އުތީމުގެ ތަރައްގީ އާ އުސްމިންތަކަށް ގެންދިއުމުގައި މި ސަރުކާރުގެ ބައިވެރިވުން ވަރަށް ބޮޑުކަމަށް އުތީމު ކައުންސިލުން ބުނެފިއެވެ.
ކައުންސިލުން މިހެން ބުނެފައިވަނީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބޮޑުތިލަދުންމައްޗަށް ކުރައްވަމުން ގެންދަވާ ދަތުރުފުޅުގެ ތެރެއިން، އަންގާރަ ދުވަހު އުތީމަށް ވަޑައިގެން އެރަށު ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންނާއެކު ބޭއްވި ބައްދަލުކުރެއްވުމުގައެވެ. ރައީސުލްޖުމްހޫރިއްޔާ ވަނީ، އެރަށުގެ ތަރައްގީއަށް ކުރެވޭ މަސައްކަތްތަކާއި ރައްޔިތުންނަށް ބޭނުންޖެހިފައިވާ ކަންކަމާ ގުޅޭގޮތުން މި ބައްދަލުވުމުގައި ޚިޔާލު ބަދަލުކުރައްވައި މަޝްވަރާކުރައްވާފައެވެ. މި ބައްދަލުކުރެއްވުން އޮތީ އުތީމު ކައުންސިލް އިދާރާގައެވެ.
މިބައްދަލުކުރެއްވުމުގައި އުތީމު ކައުންސިލުން ބުނެފައިވަނީ، އުތީމުގެ ތަރައްގީ އާ އުސްމިންތަކަށް ގެންދިޔުމުގައި މި ސަރުކާރުން ހިންގަމުންދާ މަޝްރޫއުތަކުގެ ތެރެއިން، ރަށުގައި ނަރުދަމާ ގާއިމްކުރެވިފައިވާ ކަމަށެވެ. އަދި މިހާރު ފެނުގެ މަޝްރޫއު ވަރަށް ބާރަށް ހިނގަމުންދާކަން ކައުންސިލުން ފާހަގަކުރިއެވެ.
ކައުސިލުން ފާހަގަކުރި ކަންބޮޑުވުންތަކުގެ ތެރޭގައި، ކައުންސިލް އިދާރާގެ ޖާގައިގެ ދަތިކަމާއި، ބަނދަރުގެ ދަތިކަމާއި، ބަނދަރު މަރާމާތުކުރަންޖެހިފައި އޮތުމާއި، ކުނީގެ މައްސަލަ ހައްލުކުރުމުގައި ދިމާވާ ބަޖެޓުގެ ދަތިކަން ވަނީ ފާހަގަކޮށްފައެވެ. އަދި، ރަށުގެ މަގުތައް ޒަމާނީ ފެންވަރަށް ހެދުމަށް ރައްޔިތުން ބޭނުންވާކަމާއި، އިޖުތިމާއީ މަރުކަޒެއް ބިނާކުރުމަށް ބޭނުންވާކަންވެސް ކައުންސިލުން ފާހަގަކުރިއެވެ. މީގެ އިތުރުން، އުތީމު ގަނޑުވަރު މައިދާން، ޣާޒީ ބަންޑާރައިން މައިދާނުގެ ގޮތުގައި ތަރައްގީކުރުމަށް ބޭނުންވާކަންވެސް ކައުންސިލުން ވަނީ ހާމަކުރައްވާފައެވެ. އަދި، ރަށުގައި ގިނަ ގޯތިތަކެއް ނުހެދި ހުރުމާއެކު ބޯހިޔާވަހިކަމުގެ މަޝްރޫއެއް ހިންގުމަށް ބޭނުންވެފައިވާކަންވެސް ކައުންސިލުން ފާހަގަކުރިއެވެ.
