ކޮވިޑް-19ށް އިތުރު 160 މީހުން ޕޮޒިޓިވްވެއްޖެ
މިވަގުތު އެކްޓިވް ކޭހުގެ ގޮތުގައި ގުނަމުން އަންނަނީ 2298 ކޭސް
ކޮވިޑަށް ޓެސްޓު ކުރުމަށް ސާމްޕަލް ނެގުން
ރާއްޖެއިން އިތުރު 160 މީހުން ކޮވިޑް-19ށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާލާއިރު ޕޮޒިޓިވްވި 160 މީހުންގެ ތެރޭގައި ހިމެނެނީ މާލެ ސަރަހައްދުން 38 މީހުންނެވެ. އަތޮޅުތަކުން 71 މީހުން ކޮވިޑަށް ޕޮޒިޓިވްވިއިރު ހިނގަމުންދާ ރިސޯޓްތަކުން 51 މީހުން ކޮވިޑަށް ޕޮޒިޓިވްވިއެވެ.
މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 95،700ށް އަރާފައެވެ. މިވަގުތު އެކްޓިވް ކޭހުގެ ގޮތުގައި ގުނަމުން އަންނަނީ 2298 ކޭހެވެ. މީގެތެރެއިން 18 މީހުންނަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ. ރާއްޖެއިން 93،127 މީހުން ވަނީ ބަލިން ފަސޭހަވެފައެވެ.
262 މީހުން ވަނީ މިބަލީގައި ނިޔާވެފައެވެ.
ރާއްޖޭގައި މިފަހަކުން ވަނީ ކޮވިޑްގެ ކޭސްތަކުގެ އަދަދު އިތުރުވެފައެވެ. އެގޮތުން ފާއިތުވި ދުވަސްތަކުގައި ރިސޯޓްތަކުން ކޮވިޑަށް ޕޮޒިޓިވްވާ މީހުންގެ އަދަދު ވަނީ އިތުރުވެފައެވެ.
