މިއަހަރުގެވެސް އެންމެ ބޮޑު އަމާޒަކަށްވާނީ މަސްވެރިން ބާނާ މަހަށް ހަމަ އަގު ލިބޭނެ އިންތިޒާމުތައް ހަމަޖެއްސުން ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި އައު އަހަރާއި އައު އަހަރުގެ އަމާޒާ ގުޅޭގޮތުން ވާހަކަ ދައްކަވަމުން މިނިސްޓަރ ވިދާޅުވީ 2021 ވަނަ އަހަރުވެސް މައިގަނޑު ގޮތެއްގައި މަސްވެރިކަމުގެ ދާއިރާއިން ކުރެވިފައިވަނީ މަސްވެރިންނަށް ހަމަ އަގު ހޯދައިދިނުމުގެ މަސައްކަތެވެ. މީގެއިތުރުން މަސްވެރިން ބާނާ މަސް ގަނެވޭނެ އިންތިޒާމު ހަމަޖެއްސުމަކީވެސް މިއަހަރު ތެރޭގައިވެސް ސަރުކާރުން ކުރާނެ މަސައްކަތެއްކަމަށް މިނިސްޓަރ ވިދާޅުވިއެވެ.
މިދުވަސްވަރަކީ ރާއްޖެއަށް އާދަޔާ ޚިލާފަށް ރަނގަޅަށް މަސްބާނާ ދުވަސްވަރެއްކަން ފާހަގަކުރައްވައި މިނިސްޓަރ ވިދާޅުވީ މިދުވަސްވަރު ހުރި ދައްޗަކީ މަސްގަންނަން ހުރި ތަންތަނުގައި މަސްގަނެ ފްރީޒްކުރެވެން އޮތް ޖާގައަށް ވުރެ ގިނައިން މިހާރުވެސް ގަންނަންޖެހުމެވެ. އެހެންކަމުން މަސް ފިނިކުރެވެންހުރި ބޯޓުތަކަށާއެކު، މަސް ގަންނަމުންދާކަމަށް މިނިސްޓަރ ވިދާޅުވިއެވެ.
700،800 ޓަނާއި ގާތަށް ގަނެވޭ. ބްރައިން ފްރީޒިން ކެޕޭސިޓީ ކޫއްޑޫގައި ހުރީ 240 ޓަނު. 12 ގަޑިއިރު ނުވަތަ 8 ގަޑިއިރު ޝިފްޓެއްގައި ގަނެވޭގޮތަށް. ދެ ޝިފްޓަށް ގަނެވޭނީ 480 ވަރު ޓަނު. އެކަމަކު އެއަށްވުރެ މާގިނައިން ބޯޓުތަކާއެކު އެބަ ގަނެވޭ. މިއަހަރު ތެރޭގައިދެން މަސައްކަތްކުރާނީ މިހާރަށްވުރެ ރަނގަޅަށް މަސްވެރިކަން ރަނގަޅުވާއިރު ބާނާ ހުރިހާ މަހެއް އެއްވެސް ކޮންޓްރޯލެއް ނެތި ގަނެވޭނެ އިންތިޒާމު ކުރުމަށް. މިދިޔަ އަހަރު ތެރޭގައިވެސް އެކަމަށް އިންވެސްޓްކުރިން. ލަފާކުރި ވަރަށްވުރެ ރަނގަޅުވެފައި މަސްވެރިކަން އޮތީ. އެއާއެކު މަސް ގަންނާނަކަށް ނޫން ވީކީ. މަހަށް ރަނގަޅު އަގު ލިބޭނެ ގޮތް ހަދައިދޭން އަމާޒުކުރަންޖެހޭ.ޑރ. ޙުސައިން ރަޝީދު ޙަސަން / މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ
މިނިސްޓަރ ވިދާޅުވީ މަސް ބޭނިއްސުރެ މަސް ފިނިކުރެވޭނެ އިންތިޒާމު ދޯނީގައި ހަމަޖައްސަން ޖެހޭކަމަށެވެ. އޭރުން ރަނގަޅު ކޮލިޓީގައި މަހަށް ރަނގަޅު އަގު ލިބިގެން ދާނެއެވެ. ބޭރަށް ފިނިކުރި މަހުގެ ގޮތުގައި އެކްސްޕޯޓްކުރިއަސް އަދި ރާއްޖޭގައި އެ މަހުން ތަކެތި އުފެއްދިއަސް ރަނގަޅު ކޮލިޓީގައި ތަކެތި އުފެއްދޭނީ އޭރުންނެވެ.
އެހެންކަމުން ފުރަތަމަ ކަމަކަށް ރަނގަޅަށް މަސްދޯނި ތަކުގައި މަސް ފިނިކުރެވޭނެ އިންތިޒާމުތައް ހަމަޖައްސަންޖެހޭ ކަމަށް މިނިސްޓަރ ވިދާޅުވިއެވެ.
އެހެންވީމާ މިއަހަރު ކުރާނެ އިތުރު މަސައްކަތަކީ އިތުރު އައިސް ޕްލާންޓް އެޅުމާއި މަސް ދޯނި ފަހަރު ގައި ލޮނުން މަސް ފިނިކުރާނެ އިންތިޒާމުތައް ގާއިމުކުރުން. އެމަސައްކަތް ހިންގާނަން. އެއާއެކު މަހަށް މިހާރު ބޭރުގެ ބަޒާރާރުން ލިބޭ އަގަށް ވުރެ ރަނގޅު އަގު ހޯދައިދޭން މަސައްކަތްކުރާނަން. ރައީސް މިދިޔަ އަހަރު މަސްވެރިންގެ ދުވަހު ވިދާޅުވި ވާހަކަ މިއަހަރުގެ ފުރަތަމަ ތިން މަސް ދުވަހުގެ ތެރޭގައި މަހުގެ އަގު އުފުލޭނޭ. ރައީސް ވަރަށް ވިސްނަވާފައި ވުިދޅުވި ވާހަކައެއް އެއީ. އެހެންވީމާ އަޅުގަނޑަށް ޔަގީނާ ގާތަށް ކަށަވަރު ކުރަންކެރޭ މަހުގެ އަގު އުފުލުމުގެ ފުރުސަތު ލިބިގެންދާނެ.ޑރ. ޙުސައިން ރަޝީދު ޙަސަން / މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ
މިނިސްޓަރ ވިދާޅުވީ މަސް އެކްސްޕޯޓްކޮށްގެން ނުވަތަ މަހުން އުފައްދާ ތަކެތި އުފައްދައިގެން ލިބޭ އެއްޗެއް މިހާރަށްވުރެ ރަނގަޅަށް ލިބެންފެށީމާ މަސްވެރިންނަށް ލިބޭ އާމްދަނީ މިހާރަށްވުރެ ބޮޑުވާނެކަމަށެވެ. އެއިންތިޒާމުތައް ކުރަމުން ގެންދާކަމަށް މިނިސްޓަރ ވިދާޅުވިއެވެ.