އުތީމު ޣާޒީ ބަންޑާރައިންގެ މިސްކިތަކީ، ވަރަށް ކުރިން އިމާރާތްކޮށްފައިވީ ނަމަވެސް އަދިވެސް ރަސްމީކޮށް ހުޅުވާފައިނުވާ މިސްކިތެއް ކަމަށާއި، އަދި އިމާރާތުގެ ފެންވަރު ދަށްވުމުގެ ސަބަބުން އެ މިސްކިތުގެ ޝީޓުގައި ރެނދުލައި މިސްކިތުގެ ތެރެއަށް ފެންފައިބާކަން ކައުންސިލުން ފާހަގަކޮށްފައިވެއެވެ.
އުތީމަކީ ތާރީޚީ އާސާރުތަކެއް ހުރި ރަށަކަށް ވުމާއި، ރަށުގެ އެންމެ މުހިއްމު ތަންތަނުގެ ތެރޭގައި ދޫނި ތުނޑި ހިމެނޭކަމުގައި ވީނަމަވެސް، ބަނދަރު ހެދުމާގުޅިގެން އެ ތުނޑި ގިރާފައިވާކަން ކައުންސިލުން ފާހަގަކުރިއެވެ.
ކައުންސިލުން މި ބައްދަލުކުރެއްވުމުގައި، ފާހަގަކުރި ކަންކަމާ ގުޅޭގޮތުން ރައީސުލްޖުމްހޫރިއްޔާ ވިދާޅުވީ، އެކަންކަމާއި ގުޅުންހުރި މުއައްސަސާތަކާ ގުޅިގެން އެކަންކަން ހައްލުކޮށްދެއްވުމަށް މަސައްކަތްޕުޅު ކުރައްވާނެކަމަށެވެ. އަދި، މިހާރު ރޭވިފައިވާ މަޝްރޫއުތަކާއި އެ މަޝްރޫއުތައް ކުރިއަށްގޮސްފައިވާ މިންވަރުވެސް ރައީސުލްޖުމްހޫރިއްޔާ ހިއްސާކުރެއްވިއެވެ. މީގެ އިތުރުންވެސް ރައީސުލްޖުމްހޫރިއްޔާ ވަނީ، އުތީމުގައި އާ މިސްކިތެއް ތަރައްގީކުރުން އަންނަ އަހަރުގެ ބަޖެޓުގައި ހިމަނައިގެން ކުރިއަށްގެންދަވާނެކަމަށް ވިދާޅުވެފައެވެ.
އުތީމުގައި މި ސަރުކާރުން ގިނަ މަޝްރޫއުތަކެއް ހިންގައި ނިންމާފައި ވާއިރު، އޭގެ ތެރޭގައި; ނަރުދަމާ ގާއިމްކުރުމާއި، އާ އިންޖީނުގެއަކާއި، އޮފީސް އިމާރާތެއް އެޅުމާއި، ކުޅިވަރުގެ ވަސީލަތްތައް ގާއިމްކުރުމުގެ މަޝްރޫއުތައް ހިމެނެއެވެ. މީގެ އިތުން މިހާރުވެސް އުތީމުގައި، ސާފު ބޯފެނުގެ ނިޒާމު ގާއިމްކުރުމާއި، ކަރަންޓްގެ ވިއުގަ އަޕްގްރޭޑްކުރުމާއި، ސިއްހީމަރުކަޒާއި، ބޮޑުތަކުރުފާނުގެ ހަނދާނީ މަރުކަޒު އަޕްގްރޭޑް ކުރުމުގެ މަޝްރޫއު ހިމެނެއެވެ.
މިބައްދަލުކުރެއްވުމަށްފަހު، ރައީސުލްޖުމްހޫރިއްޔާގެ ދެކަނބަލުން ވަނީ، އުތީމު ބަންޑާރައިންގެ ރުއްދަނޑު އިފްތިތާޙްކޮށްދެއްވައި ރުއް އިންދަވައިދެއްވާފައެވެ. މީގެ އިތުރުން މިނިވަންދުވަހާ ގުޅިގެން އުތީމުގައި ބޭއްވި ޕެރޭޑްވެސް ރައީސުލްޖުމްހޫރިއްޔާގެ ދެކަނބަލުން ބައްލަވާލެއްވިއެވެ.
