އޮމިކްރޯން ފެތުރުން ކޮންޓްރޯލްކުރަން އިތުރު ފިޔަވަޅުތަކެއް ބޭނުމެއްނުވޭ: ބޮރިސް
ކޮވިޑްގެ އެހެން ވޭރިއަންޓުތަކާއި އަޅާބަލާއިރު އޮމިކްރޯން ވޭރިއަންޓުން ކުރާ އަސަރު ކުޑަ.
އިނގިރޭސި ބޮޑުވަޒީރު ވެކްސިން ޖަހާ ސެންޓަރަކަށް ވަޑައިގެން
އޮމިކްރޯން ވޭރިއަންޓް ފެތުރުން ކޮންޓްރޯލް ކުރުމަށް އިތުރު ފިޔަވަޅުތަކެއް އެޅުން މިހާރު މުހިންމު ނޫންކަމަށް އިނގިރޭސިވިލާތުގެ ބޮޑު ވަޒީރު ބޮރިސް ޖޯންސަން ވިދާޅުވެއްޖެއެވެ.
އިނގިރޭސިވިލާތުގެ ބޮޑުވަޒީރު މި މޭރުމުން ވާހަކަ ދައްކަވަމުން ވިދާޅުވީ ކޮވިޑްގެ އެހެން ވޭރިއަންޓްތަކާއި އަޅާބަލާއިރު އޮމިކްރޯން ވޭރިއަންޓުން ކުރާ އަސަރު ކުޑަކަމަށެވެ. މިހާރު އަޅާފައިވާ ފިޔަވަޅުތައް ގާތުން ބަލަމުން ދާނެކަމަށާއި ނަމަވެސް މިހާރު އަޅާފައިވާ ފިޔަވަޅުތަކަށް ވުރެ އިތުރު ފިޔަވަޅުތައް އެޅުން ކޮންމެހެން މިވަގުތަށް ބޭނު ނޫންކަމަށް ބޮރިސް ވިދާޅުވިއެވެ.
އިނގިރޭސިވިލާތަށް ކޮވިޑްގެ އައު ސަރޖެއް ކުރިމަތިވެފައިވާއިރު، ބޮރިސް ގެންދަވަނީ އިތުރު ފިޔަވަޅުތައް ނާޅުއްވާ ވައިރަސް ފެތުރުން ކޮންޓްރޯލް ކުރެއްވުމަށް މަސައްކަތް ކުރައްވަމުންނެވެ. ޔޫކޭގެ އާބާދީގެ 80 އިންސައްތަ މީހުންނަށް ވަނީ ކޮވިޑް ޖެހިފައެވެ. ސްކޮޓްލެންޑް، ވޭލްސް، އަދި ނޮތަރން އަޔަރލެންޑުން ވަނީ އައު ފިޔަވަޅުތަކެއް އަޅާފައެވެ.
ބޮރިސް ވިދާޅުވީ ހޮސްޕިޓަލްތަކަށް އޮތް ބާރު ކުރިޔަށް އޮތް ހަފްތާ ތަކުގައިވެސް ބޮޑުވެގެން ދާނެކަމަށެވެ. ނަމަވެސް ކުރިއާ އަޅާބަލާއިރު ޕެންޑަމިކަށް ގައުމު އޮތީ ތައްޔާރުވެފައި ކަމަށް ބޮރިސް ވިދާޅުވިއެވެ.
އިނގިރޭސިވިލާތުގައި މިހާރު ކުރިޔަށްދާ ބޫސްޓަރ ޑޯޒް ކެމްޕެއިނަށް އަލިއަޅުވާލައްވައި ބޮރިސް ވިދާޅުވީ އިނގިރޭސިވިލާތުގައި ވެކްސިން ޖަހާފައިވަނީ ވަރަށް މަތީ ލެވެލް އަކަށް ކަމަށެވެ.
ބޮރިސް ވަނީ މިދިޔަ މަހު އިނގިތޭސިވިލާތުގައި ވައިރަސް ފެތުރުން ކޮންޓްރޯލް ކުރުމަށް ފިޔަވަޅުތައް ވަރުގަދަ ކުރައްވައިފައެވެ. އެގޮތުން ޕަބްލިކް ޓްރާންސްޕޯޓް ގަޔާއި ފިހާރަތަކުގައި އުޅޭއިރު މާސްކު އެޅުމަށް ވަނީ އަންގާފައެވެ.
އާދިއްތަ ދުވަހު ސަރުކާރުން ބުނެފައިވަނީ މަތީ ގްރޭޑްތަކުގެ ކުދިން ކްރިސްމަސް ބްރޭކަށްފަހު ސްކޫލަށް ނިކުންނައިރު މާސްކު އަޅަންޖެހޭނެ ކަމަށެވެ.
