މާލެ ސަރަހައްދުން އެކަނިވެސް 100ށްވުރެ ގިނަ މީހުން ޕޮޒިޓިވްވެއްޖެ
5 ޖެނުއަރީ 2022 | ބުދަ 17:39މާލެ ސަރަހައްދުން ޕޮޒިޓިވްވީ 102 މީހުން
ރާއްޖޭގެ ކޮވިޑް-19ގެ ހާލަތު
މާލެ ސަރަހައްދުން އެކަނިވެސް 100ށްވުރެ ގިނަ މީހުން ބުދަ ދުވަހު ކޮވިޑް-19ށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު, މާލެ ސަރަހައްދުން ވަނީ 102 މީހުން ޕޮޒިޓިވްވެފައެވެ. އަތޮޅުތަކުން 48 މީހުން ޕޮޒިޓިވްވިއިރު ހިންގަމުންދާ ރިސޯޓްތަކުން 74 މީހުން ވަނީ ޕޮޒިޓިވްވެފައެވެ. މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 96،746ށް އަރާފައެވެ. 93،736 މީހުން ބަލިން ފަސޭހަވެފައިވާއިރު މިވަގުތު 2،734 ކޭހެއް އެކްޓިވް ކޭހުގެ ގޮތުގައި އަންނަނީ ގުނަމުންނެވެ. އަދި 13 މީހަކަށް ހޮސްޕިޓަލްތަކުގައި އެޑްމިޓްކޮށްގެން އަންނަނީ ފަރުވާދެމުންނެވެ.
މިހާތަނަށް 263 މީހުން ވަނީ މިބަލީގައި ނިޔާވެފައެވެ.
ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން ފާއިތުވި ހަފުތާގެ ތެރޭގައި ކޭސްތައް ފެންނަމުންދިޔަ މިންވަރު ވަނީ އިތުރުވާން ފަށާފައެވެ. ޑިސެމްބަރ މަހުގެ 28 ވަނަ ދުވަހު ރާއްޖެއިން 190 މީހުން ކޮވިޑަށް ޕޮޒިޓިވްވިއިރު ޑިސެމްބަރ މަހުގެ 29 ވަނަ ދުވަހު އެއަދަދު ހުރީ 198ގައެވެ. ޑިސެމްބަރ 30ގައި 120 މީހުން ކޮވިޑަށް ޕޮޒިޓިވްވިއިރު ޑިސެމްބަރ 31ގައި 160 މީހުން ވަނީ ކޮވިޑަށް ޕޮޒިޓިވްވެފައެވެ. ޖެނުއަރީ މަހުގެ 1 ވަނަ ދުވަހު 191 މީހުން ކޮވިޑަށް ޕޮޒިޓިވްވިއިރު ޖެނުއަރީ 2 ވަނަ ދުވަހު 161 މީހުން ވަނީ ޕޮޒިޓިވްވެފައެވެ. ޖެނުއަރީ 3 ވަނަ ދުވަހު 242 މީހުން ވަނީ ޕޮޒިޓިވްވެފައެވެ. އަދި ޖެނުއަރީ 4 ވަނަ ދުވަހު ކޮވިޑަށް ޕޮޒިޓިވްވީ 228 މީހުންނެވެ.
