ސިނަމާލެ ބުރިޖު ގެ ހައިވޭގައި ސައިކަލަކާއި ޕިކަޕެއް ޖެހި ހިނގި ނުރައްކާތެރި އެކްސިޑެންޓުގައި އަންހެނަކާ ފިރިހެނެކަށް އަނިޔާ ވެއްޖެ އެވެ.

ހޮނިހިރު ދުވަހު ފުލުހުން ބުނީ، މި އެކްސިޑެންޓު ހިނގީ މާލެއިން ހުޅުމާލެއަށް ދާ ހައިވޭ ގެ ލޭން ހަތަރެއް ނިމޭ ހިސާބުގައި ސައިކަލަކާއި ޕިކަޕެއް ޖެހުމުން ކަމަށެވެ. އަދި މި އެކްސިޑެންޓުގެ ރިޕޯޓު 29 ނޮވެންބަރު 2025 ވަނަ ދުވަހުގެ ހެނދުނު 9:00 ހާއިރު ލިބިފައިވާ ކަމަށެވެ.

ފުލުހުން ބުނީ، މި އެކްސިޑެންޓުގައި އަނިޔާވެފައިވަނީ ސައިކަލު ދުއްވަން އިން 28 އަހަރުގެ ދިވެހި ފިރިހެނަކަށާއި، ސައިކަލު ފަހަތުގައި އިން 22 އަހަރުގެ އިންޑިއާ އަންހެނަކަށް ކަމަށެވެ. ދެ މީހުންނަށް ވެސް އައިޖީއެމްއެޗް ގައި ފަރުވާ ދެމުންދާ ކަމަށް ފުލުހުން ބުނެ އެވެ.

މީގެ އިތުރުން ފުލުހުން ބުނީ، މި އެކްސިޑެންޓު ގައި ފިރިހެން މީހާގެ ކަނާއަތުގެ ކޮނޑުހުޅު ނެއްޓި އެކިވަރުގެ އަނިޔާ ލިބިފައިވާ ކަމަށެވެ. އަދި އަންހެން މިހާގެ އެކި ތަންތަން މަށައިގެން ގޮސް އެކިވަރުގެ އަނިޔާ ލިބިފައިވާ ކަމަށެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.