އެމްބާޕޭއަށް ރެއާލުން ބިޑް ކުރާނީ ހޫނު މޫސުމުގައި

ފްރާންސްގެ ޕީއެސްޖީއަށް ކުޅެމުން އަންނަ ކީލިއަން އެމްބާޕޭއަށް ރެއާލުން ބިޑް ކުރާނީ ހޫނު މޫސުމުގެ ޓްރާންސްފާ މާކެޓުގައި ކަމަށް ރިޕޯޓްތައް ބުނެފިއެވެ.

މިދިޔަ ހޫނު މޫސުމުގައިވެސް އެމްބާޕޭ ހޯދަން ރެއާލުން ވަނީ  ތިން ބިޑެއްކޮށްފައެވެ. އެ ފަހަރު ރެއާލުން ވަނީ އެމްބާޕޭ ހޯދުމަށް 220 މިލިއަން ޕައުންޑްގެ ބިޑެއްވެސް ކޮށްފައެވެ. އެހެންނަމަވެސް ޕީއެސްޖީއިން ވަނީ އެމްބާޕޭ ވިއްކާލުމަށް ދެކޮޅު ހަދާފައެވެ. މިއީ ޕީއެސްޖީން 2018 ވަނަ އަހަރު އެމްބާޕޭގެ އެއްބަސްވުން ދާއިމީ ކުރަން މޮނާކޯއަށް ދެއްކި އަދަދާ ދާދި އެއް އަދަދެކެވެ.

ޕީއެސްޖީގެ އެއްބަސްވުމުގައި އެމްބާޕޭ ހުރީ އަންނަ ހޫނު މޫސުމުގެ ނިޔަލަށެވެ. އެހެންކަމުން އެމްބާޕޭއަށް މިހާރު އޭނާ ބޭނުން ކްލަބަކަށް ކުރީބައިގައި ސޮއި ކުރުމުގެ ފުރުސަތު އޮންނާނެއެވެ. އެކަމަކު ރިޕޯޓުތައް ބުނާ ގޮތުން ޕީއެސްޖީއިން އަދިވެސް އަންނަނީ އެމްބާޕޭގެ ކޮންޓްރެކްޓް އިތުރު ކުރުމަށް މަސައްކަތް ކުރަމުންނެވެ.

ރިޕޯޓްތައް ބުނާ ގޮތުން އެމްބާޕޭ ހޯދަން ފިނި މޫސުމުގައި ރެއާލުން މަސައްކަތްފަށަން ކުރިން ނިންމި ނަމަވެސް މިހާރު ވަނީ ހޫނު މޫސުމުގައި އެމްބާޕޭއާ ވާހަކަ ދައްކަން ނިންމާފައެވެ.

ރެއާލުން އެމްބާޕޭގެ ސޮއި ހޯދުމަށް ކުރަމުން އަންނަ މަސައްކަތް ހޫނު މޫސުމަށް ފަސްކުރަން ނިންމާފައި މިވަނީ ދާދި ފަހުން އެމްބާޕޭ މި ސީޒަނުގައި އިތުރު ކްލަބަކަށް ސޮއި ކުރަން ނުވިސްނާ ކަމަށް ބުނެފައިވަނިކޮށެވެ.

ދާދި ފަހުން މީޑިއާއަކަށް ދިން އިންޓަވިއުއެއްގައި އެމްބާޕޭ ބުނީ އޭނާގެ ހުރިހާ ވެސް ވިސްނުމެއް މިވަގުތު ހުރީ ޕީއެސްޖީއަށް ކާމިޔާބު ހޯދައިދިނުމަށް ކަމަށާއި، ޚާއްސަކޮށް ޗެމްޕިއަންސް ލީގު ކާމިޔާބު ކުރުމަކީ އަމާޒެއް ކަމަށެވެ. އަދި އިތުރު ކްލަބަކަށް ބަދަލުވުމާމެދު ގޮތް ނިންމާނީ ސީޒަން ނިމުމުން ކަމަށް އެމްބާޕޭ ވަނީ ބުނެފައެވެ.

މި ސީޒަނުގައި އެމްބާޕޭ ޕީއެސްޖީގައި މަޑުކުރާއިރު، އޭނާ ވަނީ މިހާތަނަށް އެ ޓީމަށް ކުޅެދުން 175 މެޗުގައި 135 ލަނޑު ޖަހާފައެވެ. އަދި ވަނީ ޕީއެސްޖީއާއެކު ފްރެންޗް ލީގު ތިން ފަހަރު ކާމިޔާބުކޮށްފައެވެ. މީގެ އިތުރުން ޒުވާން އުމުރުގައި އެމްބާޕޭ ވަނީ ފްރާންސާއެކު ފީފާ ވޯލްޑް ކަޕުވެސް ކާމިޔާބުކޮށްފައެވެ.