ބާސާއިން މޮރާޓާއަށް ފާރަލަނީ
1 ޖެނުއަރީ 2022 | ހޮނިހިރު 13:03ބާސާއިން އަންނަނީ އެ ޓީމުގެ ސްކޮޑު ވަރުގަދަ ކުރުމަށް މަސައްކަތް ކުރަމުން
ޔުވެންޓަސްގެ ފޯވާޑް އަލްވާރޯ މޮރާޓާ
ސްޕެއިންގެ ގަދަ ބާރު ބާސެލޯނާއިން ޔުވެންޓަސްއަށް ކުޅެމުން އަންނަ ސްޕެއިންގެ ފޯވާޑް އަލްވާރޯ މޮރާޓާ ގެންނަން މަސައްކަތް ކުރާކަމަށް ރިޕޯޓުތައް ބުނެފިއެވެ.
ޖެނުއަރީ ޓްރާންސްފަރ މާކެޓުގައި ބާސެލޯނާއިން އެޓީމުގެ ސްކޮޑު ވަރުގަދަކުރަން މަސައްކަތް ކުރަމުން އަންނައިރު، މިފަހުން ބާސެލޯނާއިން ވަނީ މެންޗެސްޓާ ސިޓީއަށް ކުޅެމުން އައި ސްޕެއިންގެ ފޯވާޑް ފެރާން ޓޮރޭޒްގެ ސޮއިވެސް ހޯދާފައެވެ.
ރިޕޯޓްތައް ބުނާ ގޮތުން ބާސެލޯނާއިން މިހާރުވަނީ މޮރާޓާއާއިއެކު މަޝްވަރާ ކުރަމުންނެވެ. އަދި މި މަޝްވަރާތަކުގައި މޮރާޓާ ވަނީ ބާސެލޯނާއަށް ބަދަލުވާން އަނގަބަހުން އެއްބަސްވެފައެވެ.
މޮރާޓާ މިވަގުތު ޔުވެންޓަސްގައި ހުރީ އެތުލެޓިކޯ މެޑްރިޑްގެ ލޯނު އެއްބަސްވުމެއްގެ ދަށުންނެވެ. އެ ކޮންޓްރެކްޓުގައިވާ ގޮތުން ޔުވެންޓަސްއިން ބޭނުންނަމަ އެއްބަސްވުން ދާއިމީކުރުމުގެ ފުރުސަތު އޮންނާނެއެވެ. އެއީ ލޯނު އެއްބަސްވުން ހަމަވުމުން 35 މިލިއަން ޔޫރޯ ދައްކައިގެންނެވެ. އެކަމަކު އެއްބަސްވުން ދާއިމީ ނުކޮށް ލޯނު އެއްބަސްވުން އައު ކުރާނަމަ ކޮންމެ ސީޒަނަކަށް 10 މިލިއަން ޔޫރޯގެ ލޯނު ފީއެއް ދައްކަން ޖެހޭނެއެވެ.
ޔުވެންޓަސްއިން މޮރާޓާގެ އެއްބަސްވުން ދާއިމީ ކުރަން ދައްކަންޖެހޭ ފީ ބާސެލޯނާއިން ހަމަޖައްސައިފިނަމަ މޮރާޓާއަށް ބާސެލޯނާއަށް ބަދަލުވެވޭނެއެވެ. އެކަމަކު ޔުވެންޓަސްއިން މޮރާޓާގެ ލޯނު އެއްބަސްވުން ކެންސަލްކޮށްފިނަމަ ބާސެލޯނާއިން ދެން މޮރާޓާ ހޯދަން މަޝްވަރާކުރަން ޖެހޭނީ އެތުލެޓިކޯއާއެވެ.
ރެއާލް މެޑްރިޑަށް ކުރިން ކުޅުނު މޮރާޓާ ވަނީ އެތުލެޓިކޯ އާއި ޔުވެންޓަސްގެ އިތުރުން އިންގްލެންޑްގެ ޗެލްސީ އަށްވެސް ކުޅެފައެވެ.
