ފިރިމީހާގެ ޑްރަގް ފައިސާ ބޭނުންކުރި ކަމަށް ބުނެ އަނބިމީހާއަށް މަނީ ލޯންޑަރިންގެ ދައުވާ އުފުލި މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި މަނީ ލޯންޑަރިންގެ ދައުވާ އުފުލާފައިވަނީ ގދ. ތިނަދޫ ރާމިޒާ އަލީގެ މައްޗަށެވެ. އެގޮތުން ވަކި ފައިސާ އަކީ ކުށްކޮށްގެން ހޯދާފައިވާ ފައިސާއެއްކަން ޝައްކުކުރެވޭ ހާލަތުގައި ވެސް އަތުގައި ބަހައްޓައިފި ނަމަ ނުވަތަ އެއިން މުއާމަލާތުކޮށްފި ނަމަ އެއި މަނީ ލޯންޑަރިން ކަމަށް ބެލެއެވެ.

މި މައްސަލައިގައި އެންމެ ފަހުން ބޭއްވި އަޑުއެހުމުގައި ރާމިޒާ ވަނީ ދައުވާއަށް ޖަަވާބުދާރީވެ، ދައުވާއަށް އިންކާރު ކޮށްފައެވެ. އެއާއެކު އަންގާރަ ދުވަހުގެ އަޑުއެހުމަކީ މި މައްސަލައިގެ ހެކި ހުށައެޅުމަށް ތާވަލުކުރި އަޑުއެހުމެކެވެ.

މި އަޑުއެހުން ފައްޓަވަމުން ދައުލަތުން ވަނީ ދައުލަތުން ހުށައަޅާފައިވާ ދައުވާގެ އިބާރާތަށް އިތުރު ތާރީޚުތަކެއް އިތުރުކުރަން ބޭނުންވާކަން ފާހަގަކޮށް އެކަމުގެ ހުއްދައަށް އެދިފައެވެ. އެގޮތުން "14 ޖެނުއަރީ 2021 އާއި، 26 ޖެނުއަރީ 2021 ގައި ފައިސާ ނަގައި ބޭނުން ކޮށްފައިވާކަމަށް" ދައުވާއަށް އިތުރު ކޮށްދިނުމަށް ދައުލަތުން އެދެއެވެ.

އެހެންނަމަވެސް ދިފާއުން ވަނީ އެކަމަށް އިންކާރު ކޮށްފައެވެ. ދިފާއީ ވަކީލު އަލީ ޝާހު ވިދާޅުވީ، ދައުލަތުން އެދިފައިވަނީ ދައުވާ ފޯމުގެ ކުށެއް އިސްލާޙު ކުރުމަށް ނޫން ކަމަށާއި، ދައުވާއަށް އިތުރު ތަފްސީލެއް އިތުރު ކުރުމަށް ކަމަށެވެ. އެއީ މި މަރުޙަލާގައި ކުރެވޭނެ ކަމެއް ނޫން ކަމަށާއި، ދައުލަތަށް އެ ފުރުސަތު ދިނުމަކީ ނިޒާމާ ބީރައްޓެހި ކަމެއް ކަމަށް ވަކީލު ވިދާޅުވިއެވެ. ވަކީލު ވަނީ އެކަމަށް ފާޅުގައި ދިފާއުން އިންކާރު ކުރާކަމަށް ވިދާޅުވެފައެވެ.

އެކަމާ ގުޅޭގޮތުން ދެފަރާތުން ދެއްކެވި ވާހަކައަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ އާދަމްވެސް ވަނީ ދައުވާގެ ސީޣާއަށް އިތުރު ތަފްސީލެއް އިތުރު ކުރުމުގެ ފުރުސަތު ނުދެވޭނެކަމަށް ވިދާޅުވެފައެވެ. އެއާއެކު ހެކި ހުށައެޅުމުގެ ބައި ވަނީ ކުރިއަށް ގެންގޮސްފައެވެ.

މި މައްސަލައިގައި ދައުލަތުން ވަނީ 28 ޝަފަހީ ހެއްކެއް ހުށައަޅާފައެވެ. އަދި ގިނަ ކިތާބީ ހެކިތަކެއްވެސް ހުށައަޅާފައިވެއެވެ. އެއަށްފަހު ދިފާއުން ހެކި ހުށައެޅުމުގެ ބައި ވަނީ ކުރިއަށް ގެންގޮސްފައެވެ.

އެއަށްފަހު ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ މައްސަލައެއްކަމަށް ނިންމަވާފައެވެ. އަދި ޝަރީއަތުގެ ކުރީގެ ހުށައެޅުންތައް ހުށައެޅުމަށް 15 ދުވަހުގެ މުއްދަތެއް ގާޒީ ވަނީ ދެއްވާފައެވެ. އެގޮތުން 25 ޖެނުއަރީވާ އަންގާރަ ދުވަހުގެ 14:00 ގެ ކުރިން ހުށައެޅުންތައް ހުށައެޅުމަށް ގާޒީ ވަނީ ފުރުސަތު ދެއްވާފައެވެ. މި މައްސަލައިގެ ދެން އޮންނަ އަޑުއެހުމެއް އޮންނާނީ އެ މުއްދަތަށް ފަހުއެވެ.

މި މައްސަލަ ގުޅެނީ 12 ޖަނަވަރީ 2021 ވަނަ ދުވަހު ދިވެހިރާއްޖެއަށް މަސްތުވާތަކެތި އެތެރެކޮށް އެތަކެތި ބޭނުންކޮށް، ގެންގުޅެ އަދި އެތަކެތި ޓްރެފިކް ކުރާކަމަށް ތުހުމަތުކުރެވުނު މައްސަލައާއެވެ. އެގޮތުން އެ މައްސަލައިގައި ހިމެނޭ ފަރާތްތަކެއްގެ މައްޗަށް މަސްތުވާތަކެތި ޓްރެފިކް ކުރުމުގެ ދައުވާގެ އިތުރުން، މަނީ ލޯންޑަރިންގެ ދައުވާވެސް އުފުލާފައިވާއިރު، އެ މައްސަލައަކީ މަސްތުވާތަކެތި ޓްރެފިކް ކުރުމުގެ މައްސަލައެއްގައި މަނީ ލޯންޑަރިންގެ ކުށުގެ ދަޢުވާކުރުމަށް ހުށަހެޅި ފުރަތަމަ މައްސަލަކަމަށް ޕީޖީ އޮފީހުން މައުލޫމާތު ދެއެވެ. އަދި އެ މައްސަލައިގައި ރާމިޒާގެ ފިރިމީހާވެސް ހިމެނެއެވެ.

އެ މައްސަލާގައި ފުލުހުން ބަލައިފާސްކުރި ތަންތަނުން ޖުމްލަ 1،542،675ރ (އެއްމިލިއަން ފަސްލައްކަ ސާޅީސް ދެހާސް ހަސަތޭކަ ހަތްދިހަ ފަހެއް) ރުފިޔާ ފެނިފައިވާކަމަށް ޕީޖީ އޮފީހުން މައުލޫމާތު ދެއެވެ. އޭގެ ތެރޭގައި ރާމިޒާގެ ޕަރހެއް ކަމަށްބުނާ ޕަރހަކުން ފެނިފައިވާ 61،500 ރުފިޔާއެއްވެސް ހިމެނެއެވެ.