ކުއްޖަކު ވިހާފައި ފްލައިޓެއްގެ ފާޚާނައިގައި ހުރި ޑަސްބިނަކަށް ލައިފައި އޮއްވާ ފެނިއްޖެ
މި މައްސަލައާ ގުޅިގެން ހައްޔަރު ކޮށްފައިވަނީ މަޑަގަސްކަރައަށް ނިސްބަތްވާ އުމުރުން 20 އަހަރުގެ އަންހެނެއް
ފްލައިޓްގެ ފާޚާނައިގެ ޑަސްބިނަށް ލާފައި އޮއްވާ ފެނުނު ކުއްޖާ
ފްލައިޓެއްގެ ފާޚާނާ ތެރޭގައި ކުއްޖަކު ވިހެއުމަށްފަހު، ފާޚާނައިގެ ޑަސްބިން ތެރެއަށް އެކުއްޖާ ލައިފައި އޮއްވާ ފެނިއްޖެއެވެ.
މަޑަގަސްކަރއިން ދިޔަ އެއަރ މޮރިޝަސްގެ ފްލައިޓެއްގެ ފާޚާނައިގެ ޑަސްބިނަށް ލާފައި އޮއްވާ ފެނުނީ ފިރިހެން ކުއްޖެކެވެ. އެކުއްޖާ ފެނިފައިވަނީ ސީވޫސަގުރް ރާމްގޫލަމް އިންޓަރނޭޝަނަލް އެއަރޕޯޓްގެ އޮފިސަރުން އެ ފްލައިޓްގައި ހެދި ރޫޓީން ކަސްޓަމް ޗެކަޕްގެ ތެރެއިންނެވެ. މި ކުއްޖާ ފެނުމާއެކު އެއަރޕޯޓުން ވަނީ ކައިރި ހޮސްޕިޓަލަކަށް ވަގުތުން އެކުއްޖާ ގެންގޮސްފައެވެ.
މި މައްސަލައާއި ގުޅިގެން ހައްޔަރު ކޮށްފައިވަނީ މަޑަގަސްކަރައަށް ނިސްބަތްވާ އުމުރުން 20 އަހަރުގެ އަންހެނެކެވެ. އެ އަންހެންމީހާ މިކަމަށް ދެކޮޅު ހެދި ނަމަވެސް ހޮސްޕިޓަލުގައި ހެދި ޓެސްޓުތަކުން ވަނީ އޭނާ ދާދި ފަހުން ވިހާފައި ވާކަން ހާމަ ވެފައެވެ.
ޑަސްބިނުން ފެނުނު ކުއްޖާއާ އަންހެންމީހާ މިހާރުވީ ހޮސްޕިޓަލުގައެވެ. އަ ދެމައިންގެ ހާލުވެސް ރަނގަޅު ކަމަށް ރިޕޯޓުތައް ބުނެއެވެ.
