2022 ވަނަ އަހަރު ކޮވިޑް ޕެންޑަމިކް ނިމުމަކަށް ގެނެވިދާނެ: ޑަބްލިއުއެޗްއޯ
ގައުމުތަކުގެ މެދުގައި ގެންގުޅޭ ތަފާތުކުރުންތައް ނައްތާލަންޖެހޭ
ޓެޑްރޮސް އަދަނޮމް - ޑަބްލިއެޗްއޯ ޗީފް
ތަފާތުކުރުންތައް ނައްތާލައިފިނަމަ 2022 ވަނަ އަހަރު ކޮވިޑް-19 ޕެންޑަމިކް ނިމުމަކަށް ގެނެވިދާނެ ކަމަށް ގަބޫލުކުރައްވާކަމަށް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ)ގެ ޑިރެކްޓަރ ޖެނެރަލް ޑރ. ޓެޑްރޯސް އަދަނޮމް ވިދާޅުވެއްޖެއެވެ.
ބުރާސްފަތި ދުވަހު ޓެޑްރޯސް ވިދާޅުވީ މި ބަލިން އަރައިގަތުމަށް ބޭނުންވާ ހުރިހާ ވަސީލަތެއް މިވަގުތު ހޯދިފައި އެބަހުރި ކަމަށެވެ. އެހެންނަމަވެސް ވަސީލަތްތައް ފޯރުކޮށްދިނުމުގައި ތަފާތުކުރުންތައް ގެންގުޅޭހާ ހިނދަކު ޕެންޑަމިކް ދާނީ ހައްތަހާ ބޮޑަށް ދިގުލައިގެން ކަމަށް ވިދާޅުވިއެވެ.
ޓެޑްރޯސް ވިދާޅުވީ ދެ އަހަރުގެ ތެރޭގައި ކޮވިޑާއި ދެކޮޅަށް މަސައްކަތްކުރުމަށް ހޯދިފައިވާ ވަސީލަތްތައް ގައުމުތަކަށް ފޯރުކޮށްދިނުމުގައި ތަފާތުކުރުންތައް ގެންގުޅެފައިވާކަމަށެވެ. އެފްރިކާގައި ކޮންމެ 4 ހެލްތް ކެއަރ ވޯކަރަކުން 3 ހެލްތް ކެއަރ ވޯކަރުންނަކީ ވެކްސިން ނުޖަހާ ތިބި މީހުން ކަމަށާއި، އެހެންނަމަވެސް ޔޫރަޕް އަދި ޔޫއެސް ފަދަ ގައުމުތަކުގައި މިވަގުތު ތިންވަނަ ޑޯޒް ނުވަތަ ބޫސްޓަރ ޑޯޒް ޖަހަމުންދާކަމަށް އޭނާ ވިދާޅުވިއެވެ.
މިގޮތަށް ގެންގުޅޭ ތަފާތުކުރުންތައް ނައްތާލައިފިނަމަ 2022 ވަނަ އަހަރުތެރޭގައި މި ޕެންޑަމިކް ނިމުމަކަށް ގެނެވޭނެ ކަމަށް ޓެޑްރޯސް ވިދާޅުވިއެވެ. އޭނާ ވިދާޅުވިގޮތުގައި އައު އަހަރުގެ އަމާޒަކީ ކޮވެކްސް ފަދަ ފެސިލިޓީތައް މެދުވެރިކޮށް، 2022 ވަނަ އަހަރުގެ މެދާ ހަމައަށް ދެވޭއިރަށް ގައުމުތަކުގެ 70 އިންސައްތަ މީހުންނަށް ވެކްސިން ދިނުމަށް މަސައްކަތް ކުރުން ކަމަށެވެ.
