޭ ރަސްފަންނު ސަރަހައްދުގައި ކުރިއަށްގެންދިޔަ ނައިޓް މާކެޓް އެޗްޕީއޭއިން ވަނީ ހުއްޓުވާފައެވެ. މިއާއެކު ނައިޓް މާކެޓްގައި ބައިވެރިވި ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.
މިކަމާއި ގުޅިގެން މާލެ ސިޓީ ކައުންސިލުން ބުނީ ނައިޓް މާކެޓް ބޭއްވުމަށް ހުޅުވާލުމުން ގިނަ ބަޔަކު މިކަމަށް ބޮޑު ހޭދައެއް ކޮށް، ނައިޓް މާކެޓްގައި ބައިވެރިވެވަފައިވާކަމަށެވެ.
މިކަން އެޗްޕީއޭއިން ހުއްޓުވިނަމަވެސް ގިނަ ބައެއްގެ އެދުމުގެ މަތިން އާންމު ފިހާރަތަކުގައި ވިޔަފާރިކުރާ އުސޫލުން ނައިޓް މާކެޓް ބޭއްވުމުގެ ހުއްދަ އެފަރާތްތަކަށް ދިނުމަށް އެޗްޕީއޭއިން ނިންމާފައިވާކަމަށް މާލެ ސިޓީ ކައުންސިލުން ބުނެފައިވެއެވެ. އެއީ އެޗްޕީއޭގެ ގައިޑްލައިންތަކާ އެއްގޮތަށެވެ.
މާލެ ސިޓީ ކައުންސިލުން ބުނީ އާންމު ފިހާރަތަކުގައި ވިޔަފާރިކުރާ އުސޫލުން ނައިޓް މާކެޓް ހިންގުމުގެ ހުއްދަ ދެވޭނީ އެޗްޕީއޭއިން ކަނޑައަޅާފައިވާ މިންގަނޑާ އެއްގޮތަށް ނައިޓް މާކެޓް ބާއްވަން އެއްބަސްވާ ފަރާތްތަކަށް އެކަނި ކަމަށެވެ.
ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން 28 ޑިސެންބަރު 2021ން ފެށިގެން ކޭސްތައް ރިޕޯޓު ކުރެވޭ މިންވަރު ދަނީ އިތުރުވަމުންނެވެ. އަދި ދުވަސްތަކެއް ފަހުން 5 ޖެނުއަރީ 2022 ގައި މާލެ ސަރަހައްދުން 100ށް ވުރެ ގިނަ ކޭސްތައް ރިޕޯޓު ކުރެވުނެވެ.
