އުތީމުގެ ކޮންމެ ގެއަކަށް އާ އަހަރުގެ ކަލަންޑަރެއް
އުތީމުގައި މީހުން ދިރިއުޅޭ 128 ގޭބީސީއަކަށް ކަލަންޑަރު ހަދިޔާ ކޮށްފައިވޭ
އުތީމުގައި ކަލަންޑަރު ބެހުމުގެ ހަރަކާތުގެ ތެރެއިން
ހއ. އުތީމުގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ފަރާތުން އާ އަހަރުގެ ހަދިޔާގެ ގޮތުގައި އެރަށުގައި މީހުން ދިރިއުޅޭ ކޮންމެ ގޭބީސީއަކަށް 2022 ގެ ކަލަންޑަރެއް ހަދިޔާ ކޮށްފިއެވެ.
އުތީމުގެ އަންހެންނުންގެ ތަރައްްޤީއަށް މަސައްކަތް ކުރާ ކޮމެޓީން ކަލަންޑަރު ބެހުމުގެ ހަރަކާތް ހިންގާފައިވަނީ 31 ޑިސެމްބަރ 2021 ވީ ހުކުރު ދުވަހުގެ ހަވީރުއެވެ. އެގޮތުން އުތީމުގައި މީހުން ދިރިއުޅޭ 128 ގޭބީސީއަކަށް ކަލަންޑަރު ހަދިޔާ ކޮށްފައިވާއިރުގައި އުތީމުގެ ހަތަރު މިސްކިތަކަށާއި ޤުރުއާނާއި ބެހޭ މަރުކަޒުން އެރަށުގައި ހިންގާ ޤްރުޢާން ކުލާހަކަށްވެސް ވަނީ ކަލަންޑަރު ހަދިޔާ ކޮށްފައެވެ.
އުތީމުގެ އަންހެނުންގެ ކޮމެޓީން ހާމަކޮށްފައިވާ ގޮތުގައި މި ހަރަކާތަކީ އާ އަހަރާއި ދިމާކޮށް އުތީމުގެ ރައްޔިތުންނަށް ހަދިޔާއެއް ދިނުމުގެ ގޮތުން ކުރިއަށް ގެންދެވުނު ހަރަކާތެކެވެ. އެގޮތުން މިކަމަށް ހިނގި ޚަރަދުގެ ފަންސާސް އިންސައްތަ އަކީ ކޮމެޓީން ހޯދި ސްޕޮންސާރއިން ހަމަޖެއްސި ފައިސާ ކަމަށް ވެސް ހާމަކުރެއެވެ.
