ރަމަޟާން މަހުގެ ފުރަތަމަ 10 އެއްގައި 100ށް ވުރެ ގިނަ އެކްސިޑެންޓްތައް މާލެސިޓީގައި ހިނގާފައިވާ ކަމަށް ފުލުހުންގެ ޚިދުމަތުން ބުނެފިއެވެ.

ފުލުހުން އާއްމުކޮށްފައިވާ ތަފާސްހިސާބުތަކަށް ބަލާއިރު، ރަމަޟާން މަހުގެ ފުރަތަމަ 10 ގައި އެންމެ ގިނަައިން ރިޕޯޓު ކޮށްފައިވަނީ އެކްސިޑެންޓްތަކުގެ މައްސަލަތަކެވެ. އެގޮތުން 153 އެކްސިޑެންޓް ރިޕޯޓު ކޮށްފައިވާ ކަމަށް ފުލުހުން ބުނެއެވެ.

ރަމަޟާން މަހާއި ދިމާކޮށް ކޮންމެ އަހަރަކު ވެސް މާލެސިޓީގައި އެކްސިޑެންޓްތައް ހިންގާ މިންވަރު އިތުރު ކަމަށް ފުލުހުން ބުނެއެވެ.

ބުރާސްފަތި ދުވަހު ވެސް ސިނަމާލެ ބްރިޖުން މާލެއަށް ފައިބާ ސަރަހައްދުގައި ދެ ސައިކަލެއް ޖެހި ނުރައްކާތެރި އެކްސިޑެންޓެއް ހިނގާފައިވެއެވެ.

ފުލުހުން ބުނީ މިއެކްސިޑެންޓްގެ ރިޕޯޓު ބުރާސްފަތި ދުވަހުގެ ހެނދުނު 10:21 ހާއިރު ލިބިފައިވާ ކަމަށާއި، މި އެކްސިޑެންޓުގައި ސައިކަލު ދުއްވި ދެމީހުންނަށް ވެސް އަނިޔާވެފައިވާ ކަމަށެވެ. އެ ދެމީހުންނަށް ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށާއި، ސީރިއަސް އަނިޔާއެއް ނުލިބޭ ކަމަށް މައުލޫމާތު ލިބިފައިވާ ކަމަށް ފުލުހުން ބުނެއެވެ.

މީގެ އިތުރުން ފުލުހުން ބުނީ ސައިކަލު ދުއްވާފައިވަނީ ލައިސެންސް އޮތް ދެމީހުން ކަމަށާއި، އިތުރަށް ބަލަންޖެހޭ ކަންކަން ބަލަމުންދާ ކަމަށެވެ.

އެކްސިޑެންޓްތަކުގެ އިތުރުން ރަމާޟާން މަހު ވައްކަން ކުރުމާއި، ފޭރުމުގެ މައްސަލަތައް ރިޕޯޓު ކުރާ މިންވަރު އިތުރުވާ ކަމަށް ފުލުހުން ބުނެއެވެ. އެގޮތުން މިއަހަރުގެ ރަމަޟާން މަހު އާއްމު ރައްޔިތުންނަށް އަމާން ރައްކާތެރި މާހައުލެއް ގާއިމް ކޮށްދިނުމަށް ފުލުހުން ވަނީ މާލެ ސިޓީގެ އެކި ސަރަހައްދުތަކުގައި ފުލުހުން ހަރަކާތްތެރިވާ މިންވަރު އިތުރުކޮށްފައެވެ.

ފުލުހުން ބުނީ ރަމަޟާން މަހުގެ ފުރަތަމަ 10 ދުވަހުގެ ތެރޭގައި، ވައްކަމުގެ 147 މައްސަލައެއް، މަސްތުވާތަކެތީގެ 110 މައްސަލަ، އަނިޔާކުރުމުގެ 40 މައްސަލަ، މުދަލަށް ގެއްލުންދިނުމުގެ 48 މައްސަލަ ފޭރުމުގެ 8 މައްސަލަ، ފޯޖަރީގެ 8 މައްސަލަ، މަކަރާއި ހީލަތްހެދުމުގެ 13 މައްސަލަ، ގެވެށި އަނިޔާގެ 19 މައްސަލަ، އިންޒާރު ދިނުމުގެ 38 މައްސަލަ، ސައިބާ ކްރައިމްގެ 7 މައްސަލަ، ސްކޭމްގެ 70 މައްސަލަ، ޖިންސީ ފުރައްސާރައިގެ 15 މައްސަލަ އަދި ކުޑަކުދިންނަށް އަނިޔާކުރުމުގެ 16 މައްސަލަ ރިޕޯޓުކޮށްފައިވާ ކަމަށެވެ.