އޮސްޓްރޭލިއަން އޯޕަންގައި ވާދަކުރަން ދުނިޔޭގެ އެއް ނަމްބަރު ފިރިހެން ޓެނިސް ކުޅުންތެރިޔާ ނޮވަކް ޖޮކޮވިޗްގެ ވިސާ ކެންސަލްކޮށްލި މައްސަލައިގައި އޭނާ ކޯޓަށް ހުށަހެޅި މައްސަލަ ކާމިޔާބުކޮށްފިއެވެ.
ކޮވިޑް-19ގެ ވެކްސިން މައުލޫމާތު ނުދޭތީ އޮސްޓްރޭލިއާ އިމިގްރޭޝަނުން ޖޮކޮވިޗްގެ ވިސާ ކެންސަލްކޮށްލި މައްސަލަ އޭނާ ކޯޓުގައި ކުރިއަށް ގެންދިޔައިރު ގިނަ ފިއްތުންތަކާ ކުރިމަތިލާން ޖެހުނެވެ. އެކަމަކު ހޯމަ ދުވަހު ކޯޓުން ނިންމީ އޮސްޓްރޭލިއާގެ އިމިގްރޭޝަނުގެ ޑިޓެންޝަނުގައި ހުރި ޖޮކޮވިޗް ދޫކޮށްލާށެވެ. ކޯޓުން ވަނީ ޑިޓެންޝަނުގައި ޖޮކޮވިޗް ބެހެއްޓިއިރު، އޭނާ އަތުން ދިޔަ ޚަރަދުގެ ބަދަލުދޭން އޮސްޓްރޭލިއާ ސަރުކާރަށް އަންގައިފައެވެ.
މިދިޔަ ހަފްތާގައި ދުބާއީ މަގުން ޖޮކޮވިޗް އޮސްޓްރޭލިއާ އަށް ދަތުރުކުރީ ސައްހަ ވިސާއެއް ހިފައިގެން ކަމަށާއި އެކަމަކު، މެލްބަން އަށް އައުމާއެކު އޭނާގެ ވިސާ ކެންސަލްކޮށްލީ ޖަވާބުދާރީވާން ފުރުސަތު ދޭން ޖެހޭ މަރުހަލާތައް ފުރިހަމަ ނުކޮށް ކަަމަށް ކޯޓުން ވަނީ ކަނޑައަޅައިފައެވެ. އެކަމަކު، ޖޮކޮވިޗަށް އޮސްޓްރޭލިއަން އޯޕަންގައި ކުޅެވޭނެތޯ ގޮތެއް ނިންމޭނީ އޮސްޓްރޭލިއާ އިމިގްރޭޝަނުން ވިސާއާމެދު ކަނޑައަޅާ ގޮތަކުންނެވެ.
މިދިޔަ އަހަރު ވެކްސިން ޖެހުމާއި ދެކޮޅަށް ޖޮކޮވިޗް ވާހަކަ ދައްކާފައިވާއިރު، އޭނާ ވަނީ ވެކްސިން ޖެހިކަމުގެ މައުލޫމާތު ދޭން ތަކުރާރުކޮށް ދެކޮޅުހަދާފައެވެ. އެހެންވެ އޮސްޓްރޭލިއާގެ އިމިގްރޭޝަނުން ވަނީ ޖޮކޮވިޗްގެ ވިސާ ކެންސަލްކޮށްފައެވެ.
އޮސްޓްރޭލިއަން އޯޕަންގެ ސިއްހީ ގައިޑްލައިންތަކުގައި އޮތް ގޮތުން މުބާރާތުގައި ކުޅޭ ހުރިހާ ކުޅުންތެރިންނާއި އޮފިޝަލުން ކޮވިޑް ވެކްސިން ފުރިހަމަ ކޮށްފައިވާކަން މުބާރާތް އިންތިޒާމްކުރާ ފަރާތަށް ކަށަވަރުކޮށްދޭން ޖެހޭނެއެވެ. އަދި ކޮވިޑް ވެކްސިން ނުޖަހާނަމަ މުބާރާތުގައި ބައިވެރިވެވޭނީ ވެކްސިން ނުޖަހަނީ ބަލި ހާލަތެއްގެ ސަަބަބުން ނޫނީ އެހެނިހެން މަގުބޫލު ސަބަބަކާ ހެދިކަން ސާބިތުކޮށްދީގެންނެވެ.
ޖޮކޮވިޗަށް މެޑިކަލް އެގްޒެމްޕްޝަން ދޭން ނިންމީ މިދިޔަ މަހު ކޮވިޑަށް ޕޮޒިޓިވްވެފައިވާ ކަމުގެ ލިޔުންތައް ހުށަހެޅުމުންނެވެ. އެކަމަކު ކޮވިޑްގެ މައްސަލައިގައި ޖޮކޮވިޗަށް އޮސްޓްރޭލިއާ އިމިގްރޭޝަނުން ފިޔަވަޅު އެޅުމުގެ ފުރުސަތު އެބައޮތެވެ.
