މި ސަރުކާރަކީ ރައްޔިތުންގެ އެދުންތައް ރަނގަޅަށް ސާފުވުމުން، އެކަމަށް ކަނުލައި އަޑުއަހާ ސަރުކާރެއް ކަމަށް މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ނ ލަންދޫ ބަނދަރު ހުޅުވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ހައުސިން މިނިސްޓަރ އަސްލަމް ވިދާޅުވީ، ރާއްޖޭގައި އުމްރާނީ ތަރައްގީގެ މަސައްކަތްތައް ގިނަ ރަށްތަކެއްގައި ނުހަނު ބާރުމިނުގައި ކުރިއަށްދާ ކަމަށެވެ. އަދި އެކަންކަން ކުރުމުގައި ރައްޔިތުންގެ ޚިޔާލާއި މަޝްވަރާވެސް ހޯއްދަވާކަމަށް ވިދާޅުވިއެވެ.

މިނިސްޓަރ ވިދާޅުވީ، މިއަދުގެ ސަރުކާރަކީ ރައްޔިތުންގެ އެދުންތައް ރަނގަޅަށް ސާފުވުމުން، އެކަމަށް ކަނުލާ އަޑުއަހާ ސަރުކާރެއް ކަމަށެވެ. އެގޮތުން އުމްރާނީ ތަރައްގީގެ މަޝްރޫއުތައް މި ސަރުކާރުން ކުރިއަށް ގެންގޮސްފައިވާނީ ވެސް އެގޮތުގެ މަތިންކަމަށް މިނިސްޓަރ ވިދާޅުވިއެވެ. އޭގެ އެއް މިސާލެއްގެ ގޮތުން ނ ލަންދޫ ބަނދަރުގެ މަޝްރޫއަށް މިނިސްޓަރ އަލިއަޅުވާލެއްވިއެވެ.

މިނިސްޓަރ ވިދާޅުވީ، ބަނދަރުގެ މަޝްރޫތަކާއެކު ގުދުރަތީ ބައެއް މައްސަލަތައްވެސް ފެންމަތިވާ ކަމަށާއި، އެކަންކަންވެސް ހައްލު ކުރުމަށް ކަމާބެހޭ ފަރާތްތަކުގެ ލަފަޔާއި އިރުޝާދާއެކު މަސައްކަތް ކުރައްވާ ކަމަށެވެ. ނަމަވެސް މިހާރު މަޝްރޫއުތައް ހިންގާއިރު ތިމާވެއްޓަށް ސަމާލުކަން ބަހައްޓައިގެން މަޝްރޫއުތައް ބައްޓަން ކުރަމުން ގެންދާކަމަށް މިނިސްޓަރ ވިދާޅުވިއެވެ. އަދި މި ބަނދަރުތައް ގިނަ ދުވަސްތަކެއް ވަންދެން ހުންނާނެކަމަށް އުއްމީދު ކުރައްވާކަމަށް ވެސް ވިދާޅުވިއެވެ.

ލަންދޫއަކީ ބިންބޮޑު، ބިމުގެ ޖާގަ އޮތް ރަށެއްކަން ފާހަގަ ކުރައްވައި މިނިސްޓަރ އިތުރަށް ވިދާޅުވީ، ޕަބްލިކް ފެރީ ނިޒާމުގެ މަސައްކަތްވެސް އަންނަ އަހަރު ނިމުމަކާއި ގާތްވާނެ ކަމަށެވެ. އެއާއެކު ރަށުގައި ކުރެވިދާނެ އިގްތިސާދީ މަސައްކަތްތަކަށްވެސް ފުންކޮށް ވިސްނައި، އެކަމަށް މަސައްކަތްތައް ފެށިގެންދާނެކަމަށް ވިދާޅުވިއެވެ. އަދި އުމްރާނީ ތަރައްްގީ ސަރުކާރަކުން ގެނެސްދިނުމުން، ކުރިއަރައި ދިއުމުގެ ވިސްނުން ރައްޔިތުންގެވެސް ހުރުން މުހިއްމުކަމަށް މިނިސްޓަރ ވިދާޅުވިއެވެ.

ނ ލަންދޫ ބަނދަރު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ، ރައީސް ސާލިހުގެ ތަރައްގީގެ މަޝްރޫއުތައް ރައްޔިތުން ބަލައިގަންނަ މަންޒަރު ފެންނަމުންދާ ކަމަށެވެ. އެގޮތުން ވަގުތެއް ނެތް ކަމަށާއި، ރައީސްގެ ވައުދުފުޅުތައް ފުއްދެވުމަށް ރައްޔިތުންނަށް ކޮށްދޭން ޖެހޭ ކަންކަން ގިނަ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ، ފާއިތުވި 2 އަހަރުގެ ތެރޭގައި ނ އަތޮޅުގައިވެސް ގިނަ މަސައްކަތްތަކެއް ކުރެވިފައިވާ ކަމަށެވެ. އާޒިމް ވަނީ ރައީސްގެ ވައުދުފުޅުތަކާއި އެއްގޮތަށް މަސައްކަތްތައް ކުރިއަށް ގެންގޮސް ނިންމަވާނެކަމުގެ ޔަގީންކަން ދެއްވާފައެވެ. އަދި މަޝްރޫއުތައް ނިންމުމުގައި ހައުސިން މިނިސްޓަރ ވެދެއްވާ އެއްބާރުލެއްވުންވެސް އާޒިމްގެ ވާހަކައިގައި ފާހަގަ ކުރެއްވިއެވެ.

ލަންދޫ ބަނދަރު ރަސްމީކޮށް ހުޅުވައިދެއްވީ ރައީސް ސާލިޙެވެ. ނ ލަންދޫ ބަނދަރުގެ މަޝްރޫއަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށް ގެންގޮސްފައިވާ މަޝްރޫއެކެވެ. މި މަޝްރޫއުގެ އަގަކީ 32.4 މިލިއަން ރުފިޔާއެވެ. މި މަޝްރޫއުގެ ދަށުން، 227 މީޓަރުގެ ސަރަހައްދެއްގައި އެއްގަމު ތޮށި ލުމާއި، 1690 އަކަ މީޓަރު ސަރަހައްދެއްގައި ޕޭވްމަންޓް ހެދުމާއި، މޫރިންގް ރިންގ ސަޕްލައިކޮށް ހަރުކުރުމާއި ރޭމްޕެއް ހެދުމުގެ މަސައްކަތް ކޮށްފައިވެއެވެ.

ޑިޒައިން އެންޑް ބިލްޑް އުސޫލުން ކުރިއަށް ގެންދިޔަ މި މަޝްރޫއުގެ ދަށުން ބޮޑު ހިލަ ބޭނުންކޮށްގެން 401 މީޓަރުގެ ބޭރު ތޮށި ހެދުމާއި، 256 މީޓަރުގެ އެއްގަމު ތޮށި ހެދުމާއި، 13 މޫރިން ބުލޮކް ލުމާއި، 13 ބަނދަރު ބައްތި ހަރުކުރުމާއި، 2 ނެރުބައްތި ހަރުކުރުމާއި، 1280 ސްކެއަރ މީޓަރު ޕޭވްމަންޓެއް ހެދުމާއި، 23000 ކިއުބިކް މީޓަރު ބަނދަރު ފުންކުރުމާއި، 2000 ކިއުބިކް މީޓަރު ނެރު ފުންކުރުމާއި، 60 މީޓަރު ރިވެޓްމަންޓް ޖެހުމާއި އަދި 65 މީޓަރު ގުރޯއިން ޖެހުން ކުރިއަށް ގެންގޮސްފައިވެއެވެ.