ސުޕްރީމް ކޯޓުގެ ފަނޑިޔާރުންގެ ބެންޗަށް ބަދަލު ގެނައުމަށް ކޯޓުތަކުގެ ޤާނޫނަށް ގެނައި އެއްވަނަ އިސްލާހު ބާތިލްކުރުމަށް ސުޕްރީމް ކޯޓަށް ހުށަހަޅައިފި އެވެ.

2014 ވަނަ އަހަރު ކޯޓުތަކުގެ ޤާނޫނަށް ގެނައި، އެއް ވަނަ އިސްލާހުގެ ދަށުން ސުޕްރީމް ކޯޓުގެ ބެންޗަށް ވަނީ ބަދަލުތަކެއް ގެނެސްފަ އެވެ. އެގޮތުން ސުޕްރީމް ކޯޓުގެ ބެންޗުގައި 7 ބޭފުޅުން ތިއްބެވިއިރު، ޤާނޫނަށް ގެނައި އިސްލާހާއެކު އެ އަދަދު ވަނީ 5 އަށް މަދުކޮށްފަ އެވެ. އެ އިސްލާހާއެކު، ސުޕްރީމް ކޯޓުގެ އުއްތަމަ ފަނޑިޔާރު އަހުމަދު ފާއިޒް ހުސެއިންނާއި، ފަނޑިޔާރު މުއުތަސިމް އަދުނާނުގެ މަޤާމުން ދުރުކުރި އެވެ. 

ކޯޓުތަކުގެ ޤާނޫނަށް ގެނެސްފައިވާ އެއްވަނަ އިސްލާހާއި، ކުރީގެ އުއްތަމަ ފަނޑިޔާރު އަހުމަދު ފާއިޒް ހުސެއިންނާއި، ފަނޑިޔާރު މުއުތަސިމް އަދުނާން މަޤާމުން ވަކިކުރުމަށް ނިންމި ޖުޑީޝަލް ސާރވިސް ކޮމިޝަންގެ ނިންމުން ބާތިލްކަމަށް ކަނޑައަޅައިދިނުމަށް އެދި ހުށަހަޅާފައިވަނީ، މަޝްހޫރު ގާނޫނީ ވަކީލު، މައުމޫން ހަމީދާއި ޝާހީން ހަމީދާއި ހަސަން މައާޒް ޝަރީފެވެ. އެ ބޭފުޅުން ހުށަހަޅުއްވާފައިވަނީ ޤާނޫނަށް ގެނައި އިސްލާހާއި، ދެ ފަނޑިޔާރުން ވަކިކުރުމަށް ނިންމި ނިންމުން ޤާނޫނު އަސާސީއާއި ހިލާފު ކަމަށް ކަނޑައަޅައިދިނުމަށެވެ. ނަމަވެސް އެ މައްސަލަ ސުޕްރީމް ކޯޓަށް ބަލައިގެންފައިވާކަމެއް ކަށަވަރެއްނުވެއެވެ.

ސުޕްރީމް ކޯޓުގެ ފަނޑިޔާރުންގެ ބެންޗުން، ކުރީގެ އުއްތަމަ ފަނޑިޔަރު އަހުމަދު ފާއިޒް ހުސެއިންނާއި، ފަނޑިޔާރު މުއުތަސިމް އަދުނާން ވަކިކުރުމަށް ނިންމީކޮން ކަމަކަށް ބެލުމަށްފަހުގައިކަމެއް އަދިވެސް ޖުޑީޝަލް ސާރވިސް ކޮމިޝަނުން ހާމަކޮށްފަ އެއް ނުވެއެވެ. އެ ދެ ފަނޑިޔާރުންގެ ތެރެއިން މުއުތަސިމް އަދުނާނަކީ، އާންމުކޮށްވެސް ސުޕްރީމް ކޯޓުން ނިންމަވާ ނިންމުންތަކުގައި ރައުޔު ތަފާތުވާ ފަނޑިޔާރެކެވެ. އަދި މައްސަލަތައް ނިންމުމުގައި އިންސާފުވެރި ރައުޔުތަކެއް ނެރުއްވާ ފަނޑިޔާރެއްގެ ގޮތުގައި ގިނަ ބަޔަކު ބަލައިގެންފައިވާ، އިހުތިރާމް ލިބިގެންވާ ފަނޑިޔާރެކެވެ.

ސުޕްރީމް ކޯޓުގެ ކުރީގެ އުއްތަމަ ފަނދިޔާރު އަހުމަދު ފާއިޒް ހުސެއިންނަކީވެސް ބެންޗުން ނިންމާ މައްސަލަތަކުގައި ރައުޔު ތަފާތުވާ ފަނޑިޔާރެކެވެ. ފަހަކަށް އައިސް އަހުމަދު ފާއިޒް ހުސެއިން ގެންދަވަނީ މިހާރުގެ ސުޕްރީމް ކޯޓުގެ ބެންޗުން ނިންމަވާ ބައެއް ނިންމެވުންތަކަށް ނުސީދާގޮތެއްގައި ބަހުގެ ހަމަލާތައްދެއްވަމުންނެވެ.

މިހާތަނަށް އައިއިރު ވެސް ފާއިޒު އާއި މުއުތަސިމް މަގާމުން ދުރުކުރަން ޖޭއެސްސީން ނިންމި ސަބަބެއް، އެ ކޮމިޝަނުން ވެސް އަދި ރައްޔިތުންގެ މަޖިލީހުން ވެސް ހާމައެއް ނުކުރެ އެވެ. 

ސުޕްރީމް ކޯޓުގައި މިހާރު ތިއްބަވާނީ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާއި ފަނޑިޔާރު ޑރ. އަހުމަދު އަބްދުﷲ ދީދީގެ އިތުރުން ފަނޑިޔާރުން އާދަމް މުހައްމަދު އަބްދުﷲ އަދި ފަނޑިޔާރު އަބްދުﷲ އަރީފެވެ.