ކުރިއަށް މިއޮތް ތިން ހަފުތާއަކީ ވަރަށް ބޮޑަށް ކޮވިޑް ފެތުރިގެންދިޔުމުގެ ފުރުސަތު އޮތް ތިން ހަފުތާ: ރައީސް
ރައީސް ވިދާޅުވީ މިކަމާއި ގުޅިގެން ސިއްހީ މާހިރުންނާއެކު ބައްދަލުވުމެއް ބޭއްވެވިކަމަށް
ލަންދޫ ބަނދަރު އިފްތިތާހު ކުރުމުގެ ރަސްމިއްޔާތުގައި ރައީސުލްޖުމްހޫރިއްޔާ ވާހަކަފުޅު ދައްކަވަނީ
ސިއްހީ މާހިރުން ލަފާދެއްވާ ގޮތުގައި، ކުރިއަށް މިއޮތް ތިން ހަފްތާއަކީ، އަނެއްކާވެސް ރާއްޖޭގައި ވަރަށް ބޮޑަށް ކޮވިޑް ފެތުރިގެންދިޔުމުގެ ފުރުސަތު އޮތް ތިން ހަފްތާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ނ. ލަންދޫ ބަނދަރު ހުޅުއްވައިދެއްވުމުގެ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ ކޮވިޑްގެ އައު ވޭރިއަންޓެއް މިހާރު ދުނިޔޭގައި ފެތުރެމުން އަންނައިރު ރާއްޖެއިންވެސް އެ ވޭރިއަންޓް ފެނިފައިވާކަމަށެވެ. ހަލުވިކަމާއެކު އެވޭރިއަންޓް ފެތުރެމުންދާކަމަށާއި އަނެއްކާވެސް އިންޒާރެއް ލިބެމުންދާކަމަށް ރައީސް ވިދާޅުވިއެވެ. ރައީސް ވިދާޅުވީ މިކަމާގުޅިގެން ސިއްހީ މާހިރުންނާއެކު ބައްދަލުވުމެއް ބޭއްވެވިކަމަށެވެ.
ރައީސް ވިދާޅުވީ މަސައްކަތްކުރައްވަނީ ވީވަރަކުން އެކިއެކި ވިޔަފާރިތައް ބަންދުނުކޮށް، އާންމު ހާލަތަކައިގެން މިކަމުގައި ކުރިއަށް ދެވޭތޯކަމުގައެވެ. މިކަން ކުރިއަށް ގެންދެވޭނީ، ކުރިއެކޭވެސް އެއްގޮތަށް ސިއްހީ މާހިރުން ދެއްވާ ލަފަޔާ އެކީގައި އެގޮތަށް އަމަލުކޮށްގެން ކަމަށް ރައީސް ވިދާޅުވިއެވެ. އެހެންކަމުން ކުރިއަށް މިއޮތް ދެތިން ހަފުތާގައި އަނެއްކާވެސް ވަރަށް ބޮޑަށް އެކަމަށް ސަމާލުވެ، ހުރިހާ ރައްޔިތުން އެކުގައި މިކަމައިގެން ކުރިއަށް ދިޔުމަށް ރައީސް ވަނީ އެދިވަޑައިގަންނަވާފައެވެ.
ރައީސް ވިދާޅުވީ ސިއްހީ މާހިރުން އެދިވަޑައިގަތީ ކުރިއެކޭވެސް އެއްގޮތަށް މިކަމަށް ސަމާލުވެތިބުމަށް ކަމަށެވެ. ކުރަންޖެހޭ ވަރަށް ކުދިކުދި ކަންތައްތައް ހުރިއިރު އެ ކަންތައްތައް ކޮށްދިނުމަށް ސިއްހީ މާހިރުން އެދިވަޑައިގަންނަވާކަމަށް ރައީސް ވިދާޅުވިއެވެ. ޢާންމު ތަންތާނގައި އުޅޭއިރު ހުރިހާ އެންމެން މާސްކް އަޅައިގެން އުޅުމަށް ރައީސް އެދިވަޑައިގެންނެވިއެވެ.
ރާއްޖޭގައި މިފަހަކުން ވަނީ ކޮވިޑްގެ ހާލަތު ގޯސްވާން ފަށާފައެވެ. އެގޮތުން ފާއިތުވި ހަފުތާގެ ތެރޭގައި ކޭސްތައް ފެންނަމުންދިޔަ މިންވަރު ވަނީ އިތުރުވާން ފަށާފައެވެ. ޑިސެމްބަރ މަހުގެ 28 ވަނަ ދުވަހު ރާއްޖެއިން 190 މީހުން ކޮވިޑަށް ޕޮޒިޓިވްވިއިރު ޑިސެމްބަރ މަހުގެ 29 ވަނަ ދުވަހު އެއަދަދު ހުރީ 198 ގައެވެ. ޑިސެމްބަރ 30ގައި 120 މީހުން ކޮވިޑަށް ޕޮޒިޓިވްވިއިރު ޑިސެމްބަރ 31ގައި 160 މީހުން ވަނީ ކޮވިޑަށް ޕޮޒިޓިވްވެފައެވެ. ޖެނުއަރީ މަހުގެ 1 ވަނަ ދުވަހު 191 މީހުން ކޮވިޑަށް ޕޮޒިޓިވްވިއިރު ޖެނުއަރީ 2 ވަނަ ދުވަހު 161 މީހުން ވަނީ ޕޮޒިޓިވްވެފައެވެ. ޖެނުއަރީ 3 ވަނަ ދުވަހު 242 މީހުން ވަނީ ޕޮޒިޓިވްވެފައެވެ.
ރާއްޖެއިން މިހާތަނަށް އޮމިކްރޯން ވޭރިއަންޓްގެ ހަތަރު ކޭސް ފެނިފައިވާކަމަށް އެޗްޕީއޭއިން ވަނީ ބުނެފައެވެ. އެއެންމެންނަކީވެސް ރާއްޖެއަށް އައި ފަތުރުވެރިން ކަމަށް އެޗްޕީއޭއިން ބުނެއެވެ. އެއީ ޑިސެމްބަރ މަހުގެ 15 ވަނަ ދުވަހުއެވެ. އެދުވަހު ބޭއްވި ނޫސްވެރިންގެ ބައްދަލުވުމުގައި އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ މިކަމާ ގުޅިގެން ރިސްކް އެސެސްމެންޓްތައް މިހާރު ހަދަމުން އަންނަކަން ފާހަގަކުރައްވައި އަފްޒަލް ވިދާޅުވީ އިތުރަށް އަޅަން ޖެހޭ ފިޔަވަޅުތަކާމެދު މިހާރު މަޝްވަރާ ކުރެވެމުން އަންނަ ކަމަށެވެ.
