ހަރަމްފުޅުގައި އަނެއްކާވެސް ގައިދުރުކަން ބެހެއްޓުމުގެ އުސޫލަށް އަމަލުކުރަން އަންގައިފި
މިހަފުތާގެ ބުދަދުވަހު އެކަނިވެސް 744 މީހުން ޕޮޒިޓިވްވި
ހައްޖު 1441 - ގައިދުރުކަމުގައި ހައްޖުގެ އަޅުކަން އަދާކުރުން
ކޮވިޑަށް ޕޮޒިޓިވްވާ މީހުންގެ އަދަދު ކުއްލިއަކަށް މަތިވާން ފެށުމުން މައްކާގެ ހަރަމްފުޅުގައި ގައިދުރުކަން ބެހެއްޓުމުގެ ނިޒާމު ސައުދީ ސަރުކާރުން އަނެއްކާވެސް ތައާރަފުކޮށްފިއެވެ.
ސައުދީ ސަރުކާރުން ބުނެފައިވަނީ މައްކާގެ ހަރަމްފުޅުގައި ނަމާދުކުރާ މީހުންނާއި ތަވާފުކުރާ މީހުންނާއި ސައުޔުކުރާ މީހުންވެސް ހިމެނޭގޮތުން ގައިގޯޅިނުވެ ދުރުދުރުގައި މީހުންނަށް ތިބެވޭނޭ އުސޫލަށް ބުރާސްފަތި ދުވަހުން ފެށިގެން އަނެއްކާވެސް އަމަލުކުރަން ފަށާފައިވާ ކަމުގައެވެ. ހަރަމްފުޅުގެ އިތުރުންވެސް މީސްތަކުން އެއްވާ އެހެން ތަންތަނުގައިވެސް ގައިދުރުކަން ބެހެއްޓުމުގެ އުސޫލަށް އަމަލުކުރުމަށް ވަނީ އަންގާފައެވެ.
ކޮވިޑުގެ ނުރައްކަލާ ގުޅިގެން އެއްއަހަރުގެ ހައްޖުވެސް ވަނީ ކެންސަލްކޮށްފައެވެ. އަދި އުމްރާއަށް އެކި ގައުމުތަކުން އެތެރެވާ މީހުންގެ އަދަދުވެސް ބޮޑު ތަނުން ވަނީ މަދުކޮށްފައެވެ. ހަރަމްފުޅުގައި ސަފުތައް ހަދަންޖެހޭގޮތާއި ގައިދުރުކަން ބަހައްޓަންވީ ހިސާބު އެންގުމަށްޓަކައި ހަރަމަފުޅުގެ ތަޅަމުގައި ގާއިމުކުރި ކުރެހުންތައް ފޮހެލައި ގައިދުރުކަންވެސް އުވާލީ މިއަހަރުގެ އޮކްޓޫބަރު މަހުގެ ތެރޭގައެވެ.
މި ނިޒާމު އަލުން ތައާރަފުކުރީ އޮމިކްރޯން ވޭރިއަންޓާއި ޑެލްޓާ ވޭރިއަންޓު ހަލުވިކަމާއެކު ފެތުރި މިހަފުތާގެ ބުދަދުވަހު އެކަނިވެސް 744 މީހުން ޕޮޒިޓިވްވުމާ ގުޅިގެންނެވެ. އައު ފިޔަވަޅުތަކާއެކު މާސްކު އެޅުންވެސް ވަނީ އަލުން މަޖުބޫރުކޮށްފައެވެ. ސައޫދީ އަރަބިޔާގައި މިހާތަނަށް ހަލައްކައެއްހާ މީހުންނަށް ކޮވިޑަ ޖެހި އޭގެތެރެއިން 8 ހާހަށްވުރެ ގިނަ މީހުން ވަނީ މަރުވެފައެވެ.
