ރާއްޖެ ތަރައްގީވަމުން ދާގޮތަށް ރައްޔިތުންގެ ބޭނުންތަކާއެކީގައި ބަދަލު އަންނަންޖެހޭ - ރައީސް

ދިވެހިރާއްޖެ ތަރައްގީވަމުންދާ ގޮތަށް ރައްޔިތުންގެ ބޭނުން ތަކާއެކީގައި ބަދަލު އަންނަންޖެހޭ ކަމުގައި ރައީސް އިބްރާހިމް މުހައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ހއ. އުތީމު ފެނަކަ އައު އިންޖީނުގެއާއި އޮފީސް އިމާރާތް ހުޅުވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ކުރީގެ އިންޖީނުގެތައް އާންމު ރައްޔިތުން ހަދައިގެން ހިދުމަތް ހޯދަން ފެށި ކަމަށެވެ. މިިއީ ރާއްޖޭގެ ހުރިހާ ރަށެއްގައި ވެސް ކަރަންޓުގެ ހިދުމަތް ދެމުން އައި ގޮތް ކަމަށް ރައީސް ވިދާޅުވިއެވެ. ރަށުގައި ހުންނަ ކޮންމެވެސް ފުދުންތެރި މީހަކު އޭނާގެ އަމިއްލަ ބޭނުމަށާއި، ގާތްތިމާގެ ބޭނުމަށް ކަރަންޓް ދޭން ފަށާ ކަމަށެވެ. ނުވަތަ ރަށެއްގައި އެއިރަކު އޮންނަ ރަށު ކައުންސިލަކުން، ކޮމިޓީއަކުން ނުވަތަ ޖަމިއްޔާއަކުން ލާރިކޮޅެއް އެއްކޮށްލައިގެން އެކަން ކުރަމުން އަންނަ ކަމަށެވެ.

Advertisement

ރައީސް ވިދާޅުވީ މިއީ ރާއްޖޭގެ ހުރިހާ ރަށެއްގައި މިހާތަނާ ޖެހެންދެން އެކަން ކުރަމުން އައި ގޮތް ކަމަށެވެ. އެހެންނަމަވެސް ރާއްޖެ ތަރައްގީވަމުން މިދާގޮތަށް ރައްޔިތުންގެ ބޭނުމާއެކީގައި މިކަމަށް ބަދަކު އަންނަންޖެހޭ ކަމަށެވެ. ގާނޫނު އަސާސީގައި އެވާހަކަ ލިޔުނީ އެހެންވެ ކަމަށެވެ.

ރައީސް ވިދާޅުވީ މީގެ 2 އަހަރު ކުރިން އަޅުގަނޑުމެން ކުރިމަތިލާން ޖެހުނު ކޮވިޑްގެ ވަބާގެ މަތިން ގިނަ ބަޔަކު ހަނދުމަފުޅު ނުހުރެދާނެ ކަމަށެވެ. އެހެން ނަމަވެސް، އަޅުގަނޑުމެންގެ ޕްލޭނާ އެއްގޮތަށް ބައެއް ކަންތައްތައް ކުރިއަށް ނުގޮސް މަޑުޖައްސާލަން ޖެހުނު، އަދި މަޑުޖެހިގެންދިޔަ އެއް ސަބަބު އެއީ ކޯވިޑުގެ ޢާލަމީ ވަބާ ކަމަށެވެ. ރައީސް ވިދާޅުވީ މުޅި ދުނިޔެ އެކީގައި ބަންދުވެފައި އޮތް ކަމަށާއި، މިއިން ކޮންމެ ކަމަކަށް ބޭނުންވާ ކޮންމެ އެއްޗެއް އަޅުގަނޑުމެން އެތެރެކުރަންޖެހެނީ ރާއްޖެއިން ބޭރުން ކަމަށެވެ.

އަދި ރާއްޖެއިން ބޭރުން އެ ދަތިކަމާ އެކީގައި އެތެރެކުރި ނަމަވެސް، އަދި އެ ރަށްރަށާ ހިސާބަށް ފޯރުކޮށްދިނުމުގައިވެސް އެތައް އެތައް ދަތިތަކެއް ކުރިމަތިވި ކަމަށެވެ. އެހެން ނަމަވެސް، މަސައްކަތްތައް ހުއްޓާނުލާ ފެނަކައާއި، އެމް.ޓީ.ސީ.ސީ.އާއި، އެސް.ޓީ.އޯ. އޭރު އަދާކުރަމުންދިޔަ ދައުރަކީ، އަޅުގަނޑުމެން މިއިން ކޮންމެ ތަނެއްގައި ފާހަގަކޮށް، އެތަނުގައި މަސައްކަތް ކުރައްވަން ތިއްބެވި ވެރިންނާއި މުވައްޒަފުންގެ މަތިން ހަނދާންކުރަންޖެހޭނެ ދައުރެއް ކަމަށެވެ. މިއަދު މިހިސާބަށް އަޅުގަނޑުމެންނަށް އާދެވިފައި މިތިބީ އެބޭފުޅުން އެ ކުރެއްވި އަގުނުކުރެވޭވަރުގެ ބުރަ މަސައްކަތްތަކުގެ ސަބަބުން ކަމަށް ރައީސް ވިދާޅުވިއެވެ.