10 ވަނަ ފްރެންޗް އޯޕަން ތައްޓާއިއެކު ނަޑާލް ތާރީޙުގެ ތެރެއަށް

ސްވިޒަލޭންޑްގެ ސްޓެން ވަވްރިކާ ބަލިކޮށް، ރަފައެލް ނަޑާލް 10 ވަނަ ފަހަރަށް ފްރެންޗް އޯޕަން ޓެނިސް މުބާރާތް ކާމިޔާބުކޮށްފިއެވެ.

މި ކާމިޔާބީ އާއިއެކު އޭނާ ވެގެންގޮސްފައިވަނީ ފްރެންޗް އޯޕަން ޓެނިސް މުބާރާތުގެ އެންމެ ކާމިޔާބު ކުޅުންތެރިޔާއަށެވެ. އެގޮތުން އޭނާއަކީ ޓެނިސް އޯޕަން އީރާ ތާރީހުގައިވެސް ގްރޭންޑް ސްލޭމް މުބާރާތެއް 10 ފަހަރު ކާމިޔާބުކުރި ހަމައެކަނި ކުޅުންތެރިޔާއަށެވެ.

އާދިއްތަ ދުވަހު ކުޅުނު ފައިނަލް މެޗުގެ ސެޓުތަށް ނަޑާލް ގެންގޮސްފައިވަނީ 6-2 ، 6-3 އަދި 6-1 އިންނެވެ. މި މުބާރާތް ނަޑާލް ކާމިޔާބުކޮށްފައި މިވަނީ އެއްވެސް މެޗަކުން އެންމެ ސެޓެއްވެސް ނުގެއްލިއެވެ.

މުބާރާތުގެ ފައިނަލަށް ވަވްރިކާ ދަތުރުކޮށްފައިވަނީ ސެމީގައި ދުނިޔޭގެ އެއްވަނަ ޓެނިސް ކުޅުންތެރިޔާ އޭންޑީ މަރޭ ބަލިކުރުމަށް ފަހުގައެވެ. އަދި މިއީ 2014 ވަނަ އަހަރުގެފަހުން ނަޑާލް ކާމިބުކުރި ފުރަތަމަ ގްރޭންޑް ސްލޭމް މުބާރާތެވެ. އެ އަހަރުވެސް އޭނާ ކާމިޔާބުކޮށްފައިވަނީ ހަމަ މި މުބާރާތެވެ. ނަޑާލްގެ ކެރިއަރުގައި މިހާތަނަށް ފްރެންޗް އޯޕަން މުބާރާތުގައި އޭނާ ކުޅުނު 81 މެޗުގެ ތެރެއިން 79 މެޗް ކާމިޔާބުކޮށްފައެވެ.

ފާއިތު ދެ އަހަރެއްހާ ދުވަހު އަނިޔާގެ ސަބަބުން މާ އެދެވޭ ކުޅުމެއް ނަޑާލްއަށް ދެއްކިފައި ނުވި ނަމަވެސް ފަހަކަށް އައިސް އޭނާ އަންނަނީ އޭނާގެ އަސްލު ފެންވަރު ދައްކަމުންނެވެ. ޙާއްސަކޮށް އޭނާއަކީ ކްލޭކޯޓު މުބާރާތްތަކުގެ އެންމެ ކާމިޔާބު ކުޅުންތެރިޔާއެވެ.