އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ކުޅުނު މެޗުން ވުލްވްސްއިން މެންޗެސްޓާ ޔުނައިޓެޑް ބަލިކޮށްފިއެވެ.

ޔުނައިޓެޑުގެ ދަނޑުގައި ކުޅުނު މި މެޗުން ވުލްވްސް މޮޅުވީ 1-0 ގެ ނަތީޖާއަކުންނެވެ. މިއީ ވުލްވްސްއިން މިދިޔަ 42 އަހަރު ތެރޭ ޔުނައިޓެޑް ދަނޑުގައި ހޯދި ފުރަތަމަ މޮޅެވެ. އެގޮތުން އެންމެ ފަހުން ޔުނައިޓެޑް ދަނޑުގައި ވުލްވްސްއަށް ލީގުގައި މޮޅެއް ހޯދުނީ 1980 ވަނަ އަހަރެވެ.

ހޯމަ ދުވަހުގެރޭ ކުޅުނު މެޗުގައި ޔުނައިޓެޑުގެ ފުރަތަމަ އެގާރައަށް ގިނަ ބަދަލުތަކެއް ގެނައިރު، މި މެޗުގައި ޔުނައިޓެޑުގެ ކެޕްޓަންކަން ކޮށްފައިވަނީ އިތުބާރު ފޯވާޑް ކްރިސްޓިއާނޯ ރޮނާލްޑޯއެވެ. މި މެޗުގައި ޔުނައިޓެޑަށް އެންމެ އެދެވޭ ކުޅުމެއް ދެއްކިފައި ނުވާއިރު، މުޅި މެޗުގައިވެސް ވުލްވްސްގެ ގޯލާ އަމާޒުކޮށް ޔުނައިޓެޑަށް ފޮނުވާލެވިފައިވަނީ އެންމެ ދެ ހަމަލާއެވެ.

އެކަމަކު މި މެޗުގައި ވުލްވްސްއިން ގިނަ ހަމަލާތަކެއް އުފެއްދިއިރު، އެ ޓީމުން ލީޑު ނަގާފައިވަނީ މެޗު ނިމެން އަށް މިނެޓަށް ވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ ތަޖުރިބާކާރު މިޑްފީލްޑަރު ޔާއޯ މުޓީނިއޯއެވެ.

މި ނަތީޖާއާއެކު ޔުނައިޓެޑް އޮތީ ތާވަލުގެ ހަތްވަނައިގައި ކުޅުނު 19 މެޗުން ލިބުނު 31 ޕޮއިންޓާއެކުއެވެ. ލީގުގެ ގަދަ ހަތަރަކަށް ވަންނަން ޔުނައިޓެޑުން ކުރަމުން އަންނަ މަސައްކަތަށް އިތުރު އުނދަގޫތަކެއް ކުރިމަތިވެފައިވާއިރު، ހަތަރުވަނައިގައި އޮތް އާސެނަލަށް 20 މެޗުން ވަނީ 35 ޕޮއިންޓް ލިބިފައެވެ. އަދި ފަސްވަނައިގައި އޮތް ވެސްޓް ހޭމް ޔުނައިޓެޑަށް 20 މެޗުން 34 ޕޮއިންޓް ލިބިފައިވާއިރު، ހަވަނައިގައި އޮތް ޓޮޓެންހަމް ހޮޓްސްޕާއަށް ވަނީ 18 މެޗުން 33 ޕޮއިންޓް ލިބިފައެވެ.