ފުލުހުންގެ ދައުރަށް ހުރަސްއެޅުމުން އިދިކޮޅު މުޒާހަރާއިން 11 މީހަކު ހައްޔަރުކޮށްފި
5 ޖެނުއަރީ 2022 | ބުދަ 17:44ހައްޔަރުކުރި މީހުންގެ ތެރޭގައި ހިމެނެނީ ނުވަ އަންހެނުންނާއި ދެ ފިރިހެނުން
އިދިކޮޅު ކޯލިޝަނުން ބޭއްވި މުޒާހަރާގެ ތެރެއިން
ޕީޕީއެމްއާއި ޕީއެންސީން ބުދަ ދުވަހު ބޭއްވި "އިންޑިއާ އައުޓް" މުޒާހަރާއިން 11 މީހަކު ހައްޔަރުކޮށްފިއެވެ.
ފުލުހުން ބުނީ ހައްުޔަރުކުރި މީހުންގެ ތެރޭގައި ހިމެނެނީ ނުވަ އަންހެނުންނާއި ދެ ފިރިހެނުން ކަމަށެވެ. އެމީހުން ފުލުހުންގެ ބެލުމުގެ ދަށަށް ގެނެސްފައިވަނީ ފުލުހުންގެ ދައުރު އަދާކުރުމަށް ހުރަސް އެޅިކަމުގެ ތުހުމަތުގައިކަމަށް ފުލުހުން ބުނެއެވެ. ހައްޔަރުކުރި މީހުންގެ ތެރޭގައި ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު އިސްމާއިލް ހިމެނެއެވެ. ޕީޕީއެމްއިން ބުނީ އެ ޕާޓީން ކުރިއަށް ގެންދިޔައީ ސުލްހަވެރި އެއްވުމެއް ކަމަށެވެ.
ކުރީގެ ރައީސް އަދި ޕީޕީއެމްގެ ލީޑަރ އަބްދުﷲ ޔާމީން ޖަލު ހުކުމުން މިނިވަންވެވަޑައިގަތް ފަހުން އިދިކޮޅުން ކުރިޔަށްގެންދާ އިންޑިޔާ އައުޓް ކެމްޕެއިން ވަނީ ފުޅާކޮށްފައެވެ. އެގޮތުން ޔާމީން އިސްވެ ހުންނަވައި ބައެއް ރަށްރަށުގައިވެސް ވަނީ އިންޑިޔާ އައުޓްގެ ނަމުގައި ހަރަކާތްތައް ކުރިޔަށް ގެންގޮސްފައެވެ.
އެއްވުންތަކުގައި ބައިވެރިވާ މީހުން "އިންޑިއާ އައުޓް" ޖަހާފައިވާ ރަތްކުލައިގެ ޓީޝާޓް ލައިގެން ތިބޭތީ އެކަމަށް ވަނީ ފާޑުކިޔުންތައް އަމާޒުވެފައެވެ. އަދި ޕީޕީއެމް ޕީއެންސީ ނޫން ހުރިހާ ސިޔާސީ ޕާޓީއަކުންހެން ވަނީ މިހަރަކާތް ކުށްވެރިކޮށް ބަޔާންތައް ނެރެފައެވެ. އޭގެތެރޭގައި ސަރުކާރުގައި ތިބި ޕާޓީތަކާއި ސަރުކާރުގައި ނެތް ޕާޓީތައްވެސް ހިމެނެއެވެ.
