މުޢިއްޒު ހައުސިންގ މިނިސްޓަރު ކަމުގައި ހުންނެވި އިރު އަމިއްލަ އެކައުންޓަށް 5 މިލިއަނަށްވުރެ ގިނަ ރުފިޔާ ޖަމާކުރި މައްސަލަ އެސީސީގަ ރަޖިސްޓްރީ ކޮށްފި

މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައުސިންގ މިނިސްޓަރު ކަމުގައި ހުންނެވި އިރު އަމިއްލަ އެކައުންޓަށް ނަގުދު ފައިސާގެ ގޮތުގައި 5 މިލިއަނަށްވުރެ ގިނަ ރުފިޔާ ޖަމާކޮށްފައިވާ މައްސަލައެއް އޭސީސީގައި ރަޖިސްޓްރީ ކޮށްފި އެވެ.

އަމިއްލަ ފަރާތަކުން ހުށަހެޅި މި މައްސަލާގައި ބުނެފައިވަނީ، މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2016 މާރިޗުން 2018 ސެޕްޓެމްބަރު މަހުގެ ނިޔަލަށް ހައުސިންގ މިނިސްޓަރުކަމުގައި ހުންނެވިއިރު، މުޢިއްޒުގެ އަމިއްލަ އެކައުންޓަކަށް ނަގުދު ފައިސާގެ ގޮތުގައި ޖުމްލަ 5،494،804.00 (ފަސްމިލިއަން ހަތަރުލައްކަ ނުވަދިހަ ހަތަރުހާސް އައްސަތޭކަ ހަތަރެއް) ރުފިޔަ ޖަމާކޮށްފައިވާކަމަށެވެ.

އޭގެއިތުރުން، ބޭރުގެ ކުންފުނިތަކާ ހަވަލުކޮށްގެން ކުރިއަށް ގެންދިޔަ ބޮޑެތި މަޝްރޫޢުތައް ހިންގި ކުންފުނިތަކުން މުޢިއްޒުގެ އެކައުންޓުތަކަށް ގިނަ އަދަދެއްގެ ޑޮލަރު ޖަމާކޮށްފައިވާ ކަމަށާއި، މި ފައިސާ އަކީ މުޢިއްޒުގެ އަމިއްލަ ރޯހައުސްއެއް އެ ކުންފުނިތަކަށް ކުއްޔަށް ދީގެން ލިބނު ފައިސާކަމަށް މުޢިއްޒު ވިދާޅުވެފައި ވީނަމަވެސް، އެއް މުއްދަތެއްގައި އެއްތަނެއް ތިން ކުންފުންޏަކަށް ކުއްޔަށް ނުދެވޭނެތީ، މިއީ އޮޅުވާލުމަށް ދެއްވާފައިވާ ޖަވާބެއް ކަމަށް ބުނާ މައްސަލަ އެއްކަމަށް މައްސަލައިގެ ހުލާސާގައި ބުނެފައިވެ އެވެ.

ފާހަގަކޮށްލެވޭ ގޮތުގައި މުޢިއްޒު ހައުސިންގ މިނިސްޓަރު ކަމުގައި ހުރިއިރު ހިންގި އެންމެ ބޮޑު ޕްރޮޖެކްޓު ކަމަށްވާ ސިނަމާލެ ބްރިޖާއި ގުޅިގެން ގާއިމުކުރި ހައިވޭ ތަރައްގީކުރި ހުނާން ކޮންސްޓްރަކްޝަން ކުންފުނިން 2018 ވަނަ އަހަރުގެ ތެރޭގައި ހަތަރު ފަހަރެއްގެ މަތިން މުއިއްޒުގެ އެކައުންޓަށް ޖުމުލަ 70,499 ޑޮލަރު (1,087,094.58ރ.) އެ ކުންފުނިން ޖަމާކޮށްފައިވާކަން ލިޔެކިއުންތަކުން އެނގެ އެވެ. އަދި މުއިއްޒުގެ އެކައުންޓަށް ޑޮލަރު ވަނުމުގެ ކުރިން އޮކްޓޯބަރު 15, 2017 ގައި ދައުލަތުގެ ބަޖެޓުން ފިނޭންސް މިނިސްޓްރީން ވަނީ ހުނާން ކޮންސްޓްރަކްޝަނަށް 105,950 ޑޮލަރު (1,633,749 ރުފިޔާ) ޖަމާކޮށްފަ އެވެ. މިއީ ވެސް ލިޔެކިއުންތަކުން ފެންނަންހުރި ކަންކަމެވެ.

އޭގެ އިތުރުންވެސް މާލޭގެ މޭޔަރު ކަމާއި މެއި 2021, ގައި ހަވާލުވުމަށް ފަހު ވެސް މި ކުންފުންޏަށް ސިޓީ ކައުންސިލުން ވަނީ މަޝްރޫއެެއް ހަވާލުކޮށްފަ އެވެ. އެގޮތުން, މާލޭ ސިޓީގެ ތާރު އަޅާފައި ހުރި މަގުތަކުގައި ހެދިފައި ހުރި ޕޮޓްހޯލްސް ބައްދަން އެ ކުންފުންޏާ ހަވާލުކުރީ 1.4 މިލިއަން ރުފިޔާއަށެވެ.