މާލެ ވެޓެރަންސް އާއި ނިއު ސްޓާއަށް މޮޅެއް

ކްރިކެޓް ބޯޑް އޮފް މޯލްޑިވްސްއިން އިންތިޒާމުކޮށްގެން ކުރިޔަށް ގެންދާ ޓީ20 ކްރިކެޓް ޕްރިމިއާ ލީގުގައި ހުކުރު ދުވަހު ކުޅުނު މެޗުތައް މާލޭ ވެޓަރަންްސް އަދި ނިއު ސްޓާއިން ކާމިޔާބުކޮށްފިއެވެ.

ހުކުރު ދުވަހު ފުރަތަމަ ކުރިޔަށްދިޔަ މެޗު މިލާން ކްރިކެޓް އެކަޑަމީއާ ބައްދަލުކޮށް 6 ވިކެޓުން ކާމިޔާބު ކޮށްފައިވަނީ މާލޭ ވެޓަރަންސްއެވެ.

މެޗުގެ ޓޮސް ދިމާވުމުން މިލާން ކްރިކެޓް އެކަޑަމީން ގަސްތުކުރީ ކުޅުމަށެވެ. އެ ޓީމުން ކުޅެންއަރާ 19.4 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެް ހެދިފައިވަނީ 91 ލަނޑެވެ. މިލާން ކްރިކެޓް އެކަޑަމީން އެންމެ ރަނގަޅަށް ކުޅެފައިވަނީ 18 ލަނޑު ހެދި ލީމް ސްފީގް އާއި 13 ލަނޑު ހެދި އާދަމް ނާސިފުއެވެ.

ޖަވާބުގައި މާލޭ ވެޓަރަންސް ކުޅެންއަރާ 19.4 އޯވަރުގެ ތެރޭގައި 7 ކުޅުންތެރިން ނުވައިވެގެން 92 ލަނޑު ވަނީ ހަދާފައެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 21 ލަނޑު ހެދި ޕިޔާލް އާއި 21 ލަނޑު ހެދި އެ ޓީމުގެ ކެޕްޓަން ޕްރަދީޕްއެވެ.

ހުކުރު ދުވަހު ކުޅުނު ދެވަނަ މެޗު އޮފްއެފްސީއާ ބައްދަލުކޮށް 6 ވިކެޓުން ކާމިޔާބުކުރީ ނިއު ސްޓާއެވެ.

މެޗުގެ ޓޮސް ދިމާވުމުން އޮފްއެފްސީ ކުޅެންއަރާ 20 އޯވަރު ހަމަވިއިރު 9 ކުޅުންތެރިން ނުބައިވެގެން ހެދިފައިވަނީ 136 ލަނޑެވެ. އެޓީމުން އެންމެ ރަނގަޅަށް ކުޅުނީ ނުބައިނުވެ 37 ބޯޅައިން 50 ލަނޑުހެދި މުޙައްމަދު ސިއްޕާއެވެ.

ޖަވާބުގައި ނިއު ސްޓާއިން ކުޅެންއަރާ 18 އޯވަރުގެ ތެރޭގައި 4 ކުޅުންތެރިން ނުބައިވެގެން 140 ލަނޑު ހެދިއެވެ. އެ ޓީމުން އެންމެ ރަނގަޅަށް ކުޅުނީ ނުބައިނުވެ 40 ބޯޅައިން 56 ލަނޑުހެދި ސަފީގު އާއި 27 ލަނޑު ހެދި އަމީން މިލޯންއެވެ.

މި މުބާރާތުގެ ފުރަތަމަ ކުޅޭ ޕްރިމިއާ ލީގު ބުރުގައި ކޮންމެ ޓީމެއް ކޮންމެ ޓީމަކާ އެއްފަހަރު ވާދަކުރާއިރު، އެ މެޗުތަކަށްފަހު ރޭންކިން އެއްވަނައަށް ދާ ޓީމަކީ ޕްރިމިއާ ލީގުގެ ޗެމްޕިއަނުންނެވެ. އަދި އެއަށްފަހު ފައިނަލް ބުރުގައި ކުޅޭނީ މުބާރާތުގެ ރޭންކިންގެ ގަދަ ހަތަރު ޓީމެވެ.