ޖޮކޮވިޗް ބަލިކޮށް ޗެމްޕިއަންކަން މެޑްވެޑޭވަށް

ދުނިޔޭގެ އެއްވަނަ ޓެނިސް ކުޅުންތެރިޔާ ސާބިއާގެ ނޮވަކް ޖޮކޮވިޗް ބަލިކޮށް މި ފަހަރުގެ ޔޫއެސް އޯޕަން ޓެނިސް މުބާރާތުގެ ޗެމްޕިއަންކަން ރޭންކިންގެ ދެވަނައިގައި އޮތް ރަޝިއާގެ ޑެނީލް މެޑްވެޑޭވް ހޯދައިފިއެވެ.

އާދީއްތަ ދުވަހުގެރޭ ކުޅުނު ފައިނަލް މެޗު މެޑްވެޑޭވް ކާމިޔާބުކުރީ ސީދާ ތިން ސެޓުންނެވެ. އޭނާ ސެޓުތައް ކާމިޔާބުކުރީ 6-4، 6-4 އަދި 6-4 އިންނެވެ.

މިއީ އުމުރުން 25 އަހަރުގެ މެޑްވެޑޭވް ކާމިޔާބުކުރި ފުރަތަމަ ގްރޭންޑް ސްލޭމް މުބާރާތެވެ. އެއާއެކު އޭނާ ވެފައިވަނީ ގްރޭންޑް ސްލޭމް މުބާރާތެއް ކާމިޔާބުކުރި ރަޝިއާގެ ތިންވަނަ ކުޅުންތެރިޔާއަށެވެ. މި ފަހަރުގެ ޔޫއެސް އޯޕަންގެ ޗެމްޕިއަންކަން މެޑްވެޑޭވް ހޯދިއިރު، އޭނާ ވަނީ 2019 އަހަރުވެސް މި މުބާރާތުގެ ފައިނަލުގައި ވާދަކޮށްފައެވެ. އެ ފަހަރު މެޑްވެޑޭވް ބަލިވީ ޓެނިސް ލެޖެންޑް ރަފައެލް ނަޑާލް އަތުންނެވެ.

މި އަހަރުގެ ޔޫއެސް އޯޕަންގެ ފައިނަލުން ބަލިވުމާއެކު އުމުރުން 34 އަހަރުގެ ޖޮކޮވިޗަށް ވަނީ ޓެނިހުގެ ބޮޑު ރިކޯޑެއް ހެދުމަށް އިތުރު އިންތިޒާރެއް ކުރަން ޖެހިފައެވެ. މި އަހަރު ޖޮކޮވިޗް ވަނީ ޔޫއެސް އޯޕަން ފިޔަވައި ގްރޭންޑް ސްލޭމުގެ އަނެއް ތިން މުބާރާތް ކާމިޔާބުކޮށްފައެވެ. އެއީ އޮސްޓްރޭލިއަން އޯޕަން އާއި، ފްރެންޗް އޯޕަން އަދި ވިމްބަލްޑަން ޓެނިސް މުބާރާތެވެ.

އެއާއެކު ޖޮކޮވިޗް ވަނީ ޓެނިހުގެ ދެ ލެޖެންޑުން ކަމަށްވާ ސްޕެއިނުގެ ރަފައެލް ނަޑާލާއި ސްވިޓްޒަލެންޑްގެ ރޮޖާ ފެޑެރާގެ ރިކޯޑާ ހަމަކޮށްފައެވެ. އެ ތިން ކުޅުންތެރިންނަށްވެސް މިހާރު ވަނީ 20 ގްރޭންޑް ސްލޭމް ތަށި ލިބިފައެވެ.

އަދި ޔޫއެސް އޯޕަނުގެ ފައިނަލުން ބަލިވުމާއެކު 52 އަހަރު ފަހުން އެއް އަހަރު ތެރޭ ގްރޭންޑް ސްލޭމްގެ ހުރިހާ މުބާރާތެއް ކާމިޔާބުކުރި ކުޅުންތެރިޔާގެ ޝަރަފު ހޯދުމުގެ ފުރުސަތުވެސް ޖޮކޮވިޗަށް ވަނީ ގެއްލިފައެވެ. މީގެ ކުރިން އެއް އަހަރު ތެރޭ ގްރޭންޑް ސްލޭމް ހުރިހާ މުބާރާތެއް ކާމިޔާބުކުރި ކުޅުންތެރިޔަކީ 1969 އަހަރުގެ ހުރިހާ ގްރެންޑް ސްލޭމް މުބާރާތެއް ކާމިޔާބުކުރި އޮސްޓްރޭލިއާގެ ރޮޑް ލާވާއެވެ.