އެންމެ ބޮޑު އަމާޒަކީ މަސްވެރިންނަށް ހަމަ އަގު ލިބޭނެ އިންތިޒާމުތައް ހަމަޖެއްސުން: މިނިސްޓަރ
މަސްވެރިން ބާނާ މަސް ގަނެވޭނެ އިންތިޒާމު ހަމަޖެއްސުމަކީވެސް މިއަހަރު ތެރޭގައިވެސް ސަރުކާރުން ކުރާނެ މަސައްކަތެއް
ފިޝަރީޒް މިނިސްޓަރ ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަނީ
މިއަހަރުގެވެސް އެންމެ ބޮޑު އަމާޒަކަށްވާނީ މަސްވެރިން ބާނާ މަހަށް ހަމަ އަގު ލިބޭނެ އިންތިޒާމުތައް ހަމަޖެއްސުން ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ޙުސައިން ރަޝީދު ޙަސަން ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި އައު އަހަރާއި އައު އަހަރުގެ އަމާޒާ ގުޅޭގޮތުން ވާހަކަ ދައްކަވަމުން މިނިސްޓަރ ވިދާޅުވީ 2021 ވަނަ އަހަރުވެސް މައިގަނޑު ގޮތެއްގައި މަސްވެރިކަމުގެ ދާއިރާއިން ކުރެވިފައިވަނީ މަސްވެރިންނަށް ހަމަ އަގު ހޯދައިދިނުމުގެ މަސައްކަތެވެ. މީގެއިތުރުން މަސްވެރިން ބާނާ މަސް ގަނެވޭނެ އިންތިޒާމު ހަމަޖެއްސުމަކީވެސް މިއަހަރު ތެރޭގައިވެސް ސަރުކާރުން ކުރާނެ މަސައްކަތެއްކަމަށް މިނިސްޓަރ ވިދާޅުވިއެވެ.
މިދުވަސްވަރަކީ ރާއްޖެއަށް އާދަޔާ ޚިލާފަށް ރަނގަޅަށް މަސްބާނާ ދުވަސްވަރެއްކަން ފާހަގަކުރައްވައި މިނިސްޓަރ ވިދާޅުވީ މިދުވަސްވަރު ހުރި ދައްޗަކީ މަސްގަންނަން ހުރި ތަންތަނުގައި މަސްގަނެ ފްރީޒްކުރެވެން އޮތް ޖާގައަށް ވުރެ ގިނައިން މިހާރުވެސް ގަންނަންޖެހުމެވެ. އެހެންކަމުން މަސް ފިނިކުރެވެންހުރި ބޯޓުތަކަށާއެކު، މަސް ގަންނަމުންދާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަސް ބޭނިއްސުރެ މަސް ފިނިކުރެވޭނެ އިންތިޒާމު ދޯނީގައި ހަމަޖައްސަން ޖެހޭކަމަށެވެ. އޭރުން ރަނގަޅު ކޮލިޓީގައި މަހަށް ރަނގަޅު އަގު ލިބިގެން ދާނެއެވެ. ބޭރަށް ފިނިކުރި މަހުގެ ގޮތުގައި އެކްސްޕޯޓްކުރިއަސް އަދި ރާއްޖޭގައި އެ މަހުން ތަކެތި އުފެއްދިއަސް ރަނގަޅު ކޮލިޓީގައި ތަކެތި އުފެއްދޭނީ އޭރުންނެވެ.
އެހެންކަމުން ފުރަތަމަ ކަމަކަށް ރަނގަޅަށް މަސްދޯނި ތަކުގައި މަސް ފިނިކުރެވޭނެ އިންތިޒާމުތައް ހަމަޖައްސަންޖެހޭ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަސް އެކްސްޕޯޓްކޮށްގެން ނުވަތަ މަހުން އުފައްދާ ތަކެތި އުފައްދައިގެން ލިބޭ އެއްޗެއް މިހާރަށްވުރެ ރަނގަޅަށް ލިބެންފެށީމާ މަސްވެރިންނަށް ލިބޭ އާމްދަނީ މިހާރަށްވުރެ ބޮޑުވާނެކަމަށެވެ. އެއިންތިޒާމުތައް ކުރަމުން ގެންދާކަމަށް މިނިސްޓަރ ވިދާޅުވިއެވެ.
