ހައިވޭގައި ހިނގި ނުރައްކާތެރި އެކްސިޑެންޓާ ގުޅިގެން ބާރު ސްޕީޑްގައި ދުއްވި ސައިކަލު ޓޯކޮށް ފިޔަވަޅު އަޅައިފި
މިއެކްސިޑެންޓުގައި އެއްވެސް މީހަކަށް ސީރިއަސް އަނިޔާއެއް ވެފައިނުވޭ
ޓްރެފިކް ފުލުހުން މާލެއިން ސިނަމާލެ ބްރިޖަށް އަރާ ސަރަހައްދު ބަލަހައްޓަނީ
ހައިވޭގައި އަންގާރަ ދުވަހުގެ ރޭ ހިނގި ނުރައްކާތެރި އެކްސިޑެންޓާ ގުޅިގެން ބާރު ސްޕީޑްގައި ދުއްވި ސައިކަލު ޓޯކޮށް ފިޔަވަޅު އަޅައިފިއެވެ.
ފުލުހުން ބުނީ، ސެޕްޓެންބަރު މަހުގެ 9 ވަނަ ދުވަހުގެ ރޭ 9:36 ހާއިރު، ހައިވޭގައި ބާރު ސްޕީޑްގައި ދުއްވާފައި ދިޔަ ސައިކަލެއް އެހެން ސައިކަލަކާ ބަހެއްގެ ދެމެދުން އޯވަރ ޓޭކް ކުރަން އުޅުމުގެ ތެރޭގައި ސައިކަލުގައި ޖެހި އެކްސިޑެންޓްވެ، ބަހުގެ މެދާ ދިމާލުން ސައިކަލު ދަށުވެ، ބާރު ސްޕީޑްގައި ދުއްވި ސައިކަލު މަގުގެ އެއްފަރާތުގައި މަޑުކޮށްގެން ތިބި ބްރިޖް ފެޓްރޯލް ބީޓްގެ ސައިކަލެއްގައި ޖެހި އެކްސިޑެންޓް ވެފައިވާ ކަމަށެވެ.
މި އެކްސިޑެންޓުގައި އޯވަ ސްޕީޑް ކުރި ސައިކަލު ދުއްވި މީހާއަށާއި، އަނެއް ސައިކަލު ދުއްވި މީހާއަށާއި، ފަހަތުގައި އިން 15 އަހަރުގެ އަންހެން ކުއްޖަކަށް އަނިޔާވެފައިވާ ކަމަށް ފުލުހުން ބުނެއެވެ. އަދި އެއްވެސް މީހަކަށް ސީރިއަސް އަނިޔާއެއް ވެފައިނުވާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ، ބާރު ސްޕީޑްގައި ދުއްވި ސައިކަލު ޓޯކޮށް، މި މައްސަލަ ތަހުގީގު ކުރަމުން ގެންދާ ކަމަށެވެ.
ސިނަމާލެ ބްރިޖުގެ ހައިވޭގައި ނުރައްކާތެރި އެކްސިޑެންޓުތައް މީގެ ކުރިން ވެސް ހިނގާފައިވެއެވެ. ބާރު ސްޕީޑްގައި ދުއްވުމާއި، ކުއްލިއަކަށް ލޭން ބަދަލު ކުރުމުގެ އިތުރުން އޯވަރޓޭކް ކުރުމުގެ ސަބަބުން މީހުންގެ ނުރައްކާވާފަދަ އެކްސިޑެންޓްތައް ހިނގާފައިވެއެވެ.
