އެކްޓިވް ކޭހުގެ އަދަދު 2702ގައި، ފާއިތުވި 24 ގަޑިއިރު 228 މީހުން ޕޮޒިޓިވްވި

ފާއިތުވި 24 ގަޑިއިރު ރާއްޖެއިން 228 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު, މާލެ ސަރަހައްދުން ވަނީ 66 މީހުން ޕޮޒިޓިވްވެފައެވެ. އަތޮޅުތަކުން 60 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން 97 މީހުން ވަނީ ޕޮޒިޓިވްވެފައެވެ. އަދި ލިވް އެބޯރޑްތަކުން 5 މީހުން ޕޮޒިޓިވްވެފައިވެއެވެ. މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 96،522ށް އަރާފައެވެ. 93،544 މީހުން ބަލިން ފަސޭހަވެފައިވާއިރު މިވަގުތު 2702 ކޭހެއް އެކްޓިވް ކޭހުގެ ގޮތުގައި އަންނަނީ ގުނަމުންނެވެ. 12 މީހަކަށް ހޮސްޕިޓަލްތަކުގައި އެޑްމިޓްކޮށްގެން އަންނަނީ ފަރުވާދެމުންނެވެ.

މިހާތަނަށް 263 މީހުން ވަނީ މިބަލީގައި ނިޔާވެފައެވެ.

ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން ފާއިތުވި ހަފުތާގެ ތެރޭގައި ކޭސްތައް ފެންނަމުންދިޔަ މިންވަރު ވަނީ އިތުރުވާން ފަށާފައެވެ. ޑިސެމްބަރ މަހުގެ 28 ވަނަ ދުވަހު ރާއްޖެއިން 190 މީހުން ކޮވިޑަށް ޕޮޒިޓިވްވިއިރު ޑިސެމްބަރ މަހުގެ 29 ވަނަ ދުވަހު އެއަދަދު ހުރީ 198 ގައެވެ. ޑިސެމްބަރ 30ގައި 120 މީހުން ކޮވިޑަށް ޕޮޒިޓިވްވިއިރު ޑިސެމްބަރ 31ގައި 160 މީހުން ވަނީ ކޮވިޑަށް ޕޮޒިޓިވްވެފައެވެ. ޖެނުއަރީ މަހުގެ 1 ވަނަ ދުވަހު 191 މީހުން ކޮވިޑަށް ޕޮޒިޓިވްވިއިރު ޖެނުއަރީ 2 ވަނަ ދުވަހު 161 މީހުން ވަނީ ޕޮޒިޓިވްވެފައެވެ. ޖެނުއަރީ 3 ވަނަ ދުވަހު 242 މީހުން ވަނީ ޕޮޒިޓިވްވެފައެވެ.