ހއ. އުތީމުގެ ޒުވާނުންނަށް އަމާޒުކޮށްގެން ވޮލީބޯޅަ ޓްރެއިނިންގ ކޭމްޕެއް އުތީމުގައި ފަށައިފިއެވެ.

އުތީމުގައި މި ކޭމްޕް ފަށާފައި ވަނީ ޖެނުއަރީ 4 ވީ އަންގަރާދުވަހުއެވެ. 38 ބައިވެރިންނާއެކު ފަށާފައިވާ މި ކޭމްޕްގައި ބައިވެރިވުމުގެ ފުރުސަތު މިހާރުވެސް ވަނީ ހުޅުވާލާފައިއެވެ. މި ކޭމްޕްގައި ބައިވެރިވުމުގެ އެންމެ ފަހުގެ ތާރިޚަކީ ޖެނުއަރީ 7ވާ ހުކުރުދުވަހެވެ.

ހއ އަތޮޅު ފުލުހުންގެ އެހީތެރިކަމާއެކު ކުރިއަށްދާ މި ކޭމްޕަކީ 10ދުވަހުގެ މުއްދަތަށް ކުރިއަށްގެންދެވޭ ކޭމްޕެކެވެ. މިއީ އުތީމުގައި ވޮލީ ކުޅުމުގެ ރޫހު އާލާކޮށް ދިރުވުމުގެ އިތުރުން، އަތޮޅު މުބާރާތްތަކުގައި އުތީމުގެ ޓީމްތަކަށް ބައިވެރިވުމުގެ ފުރުސަތު ފަހިކޮށްދިނުމުގެ މަގުސަދުގައި ހިންގޭ ޕްރޮގްރާމެކެވެ.

މި ކޭމްޕްގެ ޓްރެއިނަރުންގެ ގޮތުގައި ހަރަކާތްތެރިވަނީ ހއ އަތޮޅުގެ، ވޮލީ ކުޅުމުގެ ދާއިރާގައި ތަޖުރިބާކާރު ބޭފުޅުންނެވެ.