ދިވެހިންގެ ބަޔަކު ބޭރު ބަޔަކާ ގުޅިގެން ރާއްޖެއަށް އެތެެރެކުރި ކަމަށް ތުހުމަތު ކުރެވޭ 130 ކިލޯގެ މަސްތުވާތަކެތީގެ މައްސަލަައިގައި ދައުލަތުން ދައުވާކޮށްފައިވާ މީހުންގެ ތެރޭގައި ހިމެނޭ ބަންގްލަދޭޝްގެ ރައްޔިތެއްކަމަށްވާ މުހައްމަދު އިޤްބާލުގެ މައްޗަށް އުފުލާފައިވާ ދައުވާގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގެ އަޑުއެހުން ކުރިއަށް ގެންދެވީ އިސްގާޒީ އަހުމަދު ޝަކީލެވެ.

މި މައްސަލައިގައި ބުދަ ދުވަހު ކުރިއަށް ދިޔަ އަޑުއެހުމަކީ މި މައްސަލައިގައި އުފުލާފައިވާ ދައުވާގެ އިބްތިދާއީ އަޑުއެހުމެކެވެ. އެގޮތުން އެންމެ ފަހުން އޮތް އަޑުއެހުމުގައި ޝަރީއަތުގެ ކުރީގެ އިތުރު ހުށައެޅުންތަކަށް 10 ދުވަހުގެ މުއްދަތެއް ވަނީ ދެއްވާފައެވެ.

ބުދަ ދުވަހުގެ އަޑުއެހުމުގައި އިޤްބާލުގެ ޤާނޫނީ ވަކީލު ވިދާޅުވީ، މިވަގުތަށް ޝަރީއަތުގެ ކުރިން ހުށައަޅާ އިތުރު ހުށައެޅުމެއް ނެތް ކަމަށެވެ. ދައުލަތުން ވަނީ ދިފާއީ ހެކީގެ ގޮތުގައި ހުށައަޅާފައިވާ ހައިކޯޓުގެ 2 ގަޒިއްޔާއެއްގެ ވާހަކަ ފާހަގަ ކުރައްވައި، އެ ދެ ގަޒިއްޔާއަކީ ޝަރީއަތަށް ޤަބޫލު ކުރެވޭނެ ހެކި ނޫންކަމަށް ކަނޑައަޅައިދެއްވުމަށް އެދިފައެވެ. ސަބަބަކީ އެ ދެ ގަޒިއްޔާއަކީ މިހިނގާ މައްސަލައިގެ ވާޤިއާތަކާއި ގުޅޭގޮތުން އެއްވެސް ކަމެއް ސާބިތުވެފައިނުވާ ގަޒިއްޔާއަކަށްވާތީކަމަށް ދައުލަތުން ސަބަބެއްގެ ގޮތުގައި ފާހަގަ ކޮށްފައިވެއެވެ.

އެ ހުށައެޅުމަށް ރައްދު ދެއްވައި ދިފާއީ ވަކީލު ވިދާޅުވީ، ހައިކޯޓުގެ އެ ގަޒިއްޔާގައި ކަނޑައަޅާފައިވާ އުސޫލަށް ބަލާއިރު، ޑްރަގްގެ ޒިންމާ މީހަކު އުފުލުމުގައި ބަލަންޖެހޭ ކަންކަމާއި، ދައުވާލިބޭ ފަރާތާއި ގުޅުވާލެވޭ ގޮތާއި ގުޅޭ ނުކުތާތައް ފާހަގަ ކޮށްފައިވާކަމަށެވެ. އެގޮތުން ދައުވާލިބޭ ފަރާތާއި އެ ތަކެތި ގުޅޭގޮތެއް އޮންނަންޖެހޭކަން މި ގަޒިއްޔާތަކުން އެނގެންޖެހޭކަމަށް ވަކީލު ވިދާޅުވިއެވެ. އަދި މިހިނގާ މައްސަލައިގައިވެސް އިޤްބާލުއާއި މަސްތުވާތަކެއްޗާ ގުޅުވޭ ގޮތެއް ނެތްކަމަށް ވަކީލު ވިދާޅުވިއެވެ.

"މި އެއްޗެއްސާ އިޤްބާލަކާ ގުޅުވާލެވޭކަށް ނެތް"ދިފާއީ ވަކީލު ވިދާޅުވިއެވެ.

ދައުލަތުގެ ހުށައެޅުމާއި ގުޅޭގޮތުން ގޮތެއް ނިންމެވުމަށް އަންނަ ފެބްރުއަރީ މަހުގެ 7 ވަނަ ދުވަހު ހެނދުނު 10:00 ގައި އަޑުއެހުމެއް ބާއްވަވާނެކަމަށް މައްސަލަ ބައްލަވާ ގާޒީ އަހުމަދު ޝަކީލު ވިދާޅުވިއެވެ.

130 ކިލޯގެ މަސްތުވާތަކެތި ރާއްޖެއަށް އެތެރެކުރުމުގައި އިސްކޮށްހުރި ފަރާތްތަކަކީ ގއ. ވިލިނގިލި، ލައިޓްހައުސް، ޝަހީބް އިބްރާހިމް (42އ) އާއި ހއ. ހޯރަފުށި، ވައިލެޓްވިލާ، އަހްމަދު މޫސާ (48އ) އެވެ. ދިވެހިންގެ ބަޔަކު ބޭރުގެ ބަޔަކާއި ގުޅިގެން ރާއްޖެއަށް ކަނޑުމަގުން ގިނަ އަދަދެއްގެ މަސްތުވާތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ކަނޑުމަތީގައި ހިންގި މި އޮޕަރޭޝަނުގައި މަސްތުވާތަކެތި ރާއްޖެއަށް އެތެރެކުރުމަށް ބޭނުން ކުރި ދޯނި ފުލުހުންގެ ބެލުމުގެ ދަށަށް ގެނެސް ބަލައި ފާސްކޮށްފައިވާއިރު، އެދޯނިން ގިނަ އަދަދެއްގެ މަސްތުވާތަކެތި ފެނިފައިވެއެވެ. އަދި މި އޮޕަރޭޝަނުގައި މިހާތަނަށް ހުޅުމާލޭގެ ތިން އެޕާޓްމަންޓަކާއި މާލޭގެ ދެ ގެއެއްވެސް ބަލައި ފާސްކޮށްފައިވެއެވެ.

ޝަހީބް އިބްރާހީމާއި އަހްމަދު މޫސާގެ އިތުރުން 130 ކިލޯގެ މަސްތުވާތަކެތީގެ މައްސަލައިގައި ކްރިމިނަލް ކޯޓުގައި ދައުވާކޮށްފައިވަނީ، ގއ. ވިލިނގިލި، ދުންފިނިގެ، އަސީލް މާހިރާއި ޅ. ހިންނަވަރު، ސެލް، އަނަސް ހުސައިންގެ އިތުރުން، ބަންގްލަދޭޝް ދެ މީހެއް ކަމަށްވާ މުހައްމަދު ރިޔާޒާއި އިގްބާލްގެ މައްޗަށެވެ.