ވެކްސިން ނުޖަހާތީ ޖޮކޮވިޗަށް އޮސްޓްރޭލިއަން އޯޕަން ގެއްލިއްޖެ

މި މަހު ފަހުކޮޅު ބާއްވާ އޮސްޓްރޭލިއަން އޯޕަން ޓެނިސް މުބާރާތުގައި ހާއްސަ މެޑިކަލް ހުއްދައަކާއެކު ބައިވެރިވުމުގެ ފުރުސަތު ދީފައިވަނިކޮށް އޭނާގެ ވިސާ ކެންސަލްކޮށް އަނބުރާ ގައުމަށް ފޮނުވާލަން އޮސްޓްރޭލިއާއިން ނިންމައިފިއެވެ.

އޮސްޓްރޭލިއަން އޯޕަންގެ ސިއްހީ ގައިޑްލައިންތަކުގައި އޮތް ގޮތުން މުބާރާތުގައި އުޅޭ ހުރިހާ ކުޅުންތެރިންނާ އޮފިޝަލުން ކޮވިޑް ވެކްސިން ފުރިހަމަކޮށްފައިވާކަން މުބާރާތް އިންތިޒާމްކުރާ ފަރާތްތަކަށް ކަށަވަރުކޮށްދޭން ޖެހެއެވެ. އަދި ކޮވިޑްގެ ވެކްސިން ނުޖަހާނަމަ މުބާރާތުގައި ބައިވެރިވެވޭނީ ވެކްސިން ނުޖަހަނީ ބަލި ހާލަތެއްގެ ސަބަބުން ޑޮކްޓަރުގެ ލަފާގެ މަތިން ކަމަށް ސާބިތުކޮށްދޭ "މެޑިކަލް އެގްޒެމްޕްޝަން" ލިޔެކިޔުން ހުށަހަޅަން ޖެހެއެވެ.

ޖޮކޮވިޗް އޮސްޓްރޭލިއަން އޯޕަންސްގައި ބައިވެރިވީ މެޑިކަލް އެގްޒެމްޕްޝަން ކޯޓާގެ ތެރެއިންނެވެ. ދުވާއީ އިން ފުރައިގެން ޖޮކޮވިޗް ބުދަ ދުވަހު އޮސްޓްރޭލިއަން އޯޕަންގައި ވާދަކުރަން އޮސްޓްރޭލިއާގެ މެލްބަންއަށް ދިޔަ ނަމަވެސް އެއާޕޯޓުގައި އެތައް ގަޑިއިރެއް ވަންދެން މަޑުކުރަން ޖެހުނެވެ.

މިދިޔަ އަހަރު ވެކްސިން ޖެހުމާއި ދެކޮޅަށް ޖޮކޮވިޗް ވާހަކަ ދައްކާފައިވާއިރު، އޭނާ ވަނީ ވެކްސިން ޖެހިކަމުގެ މައުލޫމާތު ދޭން ތަކުރާރުކޮށް ދެކޮޅުހަދާފައެވެ. އެހެންވެ އޮސްޓްރޭލިއާގެ އިމިގްރޭޝަނުން ވަނީ ޖޮކޮވިޗްގެ ވިސާ ކެންސަލްކޮށްފައެވެ.

މިކަމާއި ގުޅިގެން އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ވިދާޅުވީ ވެކްސިން ނުޖަހާނަމަ ޖޮކޮވިޗް ވިޔަސް އަމަލުކުރާނީ އެހެން އެންމެންނާ މެދު ވެސް އަމަލުކުރާ އުސޫލުން ކަމަށެވެ. އަދި ވެކްސިން ނުޖަހާ އޮސްޓްރޭލިއާ އަށް އެތެރެވުމުގެ ފުރުސަތު އެއްވެސް ފަރާތަކަށް ނުދޭނެ ކަމަށް މޮރިސަން ވިދާޅުވިއެވެ.

ސާބިއާގެ މީިޑިއާ ރިޕޯޓްތައް ބުނާގޮތުން ޖޮކޮވިޗް މަސައްކަތް ކުރަމުން އަންނަނީ ގާނޫނީ ގޮތުން އެޕީލްކޮށް، އަލުން ވިސާ އަށް ހުށަހަޅައިގެން މި މަހު 17 އިން 30 އަށް ކުރިއަށްދާ އޮސްޓްރޭލިއަން އޯޕަންގައި ވާދަކުރުމަށެވެ. އެކަމަކު، ވެކްސިން މައުލޫމާތު ނުދީ ޖޮކޮވިޗަށް މުބާރާތުގައި ވާދައެއް ނުކުރެވޭނެކަން މިހާރު ވަނީ ޔަގީންވެފައެވެ.

މިދިޔަ އަހަރު ކޮވިޑަށް ޕޮޒިޓިވްވި އުމުރުން 34 އަހަރުގެ ޖޮކޮވިޗަށް މި ފަހަރުގެ އޮސްޓްރޭލިއަން އޯޕަން ތަށި ހޯދައިފިނަމަ ޖޮކޮވިޗަށް ގްރޭންޑް ސްލޭމް މުބާރާތްތައް ކާމިޔާބު ކުރުުމުގެ ރެކޯޑެއް ގާއިމްކުރެވޭނެ އެވެ.