ރާއްޖޭގައި ބުރާސްފަތި ދުވަހު ކޮވިޑް-19 ޖެހުނު މީހުންގެ އަދަދު 300ށްވުރެ މައްޗަށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު, ބުރާސްފަތި ދުވަހު ރާއްޖެއިން ޖުމްލަ 304 މީހުން ވަނީ ކޮވިޑަށް ޕޮޒިޓިވްވެފައެވެ. އޭގެތެރޭގައި މާލެ ސަރަހައްދުން ވަނީ 136 މީހުން ޕޮޒިޓިވްވެފައެވެ. އަތޮޅުތަކުން 78 މީހުން ޕޮޒިޓިވްވިއިރު ހިންގަމުންދާ ރިސޯޓްތަކުން 83 މީހުން ވަނީ ޕޮޒިޓިވްވެފައެވެ. މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 97،050ށް އަރާފައެވެ. 93،865 މީހުން ބަލިން ފަސޭހަވެފައިވާއިރު މިވަގުތު 2،908 ކޭހެއް އެކްޓިވް ކޭހުގެ ގޮތުގައި އަންނަނީ ގުނަމުންނެވެ. އަދި 13 މީހަކަށް ހޮސްޕިޓަލްތަކުގައި އެޑްމިޓްކޮށްގެން އަންނަނީ ފަރުވާދެމުންނެވެ.
މިހާތަނަށް 264 މީހުން ވަނީ މިބަލީގައި ނިޔާވެފައެވެ.
ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން ފާއިތުވި ހަފުތާގެ ތެރޭގައި ކޭސްތައް ފެންނަމުންދިޔަ މިންވަރު ވަނީ އިތުރުވާން ފަށާފައެވެ. ކޮވިޑްގެ ކޭސްތައް އިތުރުވުމާ ގުޅިގެން އެޗްޕީއޭއިން ވަނީ ބޮޑެތި އެއްވުންތައް ނުބޭއްވުމަށް އިލްތިމާސްކޮށްފައެވެ. އަދި ރަސްފަންނުގައި ކުރިއަށްގެންދިޔަ ނައިޓްމާކެޓުވެސް މިހާރު ވަނީ ހުއްޓުވާފައެވެ.
