ބްރިޖް އެޅީމަ މީހުން ވަޅުލަންވެސް ފަސޭހަވެއްޖެ: ޔާމީން
3 ޖެނުއަރީ 2022 | ހޯމަ 13:15ބްރިޖުގެ ފައިދާ ރައްޔިތުންނަށް ލިބި، މީހުން ވަޅުލުމުގައި އިތުރު ފަސޭހަތަކެއް ލިބެމުންދާކަމަށް ވިދާޅުވި
ކުރީގެ ރައީސް އަބްދުﷲ ޔާމީން- ރައީސް ޔާމީން މިފަހަކަށް އައިސް ގެންދަވަނީ ސިޔާސީ ޕޯޑިއަމްތަކުގައި އެމަނިކުފާނުގެ ވެރިކަމުގައި ކުރައްވާފައިވާ ކަންކަމާގުޅޭ ގިނަ ވާހަކަތަކެއް ދައްކަވަމުން
ސިނަމާލެ ބްރިޖުގެ ސަބަބުން މީހުން ވަޅުލުމުގެ ކަންކަމަށްވެސް އިތުރު ލުއިފަސޭހަކަމެއް ލިބިގެން ގޮސްފައިވާކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޗެނަލް-13ގެ ޕްރޮގްރާމެއްގައި ވާހަކަ ދައްކަވަމުން ރައީސް ޔާމީން ވިދާޅުވީ، މާލޭގެ ސަހަރާތައް ފުރިބާރުވެފައިވާ ކަމަށާއި، މަތިމައްޗަށް ވެލި އަޅައިގެން މީހުން ވަޅުލުމަށް ބޭނުން ކުރަމުންދާއިރު، އެތަނުގެ ފާރުތައް ވީރާނާވެގެން ގޮސް، ހައްލު ނުކުރެވިއްޖެނަމަ އިންސާނީ ކަރާމާތަށްވެސް އިހުތިރާމު ކުޑަ ކުރެވެނީ ކަމަށެވެ. އެގޮތުން މާލޭގެ އާ ސަހަރާ ފުުރިފައިވީނަމަވެސް، ބްރިޖުގެ ފައިދާ ރައްޔިތުންނަށް ލިބި، މީހުން ވަޅުލުމުގައި އިތުރު ފަސޭހަތަކެއް ލިބެމުންދާކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، ހުޅުމާލޭގައި ސަހަރާ ގާއިމުކުރީ ކުރިއަށް އޮތް 30 އަހަރަށްވެސް މާލޭގެ ރައްޔިތުން ވަޅުލެވޭނެ ޖާގައެއް ހެދުމަށް ކަމަށެވެ. އަދި ބްރިޖާއެކު އެ މަސައްކަތް ފަސޭހަވެގެން ދިޔަ ގޮތް ރައީސް ޔާމީން ވިދާޅުވެދެއްވިއެވެ. އަދި މިކަންކަމާ ވިސްނަން ބޭނުން ނުވާތީ ރައީސް ޔާމީނު ވަނީ ސުވާލު ކުރައްވާފައެވެ.
ރައީސް ޔާމީން މިފަހަކަށް އައިސް ގެންދަވަނީ ސިޔާސީ ޕޯޑިއަމްތަކުގައި އެމަނިކުފާނުގެ ވެރިކަމުގައި ކުރައްވާފައިވާ ކަންކަމާއި، ޕީޕީއެމް އަލުން ވެރިކަމަށް އައިސްފިނަމަ ކުރައްވާނެ ކަންކަމާ ގުޅޭގޮތުން ގިނަ ވާހަކަތަކެއް، ސީދާ ގޮތުންނާއި ނުސީދާ ގޮތުންވެސް ދައްކަވަމުންނެވެ. އެގޮތުން ބްރިޖުގެ ވާހަކަ ދައްކަވާފައިވާއިރު، ބްރިޖްގެ ފުރަތަމަ ކުރެހުން ދައްކާލިއިރު، ކޮންމެ ކޮޅަކުން ފެނުނު ހަތަރު ލޭނެއް ބްރިޖް ހުޅުވިއިރު ނެތުމާއި، ދުވާ މީހުންނާއި، ބައިސްކަލް ދުއްވާ މީހުންނަށް ހާއްސަ ލޭނުތަކެއް ހުންނާނެކަމަށް ސަރުކާރުން ބުނި ނަމަވެސް އެފަދަ ލޭނެއް ނެތި، ކުއްލިއަކަށް ގެއްލުނު ސަބަބާ ގުޅޭގޮތުން އަދިވެސް ގިނަ ސުވާލުތަކެއް ވަނީ އުފެދިފައެވެ.
އޭގެ އިތުރުން، ބްރިޖުގެ ކުރެހުން ދިވެހިންނަށް ދައްކާލިއިރު ޚަރަދުވާނެކަމަށް ބުނި އަދަދުތަކަށްވުރެ ބޮޑެތި އަދަދުތަކުން އެ ބްރިޖަށްޓަކައި ދިވެހި މާލިއްޔަތުން ވަނީ ޚަރަދުވެސް ކޮށްފައެވެ.
